Tistimunhas di Jeová ta sipara ô ta uni famílias?

Kómu Tistimunhas di Jeová, nu ta sforsa pa nos família i família di otus algen, sta unidu. Nu ta ruspeta Deus, kel ki kria família. (Génesis 2:21-24; Efésios 3:14, 15) Na Bíblia, el ta inxina-nu prinsípius ki dja djuda pesoas na mundu interu ten un kazamentu filís.

Modi ki Tistimunhas di Jeová ta djuda famílias ser más unidu?

Nu ta sforsa txeu pa nu sigi kes konsedju di Bíblia, pamodi es ta djuda-nu ser un maridu, un mudjer ô un pai ku mai midjór. (Provérbios 31:10-31; Efésios 5:⁠22–6:4; 1 Timóteo 5:8) Kes bon konsedju ki nu ta atxa na Bíblia, pode djuda ti kes algen di mésmu família ki ten relijion diferenti. (1 Pedro 3:1, 2) Odja kuzê ki alguns algen fla kantu ses maridu ô ses mudjer bira Tistimunha di Jeová:

• “Na nos primeru 6 anu di kazadu éra sô géra i diziluzon. Dipôs ki Ivete bira un Tistimunha di Jeová, el pasa ta mostra más paxénxa i amor. Kes mudansa ki el faze salva nos kazamentu.” — Clauir di Brazil.

• “Kantu Chansa, nha maridu, kumesa ta studa Bíblia ku Tistimunhas di Jeová N ka gostaba nada, pamodi N ta atxaba ma es ta dividiba famílias. Má gósi N ta odja ma na verdadi, Bíblia djuda nos kazamentu.” — Agness di Zánbia.

Na nos trabadju di pregason, nu ta djuda tudu algen odja ma sigi konsedju di Bíblia pode djuda-s:

• Skodje dretu un algen pa es kaza ku el

• Vense kes difikuldadi di primeru anu di kazamentu

• Da dretu ku sogrus

• Sabe uza dinheru

• Para di diskuti

• Prende púrdua

• Iduka fidjus

Muda di relijion pode traze prublémas na kazamentu?

Alvês sin. Pur izénplu na anu 1998, institutu di invistigason Sofres, analiza kazamentus undi ki sô maridu ô sô mudjer bira Tistimunha di Jeová. Kel piskiza mostra ma na kada 20 kazamentu, un pasa pa prublémas gravi.

Jizus dja flaba ma alvês kes ki sigi kes kuza ki el inxina ta ben pasaba pa prublémas na família. (Mateus 10:32-36) Un storiador ki txoma Will Durant ta konta ma na Inpériu di Roma, es ta flaba ma “sigidoris di Kristu ta siparaba família.” a Oji tanbê alguns Tistimunha di Jeová ta akuzadu di mésmu kuza. Má kel-li krê fla, ma é kel maridu ô kel mudjer ki bira Tistimunha di Jeová, ki ta traze prubléma?

Kantu Tribunal di Europa pa Direitus di Ómi, lida ku kel akuzason ma Tistimunhas di Jeová ta sipara família, el fla ma txeu bês kes algen di família ki é ka Tistimunha di Jeová, ka ta “seta i nen ka ta ruspeta liberdadi ki ses família ten di sigi ses relijion.” Kel tribunal tanbê fla: “Kel situason li, ta kontise na tudu kazamentu ki maridu ô mudjer é di relijion diferenti i ta kontise mésmu kuza ku Tistimunhas di Jeová.”b Má mésmu ki es ka dadu liberdadi di sigi ses relijion, Tistimunhas di Jeová ta sigi kel konsedju li ki sta na Bíblia: ‘Ka nhos paga ningen mal ku mal. . . . Si ta da, na kel ki ta dipende di nhos, nhos mante pas ku tudu algen.’ — Romanos 12:17, 18.

Pamodi ki Tistimunhas di Jeová ta atxa ma es debe kaza sô ku kenha ki tanbê é Tistimunha di Jeová?

Tistimunhas di Jeová ta sigi kel konsedju ki sta na Bíblia di kaza ‘sô na Sinhor’, ô kaza ku algen di mésmu relijion ki es. (1 Coríntios 7:39) Kel órdi li, alén di el sta na Bíblia tanbê el ta da bon rezultadu. Pur izénplu, un artigu ki publikadu na Journal of Marriage and Family na 2010, fla ma “kazal ki maridu ku mudjer é di mésmu relijion i es ta sigi mésmu krénsa” ten más xansi di ten un kazamentu filís.c

Má Tistimunhas di Jeová, ka ta insentiva ningen pa sipara di se maridu ô di se mudjer ki é ka Tistimunha di Jeová. Bíblia ta fla: ‘Si algun irmon ten un mudjer ki é ka krenti, i mudjer krê mora ku el, el ka debe larga-l; i si un mudjer ten un maridu ki é ka krenti, má maridu krê mora ku el, el ka debe larga maridu.’ (1 Coríntios 7:12, 13) Tistimunhas di Jeová ta ruspeta kel órdi li.