Pa bu imita Jizus, bu meste . . .

MOSTRA KONPAXON

Dja ki Jizus éra perfetu, el ka pasa pa txeu difikuldadi i el ka tevi txeu di kes preokupason ki ómis normalmenti ten. Má simé el mostra txeu konpaxon pa otus algen. El tinha dispozison di faze kalker kuza pa djuda-s, el txiga ti di faze kuzas ki talvês pode parseba ma nen ka mesteba. Konpaxon pô-l ta djuda otus algen.

DEXA OTUS XINTI AVONTÁDI KU BO

Algen di tudu idadi, jóvens ku algen grandi, ta xintiba avontádi pa txiga na Jizus pamodi el ka ta pasaba ideia ma el staba txeu okupadu i nen el ka ta daba pa bon. Pesoas ta odjaba ma el ta preokupaba ku es, pur isu es ta xintiba avontádi djuntu ku el.

GOSTA DI FAZE ORASON

Jizus sénpri ta oraba di korason, óras ki el ta staba el sô i óras ki el ta staba djuntu ku otus sérvu di Deus. El ta oraba na txeu momentu diferenti, ka sô na óra di kume. El ta fazeba orason pa agradese i pa lova se Pai, i tanbê pa pidi se orientason antis di el toma un disizon inportanti.

POI INTERESI DI OTUS NA PRIMERU LUGAR

Mésmu óras ki el mesteba diskansa Jizus ta dexaba se diskansu di ladu pa poba interesi di otus pa frenti di kel di sel. El ka ta pensaba sô na se kabésa, pur isu el dexa un bon izénplu pa nu imita.

STA PRONTU PA PÚRDUA

Jizus ka sô inxina ma nu debe sta prontu pa púrdua, el mostra kel kualidadi li óras ki el ta lidaba ku se disiplus i ku otus algen.

SER ZELOZU

Staba skrebedu ma maioria di judeus ka ta setaba ma Jizus éra Misías i ma se inimigus ta mataba el, pur isu Jizus pode disidiba ka faze txeu sforsu pa djuda otus algen. Má envês di kel-li el mostra txeu zelu pa adorason verdaderu. Kel zelu ki el mostra ta sirbi di izénplu pa tudu kes ki ta sigi-l, ki ten ki lida ku falta di interesi di otus algen i ti ku opozison.

SER UMILDI

Jizus tinha mutu más konhisimentu i sabedoria di ki umanus inperfetu. Dja ki el éra perfetu, di sertéza el tinha más forsa i kapasidadi i el éra más intilijenti ki kalker otu algen na se vólta. Má simé, el ta fazeba kuzas pa otus algen ku umildadi.

TEN PAXÉNXA

Óras ki apóstlus i otus algen ta fadjaba i es ka ta imitaba Jizus i nen es ka ta obiba ku se konsedjus, Jizus sénpri ta mostraba paxénxa ku es. Sénpri el ta ripitiba ku paxénxa kes kuza ki el ta inxinaba se disiplus sobri Jeová, asi pa es pode biraba Se amigu.