Dja bu kustuma xinti gana di lé Bíblia, má dipôs bu dizanima pamodi bu xinti sima Jovy, Queennie i Ezekiel? Txeu algen ta atxa ma nunka es ka ta konsigi lé Bíblia. Má, i si bu diskubri ma Bíblia pode djuda-u ten un vida más sábi i más filís? I si bu atxa alguns manera di lé Bíblia ki ta poi kel leitura más sábi? Bu ta fikaba ku gana di odja kuzê ki Bíblia ten pa fla-u?

Alguns algen kumesa ta lé Bíblia i es atxa-l sábi. Odja kuzê ki alguns di es fla.

Ezekiel, ki ten 20 i poku anu, fla: “Un bês, N ta staba sima un algen ta konduzi un karu sen rumu sértu. Má lé Bíblia djuda-m ten un obijetivu na vida. El ten txeu konsedju ki N pode uza na nha dia-dia.”

Frieda, ki ten 20 i tal anu, fla: “N ta xatiaba faxi. Má kel ki N lé na Bíblia, djuda-m kontrola nha kabésa. Pur isu, gósi N ta da más dretu ku otus algen i N ten más amigus.”

Eunice, ki sta na kaza di 50 anu, fla kel-li sobri Bíblia: “El sta ta djuda-m bira un algen más midjór i muda alguns ábitu mariadu.”

Leitura di Bíblia djuda milhons di algen midjora ses vida i el pode djuda-u midjora bu vida tanbê. (Isaías 48:17, 18 ) Pur izénplu, el pode djuda-u (1) toma bons disizon, (2) faze amigus di verdadi, (3) lida ku preokupasons (4) i más inportanti inda, prende verdadi sobri Deus. Konsedjus ki sta na Bíblia ben di Deus, nton si bu sigi-s, sénpri bu ta ten bons rezultadu. Deus nunka ka ta da un konsedju mariadu.

Más inportanti é kumesa lé Bíblia. Kuzê ki pode djuda-u kumesa di un manera ki ta pô-u ta gosta di lé Bíblia?

Kuzê ki pode djuda-u gosta di lé Bíblia i tra más pruvetu ki bu pode? Odja sinku manera ki djuda monti algen.

Ranja un anbienti ki ta djuda-u konsentra. Djobe un lugar kétu, ki ka ten kuza ki pode distrai-u. Lé Bíblia na un lugar klaru i frésku pode djuda-u tra más pruvetu di bu leitura.

Pripara bu menti. Bíblia é un livru ki nos Pai na Séu da-nu, pur isu óras ki bu ta lé Bíblia bu meste ser sima un mininu ki gosta di obi se pai ta konta stória. Si bu tene ideias mariadu sobri Bíblia sforsa pa bu ka konsentra na es. Asi bu ta dexa Deus inxina-u — Salmo 25:4.

Faze orason antis di bu lé Bíblia. Kes kuza ki sta na Bíblia é pensamentus di Deus, pur isu nu meste se ajuda pa nu ntende kel ki nu sta lé. Deus promete ma el ta da ‘spritu santu pa kes ki pidi-l.’ (Lucas 11:13 ) Spritu santu pode djuda-u ntende pensamentus di Deus. Ku ténpu, el pode djuda-u ntende ti ‘kes kuza más profundu di Deus.’ — 1 Coríntios 2:10.

Sforsa pa bu ntende kuzê ki bu sta lé. Ka bu lé sô pa lé. Pensa na kuzê ki bu sta lé. Faze bu kabésa kes pergunta li: ‘Kuzê ki N pode prende di kualidadis di kel personájen di Bíblia li? Modi ki N pode aplika kel-li na nha vida?’

Poi métas pa bu kabésa. Pa bu leitura di Bíblia bira más sábi, sforsa sénpri pa bu prende algun kuza ki ta djuda-u na bu vida. Bu pode poi métas sima kes-li: ‘Prende más sobri manera di ser di Deus, bira un algen midjór, talvês un bon maridu ô un bon mudjer.’ Dipôs, skodje pártis di Bíblia ki pode djuda-u alkansa kes méta li.a

Kes sinku manera li pode djuda-u kumesa bu leitura. Má modi ki bu pode bira bu leitura más sábi inda? Kel otu artigu ta ben da-u alguns ideia.

Bu sta ta gosta di lé Bíblia? Ô sta ta ser nfadadu? Ta dipende txeu di modi ki bu sta ta lé. Nu ben odja kuzê ki bu pode faze pa bira bu leitura di Bíblia más sábi.

Skodje un traduson di kunfiansa i fásil di ntende. Si bu sta lé algun kuza ki ten txeu palavra difísil ô ki ka sta uzadu más i ki bu ka konxe, é difísil bu gosta di kuzê ki bu sta lé. Nton djobe un Bíblia ki é fásil di ntende i ki ta toka bu korason. Má djobe un traduson izatu i di kunfiansa.a

Uza tekinolojia. Na nos ténpu, Bíblia sta ka sô na papel, má tanbê na formatu dijital. Bu pode lé Bíblia na internet ô diskarega-l pa bu lé dipôs na konputador, tablet, ô telemóvel. Alguns traduson di Bíblia ten kuza di faze piskiza ki ta dexa-u atxa faxi otus versíklu di Bíblia ki ta pâpia di mésmu asuntu ô ti konpara txeu traduson di Bíblia. Si bu ta krê obi envês di lé, tanbê ten leitura di Bíblia gravadu. Txeu algen gosta di obi leitura di Bíblia timenti es sta na transpórti pa públiku, ta faze algun kuza déntu kaza ô ta faze algun otu trabadju ki ta dexa-s obi. Pamodi ki bu ka ta sprimenta un di kes sujiston li?

