PERGUNTAS KI JÓVENS TA FAZE
Modi ki N pode pâpia ku nha pai ku nha mai sobri ses régras?
“Kantu ki N tinha 15 anu N ta konkordaba ku régras di nha pai ku nha mai. Má gósi ki N tene 19 anu N ta xinti ma N debe tinha más liberdadi.” — Sylvia.
Bu ta xinti sima Sylvia? Si bu ta xinti si, kel artigu li ta ben djuda-u pâpia ku bu pai ku bu mai sobri kel asuntu li.
Kuzê ki bu debe sabe
Antis di bu pâpia ku bu pai ku bu mai sobri ses régras, pensa na kes pontu li:
Vida sen régras ta traze txeu prubléma. Pensa na un strada txeu movimentadu. Kuzê ki pode kontise si ka tinha ninhun sinal, nen simafru i nen limiti di velosidadi? Régras di bu kaza é sima régras di strada. Es ta poi tudu kuza fika organizadu.
Régras ta prova ma bu pai ku bu mai ta preokupa ku bo. Si es ka kria ninhun régra, pode parse ma es ka ta preokupa ku kuzê ki pode kontise ku bo. Ki tipu di pai ku mai ki es é nton?
BU SABIA? Pai ku mai tanbê ten ki obidese régras! Si bu ten dúvida, lé Génesis 2:24; Deuteronómio 6:6, 7; Efésios 6:4; i 1 Timóteo 5:8.
Má simé, si bu kontinua ta xinti ma régras di bu pai ku bu mai é injustu, kuzê ki bu pode faze?
Kuzê ki bu pode faze
Pensa antis di bu pâpia ku bu pai ku bu mai. Bu ta kustuma obi ku régras di bu pai ku bu mai? Si bu ka ta kustuma obi, nton gósi é ka óra di bu pidi más liberdadi. Envês di kel-la, odja artigu, “O que posso fazer para os meus pais confiarem em mim?”, na purtugês.
Si bu ta kustuma obi, pripara kuzê ki bu ta gostaba di fla bu pai ku bu mai. Antis di bu pâpia ku es, pensa i skrebe sobri kel ki bu krê fla-s. Kel-li ta djuda-u odja si kel ki bu krê pergunta ta faze sentidu ô nau. Dipôs, pidi bu pai ku bu mai pa skodje un óra ku un lugar ki nhos tudu ta sta sábi i avontádi. Nton, óras ki bu ta pâpia ku bu pai ku bu mai, lenbra di kes pontu li:
Mostra ruspetu. Bíblia ta fla: ‘Un palavra duru ta omenta raiba.’ (Provérbios 15:1) Nton, lenbra ma si bu diskuti ku bu pai ku bu mai ô si bu akuza-s ma es sta ta ser injustu, nhos konbérsu ta kaba faxi.
“Óras ki N mostra más ruspetu pa nha pai ku nha mai, es ta mostra-m más ruspetu tanbê. Óras ki nu ta ruspeta kunpanheru, ta fika mutu más fásil di nu txiga un konkluzon.” — Bianca, 19 anu.
Obi. Bíblia ta fla-nu ma nu debe ‘sta prontu pa obi, má nu ka debe pâpia faxi’. (Tiago 1:19) Lenbra ma bu sta ta pâpia ku bu pai ku bu mai, kel-li krê fla ma bu ka debe pâpia un bês bai, má tanbê bu debe obi-s.
“Sima nu ta ba ta kria, nu pode xinti sima si nu sabe más di ki nos pai ku nos mai, má kel-li é kasí. Nu ta faze dretu si nu obi ses konsedju.” — Devan, 20 anu.
Poi na ses lugar. Tenta ntende manera ki bu pai ku bu mai ta pensa. Sigi kel konsedju di Bíblia ki ta fla: ‘Ka nhos djobe sô nhos própi interesi, má tanbê interesi di otus.’ É kel-li ki bu debe faze ku bu pai ku bu mai. — Filipenses 2:4.
Kal di kes pontu li ki bu ta atxa ma ta djuda-u pâpia ku bu pai ku bu mai?
“N ta kustumaba ta pensa ma nha pai ku nha mai éra kóntra mi, ma es ka ta apoiaba mi. Má gósi dja N ntende ma es staba ta tenta ser bon pai ku mai, sima ami tanbê N staba ta prende ser un adultu responsável. Tudu kel ki es faze éra pamodi es ta preokupaba ku mi.” — Joshua, 21 anu.
Da sujistons. Pur izénplu, imajina ma bu pai ku bu mai kria un régra: es ka krê pa bu bai un konvíviu ki ta kaba noti dimás. Tenta diskubri si es ka krê pa bu bai pamodi óra ki kel konvíviu ta kaba ô pamodi kel konvíviu.
Si é pamodi óra ki konvíviu ta kaba, es pode muda di opinion si bu bai djuntu ku otu algen?
Si é pamodi kel konvíviu, bu pode fla-s kenha ki sta ta bai i kenha ki ta toma kónta di kel konvíviu pa es pode fika más trankilu?
Lenbra ma bu debe pâpia ku es ku ruspetu i obi ku paxénxa kuzê ki es tene pa fla-u. Mostra ma bu ta ‘onra bu pai ku bu mai’ pa kuzas ki bu ta fla i pa bu manera di konporta. (Efésios 6:2, 3) Es ta muda di opinion? Talvês sin, talvês nau. Ô es muda ses opinion ô nau, bu debe. . .
Seta ku ruspetu disizon di bu pai ku bu mai. Txeu bês ka ta dadu kónta, má kel pasu li é inportanti pa djuda bu pai ku bu mai da-u más liberdadi. Si bu ka konsigi kel ki bu krê i bu kumesa ta diskuti ku bu pai ku bu mai, prósimu bês ki nhos pâpia ta fika más difísil pa es da-u más liberdadi. Má, si bu obi-s sen rasmunga, ku ténpu, es pode da-u más liberdadi.