Alguns algen ta atxa difísil ama Deus. Es ta atxa ma ka ta da pa ntende Deus, ma el ka ta nporta ku nos i ma el é kruel. Odja kuzê ki alguns algen fla:

• “N ta oraba pa Deus ta pidi-l ajuda, má N ta atxaba ma é inposível txiga na el. N ka ta pensaba na Deus sima un algen ki ten sentimentus.” — Marco, Itália.

• “Nbóra N krê sirbiba Deus, ta parseba ma el staba lonji di mi. N ta atxaba ma el éra un Deus mau, ki ta gostaba di kastiga pesoas i el ka tinha péna di algen.” — Rosa, Guatimala.

• “Kantu mi éra pikinoti, N ta pensaba ma Deus ta staba ta djobe érus na algen pa pode kastiga-s. Dipôs N kumesa ta atxa ma el ka ta nporta ku algen. Pa mi el éra sima un primeru ministru ki ta toma disizons sobri vida di pesoas, má sen preokupa ku es.” — Roberta, Kanadá.

Kuzê ki bu ta atxa? Deus merese pa nu ama-l? Dja ten séklus, ki txeu algen ki é relijiozu sta ta faze kel pergunta li. Na verdadi, duránti anu 500 D.J. ti pa vólta di anu 1500 D.J., maioria di pesoas ki ta flaba ma es éra kriston nen ka ta fazeba orason pa kel Deus Tudu-poderozu. Pamodi? Pamodi es tinha txeu medu di El. Storiador Will Durant, fla si: “ Modi ki un sinplis pekador ten koraji di faze orason pa un tronu ki sta lonji i terível?”

Pamodi ki alguns algen ta atxa ma Deus é un algen terível i ma el ‘sta lonji di nos?’ Na verdadi, kuzê ki Bíblia ta inxina sobri Deus? Prende verdadi sobri Deus ta djuda-u ama-l?

KUZÊ KI TXEU ALGEN TA KRIDITA

“Nu ka txiga na ninhun akordu si nu debe uza nómi di Deus ô nau, i si nu debe uza-l, nu ka sabe é ki nómi.” — Profesor David Cunningham, Theological Studies.

KUZÊ KI BÍBLIA TA FLA

Deus fla: ‘Ami é Jeová. Kel-li é nha nómi.’ (Isaías 42:8) Jeová é un nómi ebraiku ki siginifika ‘El ta faze kontise’. — Génesis 2:4, nóta di rodapé.

Jeová krê pa nu uza se nómi. Bíblia ta fla: ‘Nhos invoka se nómi, Nhos dexa tudu povu konxe kes kuza ki el faze! Nhos fla algen modi ki se nómi é grandi.’ — Isaías 12:4.

Jizus ta uzaba nómi di Deus. Kantu el staba ta pâpia ku Jeová na orason, sobri se disiplus, el fla: ‘Dja N faze-s konxe bu nómi i N ta kontinua ta faze-l konxedu.’ Pamodi ki Jizus inxina se disiplus nómi di Deus? El fla: ‘Asi pa kel amor ki bu ama-m sta na es i ami pa N sta unidu ku es.’ — João 17:26.

PAMODI KI KEL-LI É INPORTANTI

Un tiólogu ki txoma Walter Lowrie skrebe: “Un ómi ki ka konxe Deus pa nómi, na verdadi ka ta konxe-l. I si el konxe-l sô kómu un forsa, el ka ta pode ama-l.”

Un ómi ki txoma Victor ta baba pa igreja tudu simana, má na verdadi, el ta xintiba ma el ka konxeba Deus. El fla: “Nton N prende ma nómi di Deus é Jeová, i éra sima si algen staba ta aprizenta-m el pa primeru bês. Ti ki enfin N staba ta konxe kel algen ki N obi ta papiadu txeu di el. N kumesa ta odja Deus sima un algen rial i sima nha amigu.”

I Jeová tanbê krê ser amigu di kes algen ki ta uza se nómi. Deus ta faze kel promésa li pa ‘kes ki ta pensa na se nómi: N ta xinti péna di es sima ómi ta xinti péna di se fidju ki ta sirbi-l.’ (Malaquias 3:16, 17) Tanbê, Deus ta ben rekonpensa kes ki ta uza se nómi. Bíblia ta fla: ‘Tudu algen ki invoka nómi di Jeová ta ser salvu.’ — Romanos 10:13.

