Kuzê ki ta kontise óras ki nu móre?

Respósta di Bíblia

Bíblia ta fla: ‘Kes ki sta bibu sabe ma es ta móre, má mortus ka sabe di más nada’. (Eclesiastes 9:5; Salmo 146:4) Pur isu, óras ki nu móre, nu ta dexa di izisti. Mortus ka ta pode pensa, ka ta pode faze nada i nen es ka ta xinti nada.

‘Pa téra bu ta bai otu bês’

Deus splika primeru ómi, Adon, kuzê ki ta kontise ku nos óras ki nu móre. Dja ki Adon ka obi ku el, Deus fla-l: ‘Pamodi bo é téra i pa téra bu ta bai otu bês.’ (Génesis 3:19) Antis di Deus kria Adon ‘di pó di téra’, Adon ka ta izistiba. (Génesis 2:7) Di mésmu manera, kantu Adon móre, el bira téra otu bês i el dexa di izisti.

Mésmu kuza ta kontise ku kes algen ki ta móre gósi. É kel-li ki Bíblia ta fla sobri pesoas i animal: ‘Es tudu ben di téra i es tudu ta volta pa téra.’ — Eclesiastes 3:19, 20.

Mórti ka ten ki ser fin di tudu kuza

Bíblia txeu bês ta konpara mórti ku sónu. (Salmo 13:3; João 11:11-14; Atos 7:60) Óras ki un algen sta na un sónu pizadu el ka ta konsigi da kónta di kuzê ki sta pasa na se vólta. Di mésmu manera, kes algen ki dja móre ka ta konsigi da kónta di nada. Má, Bíblia ta inxina ma Deus pode korda kes algen mortu, sima korda un algen ki sta na sónu, i da-s vida otu bês. (Jó 14:13-15) Pa kes algen ki Deus ta resusita, mórti é ka fin di tudu kuza.