Uza kes feraménta pa studa Bíblia. Kes feraménta pa studa Bíblia pode djuda-u gosta más txeu di lé Bíblia. Ten mapas di kes téra ki Bíblia ta pâpia di el, ki ta djuda-u odja na undi ki kes kuzas ki bu sta lé kontise. Artigus sima kes ki sta na kel revista li ô na pártis “Ensinus di Bíblia” na site jw.org pode djuda-u ntende kuzê ki txeu pártis di Bíblia siginifika.

Muda manera di lé. Si ta parse ma bu ka ta konsigi lé Bíblia di komésu pa fin, pamodi ki bu ka ta kumesa lé un párti ki ta bu gosta más txeu? Pur izénplu, bu pode lé sobri kes algen ki Bíblia ta pâpia txeu di es. Un izénplu di modi ki bu pode faze kel-li sta na kuadru “Konxe midjór kes algen ki Bíblia ta pâpia txeu di es.” Ô talvês bu ta krê lé Bíblia asuntu pa asuntu ô pa órdi ki kes kuza kontise. Pamodi ki bu ka ta sprimenta un di kes sujiston li?

Bíblia é un livru spesial. El ten konsedjus di nos Kriador pa nos. (2 Timóteo 3:16) Se mensaji ta djuda-nu txeu. Pur isu, Bíblia ta fla: ‘Palavra di Deus é bibu i el ten puder’. (Hebreus 4:12) Bíblia ten puder di midjora nos vida di dôs manera inportanti. El ta da-nu konsedjus ki ta djuda-nu na nos dia-dia i el ta djuda-nu konxe Deus i se promésas. — 1 Timóteo 4:8; Tiago 4:8.

Bíblia ta da-u konsedjus ki ta djuda-u na bu dia-dia. Bíblia pode djuda-nu lida ku prublémas. El ta da bons konsedju na asuntus sima kes li:

• Modi ki nu pode da dretu ku otus algen. — Efésios 4:31, 32; 5:22, 25, 28, 33.

• Modi ki nu pode ten bon saúdi i kontrola nos sentimentu. — Salmo 37:8; Provérbios 17:22.

• Modi ki nu pode sabe kuzê ki é dretu i mariadu. — 1 Coríntios 6:9, 10.

• Modi ki nu pode sustenta nos kabésa. — Provérbios 10:4; 28:19; Efésios 4:28.a

Odja izénplu di un kazal jóven na Ázia ki ta da txeu valor pa kes konsedju di Bíblia. Sima ta kustuma kontise na komésu di txeu kazamentu, ka foi fásil pa es konsigi pâpia klaru ku kunpanheru i intende manera di ser di kunpanheru. Má kuzê ki djuda-s? Es kumesa ta sigi kes konsedju di Bíblia. Vicent fla: “Kel ki N lé na Bíblia djuda-m mostra amor óras ki nu ta tinha prublémas na kazamentu. Nos vida bira más filís dipôs ki nu kumesa ta aplika kes konsedju di Bíblia.” Se mudjer, ki txoma Annalou, ta konkorda ku el. El fla: “Kes izénplu di Bíblia djuda-nu txeu. Gósi, N sta más filís i N sta kontenti ku nos kazamentu i ku kes méta ki nu ten na nos vida.”

Bíblia ta djuda-u konxe Deus. Vicent fla: “Leitura di Bíblia sta ta djuda-m xinti mutu más amigu di Jeová di ki antis.” Sima kontise ku Vicent, sigi kes konsedju di Bíblia pode djuda-u ten un vida más midjór i bira más amigu di Jeová. Tanbê, bu ta prende más sobri kel ‘vida di verdadi’ i modi ki bu pode konsigi ten kel vida li pa tudu ténpu. (1 Timóteo 6:19) Kel-li é un kuza ki nu ka ta atxa na ninhun otu livru.

Abo tanbê bu pode midjora bu vida gósi i prende más sobri Deus. Má pa kel-li kontise, bu meste lé Bíblia i ka dizisti. Óras ki bu ta le-l, bu pode kumesa ta ten alguns dúvida. Kel-li tanbê kontise ku un ómi ki vive dja ten uns 2000 anu. El éra un ómi inportanti di Itiópia ki tinha dúvida sobri kuzê ki el staba ta lé na Bíblia. Kantu Filipi, ki éra disiplu di Jizus, pergunta-l si el sta intendeba kuzê ki el staba ta lé, el fla: ‘Na verdadi, modi ki N pode intende si ningen ka inxina-m?’ Nton, el seta ajuda di Filipi, ki konxeba Bíblia dretu. (Atos 8:30, 31, 34) Lenbra di izénplu di kel ómi óras ki bu tene un dúvida. Pa bu sabe más sobri Bíblia, prenxe un pididu di studu di Bíblia na jw.org. Tanbê, bu pode pâpia ku un Tistimunha di Jeová ô vizita un Salon di Reinu na lugar undi bu ta mora. Nton, pega na un Bíblia oji mê i dexa-l djuda-u ten un vida más midjór!