Un mudjer judeu splika pamodi ki el rezolve konfirma si se relijion staba dretu

Pâpia un bokadinhu sobri modi ki bu kriadu.

N nase na anu 1979 na Mérka. Nha mai ku nha pai divôrsia kantu N tinha três anu. Nha mai kria-m di akordu ku kes krénsa di judeus i el pô-m na skólas di judeus, ki txoma ieshivas. Kantu N tinha 7 anu, nu bai mora na Israel duránti un anu i N bai pa un skóla ki nu ta trabadjaba ku un grupu di algen ki txoma kibbutz. Dipôs mi ku nha mai, nu bai pa Méxiku.

Ka tinha ninhun sinagóga na undi ki nu ta moraba, má N kontinua ta faze kes kuza ki judeus ta faze sima sende véla na kel dia ki é sábadu pa judeus, lé Torá, ki é un livru sagradu pa judeus i ora ta uza un livru di orason, ki txoma sidur. Na skóla N ta flaba nhas koléga ma nha relijion éra kel primeru ki izisti. Nunka N ka leba kel ki ta txomadu Novu Testamentu, ki ta pâpia di trabadju di pregason di Jizus Kristu i di kuzas ki el inxina. Na verdadi, nha mai avizaba mi pa N ka faze kel-la, pamodi el fika ku medu pa N ka kontaminadu pa kes kuza ki Novu Testamentu ta inxina.

Pamodi ki bu disidi lé Novu Testamentu?

Kantu N tinha 17 anu, N torna bai pa Mérka pa N tirmina nha skóla. La na Mérka, un algen ki N konxeba, ki ta kriditaba na Jizus, fla-m ma nha vida ka ta sérba konplétu sen Jizus.

N fla-l: “Kes algen ki ta kridita na Jizus sta sen rumu.”

El pergunta-m: “Pur akazu, dja bu lé Novu Testamentu?”

N responde-l: “Nau.”

El fla-m: “Nton bu ka ta atxa ma bu sta ta ser iginoranti, dja ki bu sta ta da opinion di un kuza ki bu ka konxe?”

Kel-la mexe txeu ku mi, pamodi N ta atxaba ma éra dodisa pâpia sobri un kuza sen sabe sobri kel asuntu. Nton, N poi nha orgulhu pa la, N leba se Bíblia pa kaza i N kumesa ta lé Novu Testamentu.

Modi ki lé Novu Testamentu djuda-u?

N fika spantadu kantu ki N diskubri ma kes algen ki skrebe Novu Testamentu éra judeu. Kantu más N ta leba, más N ta daba kónta ma Jizus éra un judeu ki ta mostraba bondadi i umildadi i ki krê djudaba otus algen, envês di pruveta di es. N txiga ti di bai bibliotéka pa N ba djobe livrus sobri Jizus, má ninhun di es ka konvense-m ma Jizus éra Misías. Alguns di kes livru ta flaba ma el éra Deus, má kel ideia li ka ta fazeba ninhun sentidu pa mi. Afinal pa kenha ki Jizus ta oraba? Pa se kabésa? Alén di kel-li, Jizus móre. Má Bíblia ta fla ma Deus ‘ka ta móre.’a

Modi ki bu atxa respósta pa kes pergunta li?

Verdadi é klaru, el ka ta fla un kuza i dipôs fla otu kuza i N staba disididu na atxa verdadi. Nton, N ora di korason pa Deus ku lágua na odju i pa primeru bês N ka uza nha livru di orason. Sin ki N tirmina di ora, algen konku na pórta. Éra dôs Tistimunha di Jeová. Es da-m un bruxura pa N pode ntendeba Bíblia. Kel bruxura i kes konbérsu ki N tevi ku Tistimunhas di Jeová da-m sertéza ma kuzas ki es ta inxina ten bazi na Bíblia. Pur izénplu, es ka ta kridita ma Jizus ta faze párti di un Trindadi. Má es ta kridita ma el é ‘Fidju di Deus’b i ma el é kel ‘primeru ki Deus faze’.c

Poku ténpu dipôs N volta pa Méxiku i N kontinua ta studa kes profesia sobri Misías ku Tistimunhas di Jeová. N fika dimiradu pamodi ten txeu profesia sobri Misías! Má simé, N kontinua ku alguns dúvida. N ta perguntaba nha kabésa: ‘Kes profesia li ka pode kunpriba na otu algen? Jizus ka éra sô un bon ator ki konsigi faze papel di Misías dretu?’

Kuzê ki kaba ku tudu bus dúvida?

Tistimunhas di Jeová mostra-m profesias ki un Misías falsu ka ta pode kunpriba. Pur izénplu, 700 anu antis di Jizus nase, proféta Mikeias flaba ma Misías ta naseba na Belen, na Judea.d Modi ki un algen ta skodje na undi ki el ta nase? Izaías skrebe ma es ta mataba Misías sima un kriminozu, má es ta nteraba el djuntu ku algen riku.e Kes profesia li kunpri na Jizus.

Kel kuza ki da-m más sertéza é família ki Jizus ben di el. Bíblia ta fla ma Misías ta binha di família di rei Davidi.f Dja ki judeus ta guardaba rejistu di ses família, si Jizus ka binha di família di Davidi, se inimigus ta flaba kel-li pa tudu algen. Má es ka faze kel-li, pamodi ningen ka konsigi nega ma el ben di família di Davidi. Txeu algen ti mésmu ta txomaba el ‘Fidju di Davidi’.g

Na anu 70 D.J., ki é 37 anu dipôs ki Jizus móre, kes trópa di Roma distrui Jiruzalen i kes rejistu di kes família di judeus dizaparse ô es distruídu. Pur isu, pa un algen konsigi prova ma el éra di família di Davidi, el tinha ki parse antis di anu 70 D.J.

Modi ki txiga kel konkluzon li djuda-u?

Na Deuteronómio 18:18, 19, Deus fla ma el ta trazeba un proféta sima Muizés, ki ta saíba di meiu di Israel. Deus fla: ‘N ta ben iziji pa kel ómi ki ka obi ku nhas palavra, ki el fla na nha nómi, pa presta kónta na mi.’ Kantu N studa Bíblia interu más dretu, N fika ku sertéza ma Jizus di Nazaré éra kel proféta li.