Kuzê ki é profesia?

Respósta di Bíblia

Profesia é un mensajen ki ta ben di Deus i ki ta mostra kuzê ki Deus ta pensa i kal ki é se vontadi. Bíblia ta fla ma profétas “pâpia di kes kuza ki ben di Deus sima es giadu pa spritu santu.” (2 Pedru 1:20, 21) Nton, proféta é un algen ki ta resebe mensajen di Deus i el ta leba-l pa otus algen. — Atus 3:18.

Modi ki profétas ta resebeba mensajen di Deus?

Deus uza txeu manera pa dexa profétas sabe se mensajen. Nu odja alguns di es:

• El skrebe se mensajen. Deus uza kel manera li peloménus un bês pa da Muizés kes 10 Mandamentu skrebedu. — Ézudu 31:18.

• El pâpia através di anjus. Pur izénplu, Deus uza un anju pa orienta Muizés sobri kel mensajen ki el tinha ki flaba Faraó di Ijitu. (Ézudu 3:2-4, 10) Óras ki asuntu éra más inportanti, Deus ta uzaba anjus pa dita se mensajen, sima el faze ku Muizés. El fla Muizés: “Skrebe kes palavra li, pamodi é di akordu ku kes palavra li, ki N sta ta faze un kontratu ku bo i ku Israel.” — Ézudu 34:27.a

• El pô-s ta ten vizon. Alvês kes proféta ta tinha vizon timenti es ta staba kordadu i sienti. (Isaías 1:1; Habacuque 1:1) Alguns éra rial di tal manera ki kes proféta ki staba ta ten kel vizon ta partisipaba na es. (Lukas 9:28-36; Apokalipse 1:10-17) Ten alguns algen ki resebe vizon kantu es staba tantu konsentradu ki nen es ka ta daba kónta di kuzê ki staba ta kontise na ses vólta. (Atus 10:10, 11; 22:17-21) Tanbê, Jeová dexa profétas sabe kal ki éra se mensajen através di sonhu, timenti es staba ta durmi. — Daniel 7:1; Atus 16:9, 10.

• El gia ses pensamentu. Deus gia pensamentu di ses proféta pa dexa-s sabe kal ki éra se mensajen. É pamodi kel-li ki Bíblia ta fla: “Tudu ki sta na Skritura ben di Deus”. Kes palavra “ben di Deus” tanbê pode ser traduzidu pa “sopradu pa Deus.” (2 Timótiu 3:16) Deus uza se spritu santu, ô se forsa, pa “sopra” ses pensamentu pa menti di ses sérvu. Kel mensajen éra di Deus, má éra kes proféta ki ta skodjeba ki palavra ki es ta uzaba. — 2 Samuel 23:1, 2.

Kes profesia sénpri ta involveba kuzas ki ta ba kontiseba na futuru?

Nau. Kes profesia di Bíblia é ka sô sobri futuru. Má, maioria di kes mensajen di Deus ta mostra modi ki vida di pesoas ta ben sérba. Pur izénplu, profétas di Deus txeu bês ta avizaba kes israelita na pasadu sobri kes kuza mariadu ki es ta fazeba. Kes avizu li ta mostraba kes benson ki es ta tinha na futuru si es obiba ku kes avizu i kes mau rezultadu ki es ta tinha na futuru si es ka obiba ku kes avizu. (Jeremias 25:4-6) Rezultadu ki kes israelita ta tinha ta dipendeba di kuzê ki es skodje fazeba. — Deuteronómiu 30:19, 20.

Izénplu di profesias di Bíblia ki ka ta pâpia sobri futuru

• Un bês, kes israelita pidi Deus pa djuda-s. Deus manda un proféta pa splika-s má El ka ta djudaba es pamodi es nega obi ku ses mandamentu. — Juízes 6:6-10.

• Kantu Jizus pâpia ku un samaritana, el fla-l di kuzas ki kontise ku el na pasadu. Jizus sabia di kes kuza li pamodi é Deus ki flaba el. Dipôs di kel-li, kel mudjer rekonhese ma Jizus éra un proféta sikrê el ka fazeba ninhun profesia sobri futuru. — Juan 4:17-19.

• Kantu Jizus staba ta julgadu, ses inimigu kubri-l róstu, es sota-l i es fla-l: “Si bo é un proféta, fla-nu ken ki sota-u.” Es ka staba ta fla Jizus pa faze algun profesia sobri futuru má es staba ta pidi-l pa el uza puder ki Deus da-l pa fla kenha ki sota-l. — Lukas 22:63, 64.