PERGUNTAS KI JÓVENS TA FAZE
Modi ki Bíblia pode djuda-m? — Párti 2: Bira bu leitura di Bíblia más sábi
Un jóven ki txoma Will fla: “Bíblia pode parse nfadadu, si bu ka sabe kel midjór manera di le-l.”
Bu ta gostaba di diskubri modi ki bu pode gosta di lé Bíblia? Kel artigu li ta ben djuda-u.
Bira bu leitura más sábi
Imajina kel stória ki bu sta lé. Bu pode faze kes kuza li pa djuda-u:
Skodje un stória di Bíblia ki bu ta gostaba di studa. Bu pode skodje un stória di Bíblia ô un párti di un Ivanjélhu ô bu pode skodje un stória di leituras di Bíblia dramatizadu ki sta na jw.org.
Lé kel stória. Bu pode le-l bo sô ô bu pode le-l ku vós altu ku bus amigu ô família. Un algen pode lé kes párti di narador i kes otu algen ta lé kes párti di kes personájen.
Sprimenta faze un ô más di kes kuza li:
Faze dizenhus sobri kel stória. Bu pode faze kes dizenhu pa órdi ki kel stória kontise. Skrebe kuzê ki sta kontise na kada dizenhu.
Faze tabélas. Pur izénplu, óras ki bu ta lé sobri un personájen ki éra fiel, liga kes kualidadi di kel algen i kuzas ki el faze ku bensons ki el resebe.
Bira kel stória na un notísia. Pâpia di kel stória di maneras diferenti i entrivista kes personájen prinsipal i kes otu algen ki sta na kel stória.
Imajina un fin diferenti pa un personájen ki toma un disizon mariadu. Pur izénplu, pensa na kantu Pedru nega Jizus. (Marcos 14:66-72) Modi ki Pedru pode lidaba midjór ku kel preson?
Si bu tene txeu ideia, bu pode skrebe bu drama ku bazi na kel stória di Bíblia. Pâpia di kes lison ki nu pode prende di kel stória. — Romanos 15:4.
Bu pode bira bu leitura di Bíblia más sábi!
Piskiza!
Si bu analiza kel stória tintin pa tintin, bu ta atxa kes jóia ki sta sukundidu. Na verdadi, alvês sô un ô dôs palavra na un stória di Bíblia é inportanti.
Pur izénplu, konpara Mateus 28:7 ku Marcos 16:7.
Pamodi ki Markus fla ma Jizus ka ta dura ta parseba pa se disiplus ‘i pa Pedru’?
Un ajuda: Markus ka odja kes kuza li ta kontise. Ta fika klaru ma é Pedru ki da-l kel informason li.
Jóia sukundidu: Jizus krê odjaba Pedru otu bês. Pamodi ki Pedru fika kontenti di obi kel-li? (Marcos 14:66-72) Modi ki Jizus mostra Pedru ma el éra se amigu di verdadi? Modi ki bu pode imita Jizus i ser un amigu di verdadi pa otus algen?
Óras ki bu ta bira bu leitura di Bíblia más sábi i bu ta faze piskiza, bu ta gosta mutu más txeu di lé Bíblia!