Primeru livru di Krónikas
26 Kel-li é lista di kes grupu di porteru. Di kes disendenti di Korá, staba Mezelemias, fidju di Koré. Mezelemias éra disendenti di Azafe. 2 Kes-li é kes fidju di Mezelemias: primeru éra Zakarias, sugundu éra Jediael, tirseru éra Zebedias, kuartu éra Jatniel, 3 kintu éra Elan, sestu éra Jeoanan i sétimu éra Elioenai. 4 Kes-li éra kes fidju di Obede-Edon: primeru éra Semaías, sugundu éra Jeozabade, tirseru éra Joá, kuartu éra Sakar, kintu éra Netanel, 5 sestu éra Amiel, sétimu éra Isakar i oitavu éra Peuletai. Deus abênsua Obede-Edon ku tudu kes fidju li.
6 Semaías, fidju di Obede-Edon, tevi fidjus ki éra fórti i ki tinha kapasidadi. Tudu es éra xéfi di ses grupu di família. 7 Kes fidju di Semaías éra Otni, Refael, Obede i Elzabade. Eliú i Semakias, ki éra família di Elzabade, tanbê éra ómis ki tinha kapasidadi. 8 Tudu kes ómi li éra família di Obede-Edon. Es, ses fidju i kes otu ómi di ses família,* éra ómis ki tinha kapasidadi i ki staba kualifikadu pa faze kes trabadju ki es dadu. Tudu kes ómi li éra família di Obede-Edon, es éra 62. 9 I kes fidju i kes família di Mezelemias éra 18. Tudu es éra ómis ki tinha kapasidadi. 10 Oza éra disendenti di Merari. Kes-li éra kes fidju di Oza: Sinri éra xéfi (enbóra el ka éra primeru fidju, se pai skodje-l pa el ser xéfi). 11 Ilkias éra sugundu, Tebalias éra tirseru, Zakarias éra kuartu. Kes fidju i kes família di Oza éra 13.
12 Tudu kes xéfi di kes grupu di porteru debe sirbiba na kaza di Jeová, sima kes otu ómi di ses família. 13 Nton, es bota sórti pa disidi na ki porton ki kada família ta sirbiba. Es faze kel-li ku kes família grandi i ku kes família pikinoti. 14 Pa guarda ladu lésti, sórti kai na Selemias. Dipôs es lansa sórti pa se fidju Zakarias. El éra un ómi ki éra bon na da konsedju, i el resebe ladu nórti. 15 Pa guarda entrada di ladu sul, sórti kai na Obede-Edon, i ses fidju skodjedu pa toma kónta di kes armazén. 16 Pa guarda entrada di ladu oésti, pértu di Porton Salekete, djuntu di entrada ki ta bai pa riba, sórti kai na Supin i Oza. Un grupu di guarda ta fikaba na ladu di kel otu grupu di guarda. 17 Na entrada pa ladu lésti, ta staba 6 levita, i tudu dia ta staba kuatu levita pa ladu nórti i kuatu pa ladu sul. Na kes armazén, ta fikaba dôs guarda pértu di kes otu dôs. 18 Na pórtiku, pa ladu oésti, ta staba kuatu levita pértu di strada i ta staba dôs pértu di pórta. 19 Kes-li éra kes grupu di porteru di kes disendenti di Korá i di kes disendenti di Merari.
20 Di kes levita tanbê staba Aías. Aías éra enkaregadu di kes sala di tizoru na kaza di Deus verdaderu i di kes armazén di kes tizoru ki santifikadu.* 21 Kes-li éra disendenti di Ladan, disendenti di Jérson. Es éra xéfi di ses grupu di família ki éra disendenti di Ladan, kel jersonita. Tinha Jeieli 22 i ses fidju Zeton i Juel. Juel éra irmon di Zeton. Tudu es éra enkaregadu di kes sala di tizoru na kaza di Jeová. 23 Di kes disendenti di Anron, di Izar, di Ebron i di Uziel, 24 tinha Sebuel, disendenti di Jérson. Jérson éra fidju di Muizés. Sebuel éra enkaregadu di kes armazén. 25 Tanbê tinha kes família li di Sebuel, i tudu es éra disendenti di Eliézer: Reabias, fidju di Eliézer; Jezaías, fidju di Reabias; Joran, fidju di Jezaías; Zikri, fidju di Joran; i Selomote fidju di Zikri. 26 Kel Selomote li i ses família* éra enkaregadu di tudu kes tizoru ki santifikadu. Kes-li éra kes kuza ki rei Davidi, kes xéfi di kes grupu di família, kes xéfi di mil, kes xéfi di 100 i kes xéfi di trópa santifika. 27 Es panha un párti di kes kuza ki es tomaba na géra i es bira-s sagradu, asi pa es uzaba es pa konpo kaza di Jeová. 28 Alén di kel-li, tanbê tinha kes kuza ki Samuel, kel videnti;* Saul, fidju di Kis, Abner, fidju di Ner, i Joabe, fidju di Zeruia, santifikaba. Selomite i ses família ta tomaba kónta di tudu kes kuza ki santifikadu.
29 Kenanias i ses fidju, ki éra disendenti di Izar, skodjedu pa kuida di otus responsabilidadi fóra di kaza di Deus. Es éra funsionáriu i juís na Israel.
30 Di kes disendenti di Ebron, tinha Azabias i ses família. Es éra 1.700 ómi ki tinha kapasidadi. Es éra responsável pa Israel, na zóna oésti di riu Jurdon, i es ta kuidaba di tudu trabadju na kaza di Jeová i na kaza di rei. 31 Jerias éra xéfi di kes disendenti di Ebron di akordu ku lista di família. Na anu ki Davidi ta fazeba 40 anu ta governa, fazedu un piskiza, i atxadu na meiu di kes disendenti di Ebron, ómis fórti i ki tinha kapasidadi, na Jazer, na téra di Jiliade. 32 Na família di Jerias tinha 2.700 ómi ku kapasidadi. Es éra xéfi di ses grupu di família. Rei Davidi da-s autoridadi riba di tribu di Ruben, di tribu di Gade i di metadi tribu di Manasés. Es ta kuidaba di tudu kes asuntu di Deus verdaderu i di rei.