N krê móre — Bíblia ta pode djuda-m si N sta pensa na mata kabésa?

Respósta di Bíblia

Sin! Bíblia ta ben di ‘Deus, ki ta konsola kes dizanimadu’. (2 Coríntios 7:6) Bíblia é ka un livru pa djuda algen lida ku pensamentus negativu. Má simé, dja el djuda txeu algen ki sta pensaba na mata kabésa. Kes bon konsedju ki nu ta atxa na el pode djuda-u tanbê.

• Kal ki é kes bon konsedju ki Bíblia ta da?

• Bíblia ta pâpia di algen ki krê moreba?

• Ki testus di Bíblia pode djuda-u si bu sta pensa na mata kabésa?

• I si un amigu fla: “N krê móre”?

• I si dja N kustuma tenta mata kabésa?

Kal ki é kes bon konsedju ki Bíblia ta da?

• ● Fla kuzê ki bu sta xinti.

  Kuzê ki Bíblia ta fla: ‘Un amigu di verdadi ta ama tudu óra i el é un irmon ki nase pa ténpu di frónta.’ — Provérbios 17:17.

  Kuzê ki kel testu li krê fla: Nu meste ajuda di otus algen óras ki nu sta luta kóntra kes pensamentu mariadu.

  Si bu ka konta otus algen modi ki bu sta xinti, kes pensamentu negativu pode bira un karga pizadu dimás pa bu karega. Má si bu pâpia ku un amigu, bu pode kumesa ta xinti más midjór i talvês ti bu ta konsigi odja bu situason di un manera diferenti.

  

  Tenta faze kel-li: Pâpia ku un algen oji mê, talvês un família ô un amigu di kunfiansa.a Tanbê bu pode skrebe kuzê ki bu sta xinti.

• ● Djobe ajuda na un dotor.

  Kuzê ki Bíblia ta fla: ‘Kes algen ki tene saúdi ka meste dotor, má kes ki sta duenti meste.’ — Mateus 9:12.

  Kuzê ki kel testu li krê fla: Nu debe djobe ajuda di un dotor óras ki nu sta duenti.

  Óras ki algen sta pensa na mata kabésa, kel-li é un sinal ma el ten algun prubléma ki sta afeta se manera di pensa i se sentimentu. I sima óras ki nu tene un duénsa nu ka ta xinti vergónha, tanbê nu ka debe xinti vergónha si nu tene un prubléma ki sta ta afeta nos manera di pensa i nos sentimentu. Kes tipu di duénsa li ten tratamentu.

  Tenta faze kel-li: Sin ki bu ta pode, djobe ajuda di un dotor ki sta priparadu pa djuda-u.

• ● Lenbra ma Deus ta preokupa txeu ku bo.

  Kuzê ki Bíblia ta fla: ‘Ka ta bendedu sinku pardal pa dôs muéda ki ten poku valor? Má, Deus ka ta skese di ninhun di es. Ka nhos xinti medu; nhos bale más di ki txeu pardal.’ — Lucas 12:6, 7.

  Kuzê ki kel testu li krê fla: Bu ten txeu valor pa Deus.

  Bu pode atxa ma ningen ka ta preokupa ku bus sentimentu, má Deus ta odja kuzê ki bu sta pasa. El ta preokupa ku bo, mésmu ki dja bu perde vontadi di vive. Salmo 51:17 ta fla: ‘Un korason maguadu i dizanimadu, ó Deus, bu ka ta dispreza-l.’ Deus krê pa bu vive pamodi el gosta txeu di bo.

  Tenta faze kel-li: Odja kes próva na Bíblia ki ta mostra ma Deus ta ama-u. Pur izénplu, lé kapítlu 24 di livru Achegue-se a Jeová.

• ● Faze orason.

  Kuzê ki Bíblia ta fla: ‘Nhos bota tudu nhos preokupason riba di [Deus], pamodi el ta kuida di nhos.’ — 1 Pedro 5:7.

  Kuzê ki kel testu li krê fla: Deus krê pa bu fla-l modi ki bu sta xinti di verdadi i kuzê ki tene-u preokupadu.

  Deus pode da-u pas déntu bo i forsa ki bu meste pa bu aguenta bu situason. (Filipenses 4:6, 7, 13) É di kel manera li, ki Deus ta djuda kes ki ta faze orason pa el di korason. — Salmo 55:22.

  

  Tenta faze kel-li: Faze orason pa Deus oji. Uza se nómi, Jeová, i fla-l modi ki bu sta xinti. (Salmo 83:18) Pidi-l pa el djuda-u kontinua ta luta.

• ● Pensa na speransa ki Bíblia ta da pa futuru.

  Kuzê ki Bíblia ta fla: ‘Nu ten kel speransa li, sima un ánkura pa nos vida, ki é suguru i firmi’. — Hebreus 6:19, nóta di rodapé.

  Kuzê ki kel testu li krê fla: Bus sentimentu pode muda di un óra pa kel otu. Ten óra ki bu ta sta tristi, ten óra ki bu ta sta kontenti, sima un barku ki sta ta subi ta dixi na óndias duránti un tenpistadi. Má kel speransa ki nu ta atxa na Bíblia, pode djuda-u fika firmi.

  Kel speransa li é ka un iluzon, el ten bazi na kel promésa ki Deus faze-nu ma el ta ben kaba ku tudu kes kuza ki ta pô-nu ta sufri. — Apocalipse 21:4.