KUZÊ KI TXEU ALGEN TA KRIDITA

Ten un ensiklopédia ki ta fla: “Tudu kes três relijion prinsipal ki ta fla ma es é kriston, ki é katóliku, protestanti i ortodoksu, ta seta ma ten un Deus na três algen. Es ta fla ma ten Deus Pai, Deus Fidju i Deus Spritu santu. Es ta inxina ma kel-li ka krê fla ma ten três deus, má ki kes três algen é sô un.” — The New Encyclopædia Britannica.

KUZÊ KI BÍBLIA TA FLA

Jizus, ki é fidju di Deus, nunka ka fla ma el é igual ô mésmu algen ki se Pai. Envês di kel-li, el fla: ‘N sta bai pa nha Pai, dja ki Pai é más grandi ki mi.’ (João 14:28) Tanbê el fla pa un di se disiplus: ‘N sta subi pa nha Pai i nhos Pai, pa nha Deus i nhos Deus.’ — João 20:17.

Spritu santu é ka un algen. Kes primeru kriston ‘fika xeiu di spritu santu’, i Jeová fla: ‘N ta ben baza nha spritu riba di tudu tipu di algen.’ (Atos 2:1-4, 17) Spritu santu é ka párti di un Trindadi. El é forsa ki Deus ta uza.

PAMODI KI KEL-LI É INPORTANTI

Dôs studiozu Katóliku ki txoma Karl Rahner i Herbert Vorgrimler, splika ma “algen ka ta pode konxe trindadi sen un revelason, i mésmu dipôs di un revelason algen ka ta konsigi ntende-l dretu.” Bu ta konsigi amaba un algen ki é inposível bu konxe-l ô ntende-l? Nau. Ensinu di Trindadi ka ta dexa pesoas konxe i ama Deus.

Marco, ki nu papiaba di el antis, ta odjaba Trindadi sima un barera. El fla: “N ta pensaba ma Deus ka kreba pa N konxe-l i kel-la ta poba el ta ser un mistériu, un algen ki sta lonji i ki nu ka ta pode txiga na el.” Má, ‘Deus é ka Deus di konfuzon.’ (1 Coríntios 14:33, Centro Bíblico Católico) Deus ka ta sukundi di nos ken ki el é. El krê pa nu konxe-l. Jizus fla: ‘Anos nu ta adora kuzê ki nu konxe.’ — João 4:22.

Marco fla: “Kantu N prende ma Deus é ka párti di un trindadi, N pasa ta ten un amizadi ku el.” Si nu nkara Jeová sima un pesoa envês di un mistériu ki nu ka konxe, ta fika más fásil nu ama-l. Bíblia ta fla: ‘Ken ki ka ta ama ka konxe Deus, pamodi Deus é amor.’ — 1 João 4:8.

KUZÊ KI TXEU ALGEN TA KRIDITA

“Alma di kes algen ki móre ku pekadu ki ka ten perdon, ta dixi lógu pa inférnu, na undi ki es ta ba sufri kastigu di inférnu, na ‘lumi pa tudu ténpu.’” (Catecismo da Igreja Católica) Alguns xéfi di relijion ta fla ma kes alma ki sta na inférnu sta izoladu i siparadu di Deus.

KUZÊ KI BÍBLIA TA FLA

‘Kel alma ki peka é el ki ta móre.’ (Ezequiel 18:4) Mortus ‘ka sabe di más nada.’ (Eclesiastes 9:5) Si alma ta móre i el ka sabe di más nada, modi ki el pode sufri na ‘lumi pa tudu’ ô ti mésmu xinti dór di fika siparadu di Deus pa tudu ténpu?

Na Bíblia, kes palavra na ebraiku i gregu ki txeu bês ta traduzidu pa ‘inférnu’ krê fla sipultura. Pur izénplu, un profesia di Bíblia ki ta pâpia sobri Jizus, fla: ‘Bu ka ta bandona-m na sipultura [“na inférnu,” traduson Antônio Pereira de Figueiredo].’ (Atos 2:27, Nova Versão Internacional) É klaru ki Jizus ka staba na un lugar di kastigu, ô siparadu di Deus, má el staba na sipultura.

PAMODI KI KEL-LI É INPORTANTI

Maldadi ka ta pô-nu ku vontadi di konxe Deus, má ta afasta-nu di el. Rocío ki ta mora na Méxiku, fla: “N prende ensinu di inférnu di lumi kantu N staba pikinoti, N ta fikaba ku tantu medu ki N ka ta konsigi imajinaba Deus kómu un algen bon. N ta atxaba ma el éra runhu i ma el ka tinha paxénxa.”

