BIBLIOTÉKA NA INTERNET di Tori di Vijia

BIBLIOTÉKA NA INTERNET

di Tori di Vijia

ijwbq artigu 157
Kuzê ki Bíblia ta fla sobri dizastris na naturéza?

Respóstas pa perguntas di Bíblia

ijwbq artigu 157

Un família sta ta djobe pa ses zóna ki distruídu pamodi un dizastri na naturéza

Kuzê ki Bíblia ta fla sobri dizastris na naturéza?

Respósta di Bíblia

É ka Deus ki ta poi dizastris na naturéza ta kontise gósi, má el ta preokupa ku kes algen ki sta ta sufri pamodi es. Dizastris na naturéza é un di kes kuza ki ta pô-nu ta sufri ki Reinu di Deus ta ben kaba ku el. Timenti kel-li ka kontise, Deus sta ta konsola kes algen ki sta ta sufri pamodi dizastris na naturéza. — 2 Koríntius 1:3.

Pamodi ki nu pode ten serteza na dizastris na naturéza é ka kastigu di Deus?

Bíblia ta mostra ma na pasadu, Deus uza forsas di naturéza pa faze julgamentu. Má manera ki Deus uza kes forsa, é txeu diferenti di manera ki dizastris na naturéza ta kontise.

Dizastris na naturéza ta mata i ta prujudika tudu tipu di algen. Diferenti di kel-li, kantu Deus uza kes forsa di naturéza pa faze julgamentu, el distrui sô kes algen mau. Pur izénplu, kantu Deus distrui kes sidadi Sudoma i Gumora, el salva Ló ki éra un algen dretu i se dôs fidju-fémia. (Génesis 19:29, 30) Deus odja korason di kada un di kes algen di kel ténpu i el distrui sô kes ki el odja ma éra mau. — Génesis 18:23-32; 1 Samuel 16:7.
Normalmenti dizastris na naturéza ta kontise ku poku ô sen ninhun avizu. Má Deus ta avizaba kes algen mau, antis di el uza kes forsa di naturéza pa distrui-s. Kes algen ki obi kes avizu tevi oportunidadi di salva. — Génesis 7:1-5; Mateus 24:38, 39.
Pesoas ta kontribui pa dizastris na naturéza kontise. Di ki manera? Es ta straga naturéza i es ta konstrui na kes lugar ki é más fásil ten tremor di téra, txeia i mudansa grandi di klima. (Apokalipse 11:18) Deus é ka kulpadu pa kes disizon li ki pesoas ta toma. — Provérbios 19:3.

Dizastris na naturéza é sinal ma nu sta ta vive na ténpu di fin?

Sin, profesias di Bíblia ta mostra ma ta ben tinha dizastris na naturéza na “fin di es mundu”, ô “na ténpu di fin”. (Mateus 24:3; 2 Timótiu 3:1) Pur izénplu, Jizus fla kel-li sobri nos ténpu: “Ta ben ten falta di kumida i tremor di téra na un lugar tras di kel otu.” (Mateus 24:7) Ka ta dura, Deus ta ben kaba ku tudu kes kuza ki ta pô-nu ku dór i ta sufri, sima dizastris na naturéza. — Apokalipse 21:3, 4.

Modi ki Deus ta djuda kes algen ki sta sufri pamodi dizastris na naturéza?

Deus ta konsola-s ku se Palavra, Bíblia. Bíblia ta da-nu serteza ma Deus ta inporta ku nos i ma el ta fika tristi óras ki nu ta sufri. (Isaías 63:9; 1 Pedru 5:6, 7) Tanbê el ta mostra promésas di Deus sobri un ténpu ki dizastris na naturéza ka ta ben kontise más. — Odja: “Testus di Bíblia ki ta konsola kes algen ki sta sufri pamodi dizastris na naturéza”.
Deus ta djuda-s através di se sérvus. Deus ta uza se sérvus li na téra pa imita izénplu di Jizus. Bíblia dja flaba ma Jizus ta ben konsolaba ‘kes ki sta ku korason tristi’ i ‘kes ki sta ta txora.’ (Isaías 61:1, 2) Kes algen ki ta adora Deus ta sforsa pa faze mésmu kuza. — Juan 13:15.

