Ajuda ki dadu duránti dizastris ki kontise na 2021 — Nos irmons ku irmans ka bandonadu

Duránti anu di sirvisu di 2021,a mundu interu kontinua ta sufri pamodi koronavírus. Sima sta na kel artigu “Ajuda ki dadu na mundu interu na ténpu di koronavírus”, nu gasta milhons di dólab pa djuda duránti koronavírus i nu forma más di 950 Kumison di ajuda na ténpu di dizastri.

Timenti koronavírus staba ta poi txeu algen ta sufri, kontise dizastris na naturéza, i otus dizastris ki ómis ki provoka, ki afeta nos irmons ku irmans na mundu interu. Kumison di Kordenadoris di Grupu Enkaregadu di Óbra aprova pa uzadu 8 milhon di dóla (uns 780 mil kontu na dinheru di Kabu Verdi), pa djuda na kes más di 200 dizastri, alén di kel ki dja staba aprovadu pa djuda duránti koronavírus. Nu ben odja modi ki uzadu nhos kontribuison pa djuda kes ki fika afetadu na dôs dizastri ki kontise ka dura li.

Erupson di vulkon Nyiragongo

Na 22 di maiu di 2021, vulkon Nyiragongo, ki ta fika na Kongu (Kinxasa), entra na erupson. Lava di es vulkon distrui kazas, skólas i un tanki di agu. Má kel lava ka éra úniku prubléma. Duránti uns dia dipôs di erupson, un puera prigozu di vulkon toma kónta di sidadi di Goma i kontise txeu tremor di téra. Más di metadi di algen tevi ki dexa kel sidadi. Senténas di milharis di algen fuji i alguns di es bai pa Ruanda, un país ki ta fika la pértu.

Di kes algen ki tevi ki dexa ses kaza, uns 5 mil éra Tistimunha di Jeová. Pamodi erupson, alguns algen perde ses kaza. I otus algen, dipôs ki es sai, es furtadu na ses kaza. Kes Kumison di ajuda na Ruanda i na Kongu (Kinxasa) organiza kes ajuda. Filial di Kongu (Kinxasa) fla kel-li sobri un di kes Kumison di ajuda: “Sikrê ku situason difísil na sidadi i mésmu antis di fladu ma tudu algen tinha ki sai di la, Kumison di ajuda kumesa ta distribui kumida, agu, ropa i lansol.” Na un sidadi ki tinha más di 2 mil di nos irmons djuntadu, un di kes Kumison di ajuda arma téndas, es distribui maskras i es splika-s kuzê ki es devia fazeba pa es ka panha koronavírus i kólera.

Dipôs di três mês ki dizastri kontise, nos irmons dja distribuiba más di 6 tonelada di arôs, 6 tonelada di farinha di midju, três tonelada di óliu i três tonelada di agu. Pa popa dinheru, Filial kunpra txeu kuantidadi di kumida la mê na kel lugar, pamodi ta fikaba más karu si es mandaba kumida pa la.

Un irman ki se kaza distruídu pamodi erupson, fla: “Nu staba txeu dizanimadu i ta sufri txeu.” Má, dipôs ki se família resebe ajuda material i spritual, el fla: “Ku ajuda di Jeová, inda nu tene kel ki nu meste. Nu odja ma Jeová ta karega nos karga i asi ta bira más fásil nu lida ku es.”

Prubléma di dinheru na Venezuela

Dja ten txeu anu ki Venezuela sta ta ten prubléma di dinheru. Nos irmons sta ta aguenta sikrê ku situason difísil di vida, falta di kumida i violénsia, ki sta ta omenta kada bês más txeu. Má simé, organizason di Jeová ka bandona-s.

Duránti últimu anu di sirvisu, gastadu más di 1,5 milhon di dóla (uns 146 mil kontu na dinheru di Kabu Verdi) pa kunpra i pa manda kumida i sabon pa kes família ki mesteba. Filial di Venezuela fla: “É ka fásil leba 130 tonelada di kumida pa kes kuatu kantu di país tudu mês i dipôs ntrega-s pa kes irmon ki ten más nisisidadi.” Pa ten sertéza ma kes kumida ka ta straga faxi, irmons ta manda kes kumida ki ta dura ki pasa prazu. Filial inda fla: “Nu kunpra txeu kuantidadi di kumida i duránti ténpu di kodjéta pamodi ta sta más baratu i dipôs nu manda-s di un manera ki ta fikaba más baratu tanbê.”

Leonel, ki ta faze párti di Kumison di ajuda na ténpu di dizastri na Venezuela i ki gosta txeu di se trabadju, fla: “Kel trabadju di djuda li é spesial. Kel trabadju li sta ta djuda-m txeu désdi ki nha mudjer ki N krê txeu móre pamodi koronavírus. N ta mante okupadu i N ta xinti ma N sta ta djuda irmons ki más meste di ajuda. N sta ta odja modi ki Jeová ta kunpri se promésa di ka bandona se povu.”

Un irmon ki antis ta fazeba párti di Kumison di ajuda na ténpu di dizastri i ki gósi resebe ajuda, fla: “Gósi éra mi ki staba ta meste di ajuda. Má nu ka resebe sô ajuda material. Irmons djuda-m mi ku nha mudjer mante kalmu. Es kuida di nos, es konsola-nu i es nkoraja-nu.”

Alguns dizastri ta kontise dirapenti. Má, organizason di Jeová ta konsigi manda ajuda faxi pamodi kes kontribuison ki nhos ta faze pa óbra na mundu interu. Alguns di kes kontribuison li ta fazedu na donate.jw.org. Obrigadu di korason pa kes kontribuison ki nhos ta faze ku amor.