  Tenta faze kel-li: Prende más sobri kel speransa ki Bíblia ta da. Lé artigu “Bu pode spera un futuru midjór”.

• ● Faze algun kuza ki bu gosta.

  Kuzê ki Bíblia ta fla: ‘Korason kontenti é un bon ramedi’. — Provérbios 17:22.

  Kuzê ki kel testu li krê fla: Óras ki nu ta faze kes kuza ki ta da-nu alegria, ta djuda-nu pensa i xinti más dretu.

  

  Tenta faze kel-li: Faze kes kuza ki bu gosta. Pur izénplu, obi kes múzika ki ta dexa-u más animadu, lé algun kuza ki ta da-u koraji ô kumesa ta faze algun tipu di atividadi ki bu gosta. Tanbê bu pode xinti más alegria si bu uza ténpu pa djuda otus algen, mésmu na kuzas pikinoti. — Atos 20:35.

• ● Kuida di bu saúdi.

  Kuzê ki Bíblia ta fla: ‘Izersísiu fíziku ten algun vantaji’. — 1 Timóteo 4:8.

  Kuzê ki kel testu li krê fla: Nu ta xinti más midjór óras ki nu ta faze izersísiu, durmi dretu i kume kes kumida ki é bon pa saúdi.

  Tenta faze kel-li: Faze un kaminhada, sikrê pa 15 minutu.

• ● Lenbra ma bus sentimentu i bu situason pode muda.

  Kuzê ki Bíblia ta fla: ‘Nhos ka sabe modi ki ta ser nhos vida manhan.’ — Tiago 4:14.

  Kuzê ki kel testu li krê fla: Un prubléma gravi, ti kel ki bu ta atxa ma ka ten soluson, pode ser pa poku ténpu.

  Pa más difísil ki bu situason pode parse oji, el pode muda manhan. Pur isu, tenta djobe manera di lida ku el. (2 Coríntios 4:8) Talvês ku ténpu kel situason difísil pode muda, má óras ki un algen mata kabésa, ka ta da pa volta pa tras.

  Tenta faze kel-li: Lé na Bíblia stória di kes algen ki fika txeu dizanimadu ki es krê moreba, i odja modi ki dipôs di algun ténpu, ses vida muda pa midjór i txeu bês di manera ki nen es ka ta pode imajinaba. Odja alguns izénplu.

Bíblia ta pâpia di algen ki krê moreba?

Sin. Bíblia ta pâpia di alguns algen ki krê moreba. Deus ka fika xatiadu ku kes algen, má el djuda-s. El pode faze mésmu kuza pa bo.

Elias

• ● El éra kenha? Elias éra un proféta korajozu. Má alvês, el tanbê el ta xintiba dizanimadu. Tiago 5:17 ta fla ma ‘Elias éra un ómi ku sentimentus sima di nos’.

• ● Pamodi ki el krê moreba? El pasa pa un situason ki el xinti el sô, ku medu i sen valor. El pidi Jeová: ‘Jeová, tra-m nha vida.’ — 1 Reis 19:4.

• ● Kuzê ki djuda-l? Elias konta Jeová tudu kuza ki el staba ta xinti. Modi ki Deus konsola-l? Deus mostra Elias ma el ta preokupaba ku el i el mostra-l ma el ten txeu puder. Deus tanbê fla Elias ma inda el tinha valor. Alén di kel-li, Deus ranja Elias un ajudanti bondozu.

• ▸ Lé sobri Elias: 1 Reis 19:2-18.

Jó

• ● El éra kenha? Jó éra riku i xéfi di un família grandi ki ta adoraba Deus.

• ● Pamodi ki el krê moreba? Vida di Jó muda di un óra pa kel otu i txeu kuza mariadu kontise ku el. El perde tudu se rikéza. Tudu se fidjus móre na un dizastri. I el panha un duénsa gravi. Dipôs di tudu kel-li, es faze un akuzason falsu i gravi kóntra Jó. Es fla ma el éra kulpadu pa tudu kes kuza mariadu ki kontise ku el. Jó fla: ‘N ta ôdia nha vida, N ka krê kontinua ta vive.’ — Jó 7:16.

• ● Kuzê ki djuda-l? Jó faze orason pa Deus i tanbê el pâpia ku otus algen. (Jó 10:1-3) Un di se amigu ki txomaba Eliú, nkoraja-l i trata-l ku bondadi. Kel-li djuda Jó odja se situason di un otu manera. Má más inportanti inda, Jó seta kel ajuda i konsedju ki Deus da-l.

• ▸ Lé sobri Jó: Jó 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Muizés

• ● El éra kenha? Muizés éra líder di povu di Israel na ténpu antigu i el éra un proféta fiel.

• ● Pamodi ki el krê moreba? Muizés tinha txeu trabadju pa faze, sénpri es ta kritikaba el i el sta xintiba kansadu dimás. Pur isu el pidi Deus: ‘Favor, mata-m gósi li.’ — Números 11:11, 15.

• ● Kuzê ki djuda-l? Muizés konta Deus modi ki el staba ta xinti. Deus parti trabadju di Muizés i kel-li pô-l ta fika ménus preokupadu.

• ▸ Lé sobri Muizés: Números 11:4-6, 10-17.