Kuzê ki ta kontise na kazamentu di Tistimunhas di Jeová?
Na kazamentu di Tistimunhas di Jeová kuazi sénpri ta ten un serimónia sinplis i bunitu i un diskursu brévi ku bazi na Bíblia. Dipôs di kel serimónia, pode ten un fésta ku kumida.a Poku ténpu dipôs ki Jizus kumesa se trabadju di pregason, el sisti un fésta di kazamentu na sidadi di Kaná. — João 2:1-11.
Modi ki Tistimunhas di Jeová ta faze serimónia di kazamentu?
Tistimunhas di Jeová ta komemora aniversáriu di ses kazamentu?
Modi ki Tistimunhas di Jeová ta faze serimónia di kazamentu?
Párti más inportanti é kel diskursu di kazamentu, ki un ansion ki é Tistimunha di Jeová ta faze. Kel diskursu é sábi i animadu i el ta mostra modi ki Bíblia pode djuda kel kazal ten un kazamentu filís, xeiu di amor i ki ta dura. — Efésios 5:33.
Na txeu país, govérnu ta da alguns ansion di Tistimunhas di Jeová autorizason pa es faze kel párti legal di rejistu. Óras ki es ta faze si, kuazi na fin di diskursu, kel kazal ta faze votu pa kunpanheru i tanbê es pode poi kunpanheru anel di kazamentu. Dipôs kel ansion ta fla ma gósi es é maridu ku mudjer.
Na otus país, lei ta iziji ma kes noivu debe bai kaza la na rejistu. Kes noivu ta bai pa rejistu antis di diskursu di kazamentu. Si kel noivu ku kel noiva ka faze votu pa kunpanheru la na rejistu, es pode faze-l na fin di diskursu. Si dja es faze-l la na rejistu, má es krê torna faze-l, nton es debe fla kel votu di manera ki ta mostra ma dja es fazeba el antis. Na fin di kel diskursu ta fazedu un orason pa pidi benson di Deus sobri kel novu kazal.
Na undi ki Tistimunhas di Jeová ta faze kazamentu?
Txeu Tistimunha di Jeová ta disidi faze ses serimónia di kazamentu na Salon di Reinu, si ta da.b Si ten fésta dipôs di kel serimónia, kel kazal ta skodje un otu lugar pa faze kel-la.
Kenha ki pode sisti?
Si kel serimónia sta fazedu na Salon di Reinu, normalmenti kalker algen pode sisti, sikrê el é ka Tistimunha di Jeová. Si kel kazal sta faze fésta, es ta disidi kenha ki es krê konvida.
Modi ki nu ta bisti na un kazamentu?
Nbóra ka ten un régra sobri modi ki debe bistidu pa sisti kazamentu na Salon di Reinu, Tistimunhas di Jeová ta sforsa pa sigi kel ki Bíblia ta fla sobri bisti di manera ki ka ta txoma atenson pa es i ki ta mostra ruspetu pa kel momentu inportanti. Es ta fika kontenti óras ki otus algen ta faze mésmu kuza. (1 Timóteo 2:9) Si kel kazal disidi faze fésta, ta sigidu kes mésmu prinsípiu sobri manera di bisti.
Nu ta da prezentis di kazamentu?
Bíblia ta fla pa nu ser algen ki gosta di da. (Salmo 37:21) Tistimunhas di Jeová ta fika kontenti óras ki es ta da ô resebe prezentis di kazamentu. (Lucas 6:38) Má, es ka ta pidi prezenti nen es ka ta dexa otus algen sabe kenha ki da-s prezenti. (Mateus 6:3, 4; 2 Coríntios 9:7; 1 Pedro 3:8) Kes kuza la ka sta di akordu ku Bíblia i tanbê es pode poi kes algen ki sta na kel kazamentu ta fika sen jetu.
Ta fazedu txin-txin?
Nau. Tistimunhas di Jeová ka ta faze txin-txin, pamodi faze txin-txin ta faze párti di kustumus ki ben di relijion falsu.c Tistimunhas di Jeová ta uza otus manera pa fla kel novu kazal ma es krê pa ses kazamentu ser filís.
Ta botadu arôs ô otus kuza na kes noivu?
Nau. Na alguns lugar, gentis ta bota arôs ô otus kuza na kel novu kazal. Es ta kridita ma kel-li pode traze sórti, filisidadi i vida pa txeu ténpu pa kel kazal. Má Tistimunhas di Jeová ta ivita kes kustumu ki ten aver ku indís. Pur isu, es ka ta fla otus algen “bon sórti” pamodi kel-la é kóntra prinsípius di Bíblia. — Isaías 65:11.
Ta ten kumida ku bebida?
Na kel serimónia di kazamentu ki ta fazedu na Salon di Reinu, ka ta lebadu nen kumida nen bebida. Má si kel kazal disidi faze fésta dipôs di diskursu, pode ten kumida i bebida na ses fésta. (Eclesiastes 9:7) Si es disidi sirbi bebida alkólika na kel fésta, es debe ten sertéza ma ta bebedu na limiti i ma ken ki ta bebe é sô ken ki ten idadi pa kel-la. — Lucas 21:34; Romanos 13:1, 13.
Ta ten múzika ku badju?
Si ten fésta, kel kazal pode disidi poi múzika ku badju. (Eclesiastes 3:4) Múzika ki es ta skodje ta dipende di kuzê ki es gosta i di ses kultura, má simé kes múzika é sábi i dretu. Na kel serimónia ki ta fazedu na Salon di Reinu, kuazi sénpri ta ten múzika ki ten bazi na Bíblia.
Tistimunhas di Jeová ta komemora aniversáriu di ses kazamentu?
Bíblia ka ta fla si nu debe ô nau faze fésta di aniversáriu di kazamentu, pur isu kes kazal ki é Tistimunha di Jeová ta disidi si es krê komemora ô nau aniversáriu di ses kazamentu. Si es disidi komemora, es pode faze-l es sô ô es pode konvida ses amigu i família.
a Kes kustumu, kuzas ki ta fazedu na kazamentu i kes kuza ki lei ta iziji sobri kazamentu ta dipende di kada lugar.
b Kel ansion ki ta faze diskursu ka ta kobra nada pa kel serimónia di kazamentu i nen ka ta kobradu nada pa uza Salon di Reinu.
c Pa bu sabe más sobri modi ki parse kel kustumu di faze txin-txin, djobe “Perguntas dos leitores” na Sentinéla di 15 di febreru di 2007, na purtugês.