Kuzê ki Bíblia ta fla sobri kuida di pai ku mai ki dja sta grandi?

Respósta di Bíblia

Kes fidju adultu ten responsabilidadi di kuida di ses pai ku mai ki dja sta grandi. Bíblia ta fla ma kes fidju adultu debe ‘prende faze adorason pa Deus na ses própi família i paga ses pai ku ses mai, pamodi kel-li é un kuza ki Deus ta atxa ma é dretu.’ (1 Timóteo 5:4) Óras ki fidjus ta faze tudu ki es pode pa kuida dretu di ses pai ku mai, es sta ta obi ku kel órdi ki sta na Bíblia, di da onra pa ses pai ku mai. — Efésios 6:2, 3.

Bíblia ka ta da instruson klaru di modi ki un algen pode kuida di se pai ku mai ki dja sta grandi. Má, nu ta atxa izénplus na Bíblia di ómis ku mudjeris di fé ki faze kel-li. Tanbê, el ta da konsedjus ki ta djuda kes algen ki sta kuida di ses pai ku mai ki dja sta grandi.

• Modi ki alguns algen kuida di ses pai ku mai na ténpu ki Bíblia skrebedu?

• Ki konsedjus Bíblia ta da pa djuda kes ki sta kuida di ses pai ku mai?

• É eradu poi pai ku mai na un lugar ki es ta kuida di algen grandi?

Modi ki alguns algen kuida di ses pai ku mai na ténpu ki Bíblia skrebedu?

Es faze kel-li di txeu manera i sima ses situason ta daba.

• Juzé ta moraba lonji di se pai, Jakó, ki dja staba algen grandi. Má lógu ki el konsigi, el djuda se pai muda pa pértu di el. Juzé da-l kaza pa el mora, kumida i el kuida di el. — Génesis 45:9-11; 47:11, 12.

• Ruti muda di país pa el kontinua djuntu ku se sógra i el trabadja duru pa kuida di el. — Rute 1:16; 2:2, 17, 18, 23.

• Jizus, un kuzinha antis di el móre, el ranja un algen pa kuida di se mai, Maria, ki talvês dja éra viúva. — João 19:26, 27.a

Ki konsedjus Bíblia ta da pa djuda kes ki sta kuida di ses pai ku mai?

Alvês é ka fásil kuida di pai ku mai ki dja sta algen grandi. Má, Bíblia ten prinsípius ki ta djuda kes ki sta faze kel-li.

• Onra bu pai ku bu mai.

  Kuzê ki Bíblia ta fla: ‘Onra bu pai ku bu mai’. — Êxodo 20:12.

  Modi ki nu pode aplika kel prinsípiu li? Bu ta mostra ma bu ta da ónra pa bu pai ku bu mai óras ki bu ka ta tenta kontrola tudu kuza na ses vida. Sénpri ki ta da, dexa-s disidi modi ki es krê pa kuida di es. I tanbê, bu ta mostra ma bu ta da-s ónra, óras ki bu ta faze tudu kel ki bu pode pa djuda-s.

• Tenta ntende-s i sabe púrdua.

  Kuzê ki Bíblia ta fla: ‘Ntendimentu di un ómi ta pô-l ka ta xatia faxi, i é un kuza bunitu di se párti dexa un ofénsa pasa.’ — Provérbios 19:11.

  Modi ki nu pode aplika kel prinsípiu li? Si bu pai ô bu mai fla algun kuza ki magua-u ô ta parse ma es ka sta ta da valor pa kes kuza ki bu ta faze pa es, pergunta bu kabésa: ‘Modi ki N ta xintiba si N staba ta pasa pa mésmu situason?’ Óras ki bu ta tenta ntende-s i purdua-s, bu ta ivita pa situason piora.

• Pâpia ku otus algen.

  Kuzê ki Bíblia ta fla: ‘Planus ta fadja óras ki ka ten kumunikason, má ku konsedju di txeu algen ta ten bons rezultadu.’ — Provérbios 15:22.

  Modi ki nu pode aplika kel prinsípiu li? Faze piskiza pa bu odja modi ki bu pode lida ku prublémas di saúdi di bu pai ku bu mai. Djobe si na undi bu ta mora ten algun ajuda ki bu pode resebe di govérnu pa bu pode kuida di es. Pâpia ku otus algen ki ten spiriénsia na kuida di ses pai ku ses mai ki dja sta grandi. Si bu ten irmons, nhos pode faze un runion di família pa pâpia di kuzas ki nhos pai ku nhos mai meste i kuzê ki kada un di nhos pode faze pa djuda-s.

  

• Rekonhese bus limitason.

  Kuzê ki Bíblia ta fla: ‘Sabedoria sta ku kes algen ki é modéstu.’ — Provérbios 11:2.

  Modi ki nu pode aplika kel prinsípiu li? Rekonhese bus limitason. Lenbra ma nen sénpri bu ka ta ten ténpu i forsa pa bu faze tudu kel ki bu ta gostaba pa bu pai ku bu mai. Si bu sta xinti txeu kansadu ku kel responsabilidadi li, pidi otus algen na família pa djuda-u ô djobe otu tipu di ajuda.

• Kuida dretu di bo.

  Kuzê ki Bíblia ta fla: ‘Ninhun ómi nunka ka ôdia se própi korpu; má, el ta da-l kumida i el ta kuida di el’. — Efésios 5:29.

  Modi ki nu pode aplika kel prinsípiu li? Mésmu ki bu ten responsabilidadi di kuida di bu pai ku bu mai, tanbê bu ten ki kuida di bo i di bu família si bo é kazadu. Bu meste kume dretu, tra ténpu pa diskansa i durmi dretu. (Eclesiastes 4:6) I sénpri ki bu pode, tra ténpu pa bu divirti. Si bu faze si, bu ta konsigi kuida di es di midjór manera.

É eradu poi pai ku mai na un lugar ki es ta kuida di algen grandi?

Bíblia ka ta da un orientason klaru sobri na undi ki pai ku mai debe kuidadu di es. Alguns família ta disidi kuida di ses pai ku ses mai ki dja sta grandi, na kaza di pai ku mai ô na ses própi kaza. Otus ta atxa ma é midjór pô-s na kes lugar ki ta kuidadu di algen grandi. Kada família ten ki disidi kel ki é midjór pa es. — Gálatas 6:4, 5.