Es atxa un kuza midjór

MILHONS di algen ki ta sigi Jizus disidi ka komemora Natal. Es ta rapende pamodi es faze kel-li? Es ta atxa ma es sta ta perde algun kuza? Ses fidjus ta xinti ma es sta ta perde algun kuza? Odja kuzê ki Tistimunhas di Jeová di txeu párti di mundu ta fla sobri kel asuntu li.

Es ta lenbra di Jizus Kristu más txeu: “Antis di N bira Tistimunha di Jeová, kuazi N ka ta baba igreja. I óras ki N ta baba éra sô na Natal ô na Páskua. Má mésmu na kes okazion la, N ka ta pensaba na Jizus Kristu. Oji N ka ta komemora Natal, má N ta sisti runion dôs bês pa simana i ti N ta inxina otus algen kuzê ki Bíblia ta fla sobri Jizus!” — EVA, AUSTRÁLIA.

Es ten más alegria na da: “N ta fika kontenti óras ki un algen ta da-m un prezenti óras ki N ka sta ta spéra. N gosta di surpréza! Má tanbê N gosta di faze karton i dizenhus pa otus algen pamodi kel-la ta pô-s ta fika kontenti, i ami tanbê N ta fika kontenti.” — RUBEN, IRLANDA DI NÓRTI.

Es djuda algen ki meste más txeu: “Nu gosta di faze kumida pa algen ki sta duenti. Alvês nu ta leba-s flor, un bolu ô un prezenti pikinoti pa djuda-s fika kontenti. Nu gosta di faze kel-li pamodi nu ta pode vizita kes algen na kalker dia di anu.” — EMILY, AUSTRÁLIA.

Es ta pasa más ténpu ku ses família: “Óras ki nu ta sta djuntu ku nos família, nos fidjus ta konsigi konxe ses tiu, ses avó, ses primu más midjór i es gosta di faze kel-la. Nu ka ta spéra sô pa feriadus pa nu sta djuntu ku nos família. Asi nu ka ta xinti presionadu i nos família sabe ma nu ta vizita-s pamodi nu ta ama-s.” — WENDY, ILHAS KAIMAN.

Es ten más pas: “Ta parse ma na ténpu di Natal, ta ten txeu kuza pa faze ki poku algen ta pensa na pas. Gósi ki N prende kuzê ki Bíblia ta promete-nu, N ta xinti más trankilu. N sabe ma nhas fidju ta ben ten un futuru filís.” — SANDRA, SPANHA.