Kes ensinu klaru di Bíblia sobri julgamentus di Deus i kuzê ki ta kontise ku algen óras ki el móre, muda manera di Rocío nkara Deus. El fla: “N xinti livri, N tradu un pézu grandi riba mi. Oji N ten sertéza ma Deus ta ama-nu, el krê midjór pa nos i N pode ama-l. El é sima un pai ki ta pega se fidju na mô i el krê midjór pa el.” — Isaías 41:13.

Txeu algen bira relijiozu pamodi medu di inférnu di lumi, má Deus ka krê pa bu sirbi-l pamodi medu. Jizus fla: ‘Bu debe ama Jeová, bu Deus’. (Marcos 12:29, 30) Alén di kel-li, óras ki nu ta prende ma Deus ka ta aji di manera injustu, nu pode ten sertéza ma se julgamentu pa futuru tanbê ta ser sénpri justu. Sima Eliú, ki éra kel amigu di Jó, nu pode fla ku kunfiansa: ‘Deus verdaderu nunka ka ta fazeba kel ki é mau, i Tudu-Poderozu nunka ka ta faze kel ki é mariadu.’ — Jó 34:10.

Un dia, na Jiruzalen, Jizus staba ta pâpia di se Pai, Jeová, i el fla kes xéfi di relijion di se ténpu ma es éra falsu. (João 8:12-30) Kuzas ki el fla na kel momentu ta inxina-nu ma é inportanti nu analiza kes kuza ki pesoas ta kustuma inxina sobri Deus. Jizus fla: ‘Si nhos kontinua na nhas palavra, nhos é nhas disiplu di verdadi, i nhos ta konxe verdadi i verdadi ta liberta nhos.’ — João 8:31, 32.

‘Si nhos kontinua na nhas palavra.’ Ku kes palavra li, Jizus dexa klaru modi ki nu pode analiza si kuzas ki relijions ta inxina é ‘verdadi’. Óras ki bu obi algun kuza sobri Deus, pensa: ‘Kel-li sta di akordu ku kes palavra di Jizus i ku Bíblia interu?’ Imita kes ki obi kuzê ki Polu inxina, i ki tudu dia ta “studaba Skrituras Sagradu pa es odja si [kuzas ki es staba ta prende] éra si mé.” — Atus 17:11, Bíblia na Prugrésu di Traduson pa Língua Kabuverdianu (BPK).

Marco, Rosa, i Roberta, ki dja nu papiaba di es antis, analiza ses krénsa ku kuidadu kantu es studa Bíblia ku Tistimunhas di Jeová. Kuzê ki es prende?

Marco: “Es uza Bíblia pa responde tudu kes pergunta ki mi ku nha mudjer tinha. Nu pasa ta ama Jeová, i tanbê kómu kazal nu fika más unidu ku kunpanheru!”

Rosa: “N ta pensaba ma Bíblia éra un livru di filozofia ki ta uzaba pensamentus di ómi pa tenta splika ken ki é Deus. Má ku ténpu, N atxa respóstas pa nhas pergunta. Gósi, N ta xinti ma Jeová é un pesoa rial, algen ki N pode kunfia na el.”

Roberta: “N ora pa Deus ta pidi ajuda pa N konxe-l. Más tardi, mi ku nha maridu kumesa ta studa Bíblia. Ti ki enfin, nu prende verdadi sobri Jeová. Nu fika kontenti di sabe ki tipu di Deus el é.”

Bíblia ta faze más di ki sô fla verdadi sobri Deus, tanbê el ta mostra kes kualidadi bunitu ki el ten. El é se Palavra i el ta djuda-nu sabe ‘kes kuza ki Deus da-nu ku bondadi.’ (1 Coríntios 2:12) Bu ta gostaba di sabe di bo pa bo kuzê ki Bíblia ta fla sobri Deus, sobri se vontadi i nos futuru? Pa bu sabe respósta bai na “Ensinus di Bíblia > Respóstas pa perguntas di Bíblia” na site www.pr418.com. Tanbê bu pode pidi un studu di Bíblia na es site ô na kalker Tistimunha di Jeová. Nu ten sertéza ma si bu faze si, bu ta odja ma é más fásil ama Deus di ki kel ki bu ta imajina.