Tanbê, pa djuda kes algen ki sta ta sufri pamodi dizastris na naturéza ten kes kuza ki es ta meste, Deus ta uza se sérvus. — Atus 11:28-30; Gálatas 6:10.

Tistimunhas di Jeová sta ta konpo un kaza na Portu Riku — Tistimunhas di Jeová sta ta djuda kes algen ki sufri pamodi furakon na Portu Riku

Bíblia pode djuda-nu sta priparadu pa un dizastri na naturéza?

Sin. Enbóra Bíblia ka skrebedu pa djuda-nu pripara pa dizastris na naturéza, el ten bons konsedju ki pode djuda-nu. Pur izénplu:

Faze planu antis di dizastris kontise. Bíblia ta fla: ‘Algen prudenti ta odja prigu i el ta sukundi’. (Provérbios 22:3) Óras ki nu ta faze un planu di imerjénsia antis di un dizastri kontise nu ta mostra sabedoria. Kel planu pode inklui pripara un bólsa ku kuzas pa un imerjénsia i konbina ku bu família undi ki nhos pode inkontra si kontise un dizastri.
Da más valor pa vida di ki pa kuzas material. Bíblia ta fla: “Nu ka traze nada pa mundu nen nu ka ta pode leba nada.” (1 Timótiu 6:7, 8) Nu debe sta prontu pa dexa nos kaza i kes kuza ki nu ten, asi pa nu pode skapa di un dizastri. Nu debe lenbra ma nos vida é más inportanti di ki kalker kuza material. — Mateus 6:25.

Testus di Bíblia ki ta konsola kes algen ki sta sufri pamodi dizastris na naturéza

Génesis 18:25: “Nunka [Deus] ka ta fazeba un kuza di kel-li, pa [el] mata kes algen justu djuntu ku kes algen mau... Juís di téra interu ka ta faze kel ki é justu?”

Kuzê ki kel-li krê fla: Deus sénpri ta faze kel ki é justu, i nu ka pode kulpa-l óras ki kes algen ki é dretu ta móre pamodi dizastris na naturéza.

Salmo 46:1, 2: ‘Deus é nos lugar di proteson i nos forsa, un ajuda ki ta atxadu faxi na ténpus di frónta. É pur isu ki nu ka ta ten medu, sikrê téra transforma’.

Kuzê ki kel-li krê fla: Ka ta inporta kuzê ki kontise na nos vólta, nu pode kunfia ma Deus ta djuda-nu ten forsa.

Isaías 63:9: ‘Duránti tudu ses frónta, el sufri djuntu ku es.’

Kuzê ki kel-li krê fla: Deus ta poi na nos lugar. Óras ki nu ta sufri el ta sufri djuntu ku nos.

Juan 5:28, 29: “Ta ben txiga óra ki tudu kes ki sta na sipultura ta ben obi vós [di Jizus] i es ta sai”.

Kuzê ki kel-li krê fla: Nu pode ten speransa ma nu ta torna ben odja kes algen ki nu ta ama ki dja móre, pamodi Deus ta ben da Jizus puder di da-s vida otu bês.

1 Pedru 5:6, 7: “Pur isu, nhos umilha dibaxu di mô poderozu di Deus... timenti nhos ta bota tudu nhos preokupason riba di el, pamodi el ta kuida di nhos.”

Kuzê ki kel-li krê fla: Deus ta preokupa ku nos di korason i el krê pa nu faze orason pa el sobri kes kuza ki ta pô-nu xinti preokupadu dimás.

Apokalipse 21:4: “[Deus] ta ben linpa tudu lágua di ses odju, i ka ta ben ten más mórti, nen tristéza, nen txoru nen dór. Kes kuza ki tinha antis ka ta ben ten más.”

Kuzê ki kel-li krê fla: Deus ta ben kaba ku tudu kes kuza ki ta pô-nu ta sufri, sima dizastris na naturéza.