Prublémas ki ta da-nu speransa

‘Na ténpu di fin, kuzas ta fika konplikadu, difísil di aguenta.’ — 2 TIMÓTEO 3:1.

DJA bu kustuma obi ô odja algun di kes kuza tristi li?

● Duénsa dja mata txeu algen.

● Fomi dja tra vida di un monti algen.

● Tremor di téra dja mata milharis di algen i dja dexa txeu sen lugar di mora.

Na kes otu pájina, bu ta ben odja kuzas sima kes-li ki kontise, ki ta pô-u para pa bu pensa na situason di mundu. Tanbê, bu ta ben odja ma Bíblia dja flaba ma kes tipu di kuza li ta kontiseba na kel ténpu ki ta txomadu di ‘ténpu di fin’.a

Má, obijetivu di kes artigu li é ka pa konvense-u ma nu sta ta vive na un mundu xeiu di prubléma. Kel-li di sertéza dja bu sabe. El skrebedu pa da-nu speransa i pa mostra-nu ma kunprimentu di kes 6 profesia ki nu sta ben pâpia di el, ta siginifika ma nu sta kuazi ta txiga na fin di ‘ténpu di fin’. Tanbê, nu sta ben odja kuzê ki txeu algen ta fla sobri kel asuntu li i el ta ben da-nu bons motivu pa kridita ma kuzas midjór sta kuazi ta txiga.

[Nóta di rodapé]

Profesia 1. Tremor di téra

‘Ta ben ten grandis tremor di téra’. — LUCAS 21:11.

● Winnie, di un anu i kuatu mês, tradu dibaxu di un kaza ki ronba na Aiti. Un ekipa di tilivizon ki staba la ta trabadja obi-l ta jeme. El konsigi skapa di kel tremor di téra, má se mai ku se pai ka konsigi.

KUZÊ KI PRÓVAS TA MOSTRA? Un tremor di téra fórti di 7.0 kontise na Aiti na janeru di 2010 i pamodi kel-li más di 300 mil algen móre. Tanbê, 1,3 milhon di algen fika sen lugar di mora di un óra pa kel otu. Má é ka sô Aiti ki sufri pamodi tremor di téra. Peloménus 18 tremor di téra grandi kontise na mundu interu désdi abril di 2009 ti abril di 2010.

KUZÊ KI TXEU ALGEN TA FLA? É ka tremor di téra ki sta kontise más txeu, má pamodi tekinolojia, kes notísia sobri kes kuza li sta ta txiga na nos más faxi di ki antis.

KES KUZA KI ES TA FLA TA FAZE SENTIDU? Pensa na kel-li: Bíblia ka ta distaka kantu tremor di téra ki ta ben kontiseba duránti ténpu di fin, má el ta fla ma ‘grandis tremor di téra’ ta ben kontiseba ‘na un lugar tras di kel otu’. Kel-li é un di kes kuza ki ta markaba stória di mundu. — Marcos 13:8; Lucas 21:11.

KUZÊ KI BU TA ATXA? Kes grandi tremor di téra sta ta kontise sima Bíblia dja flaba?

Sô tremor di téra pode ka prova ma nu sta vive na ténpu di fin. Má, es é sô un di kes profesia ki sta ta kunpri. Nu ben odja otu.

[Lejenda]

“Anos [sientistas] nu ta txoma-s di kes grandi tremor di téra. Otus algen ta txoma-s di disgrasa.” — KEN HUDNUT, SÉNTRU DI PISKIZA NA MÉRKA KI TA STUDA PLANÉTA TÉRA.

[Donu di fotu]

© William Daniels/Panos Pictures

Profesia 2. Fómi

‘Ta ben ten falta di kumida.’ — MARCOS 13:8.

● Un ómi ta bai pa zóna di Kuaratadji, na Níjer, ku speransa ma el ta atxa kumida. Se primus, se irmons i se irmans tanbê bai pa kel mésmu zóna ta fuji di fómi. Má kel ómi sta el sô detadu na txon na un stera. Pamodi ki el sta el sô? Sidi, ki é xéfi di kel zóna ta splika: “El ka sta konsigi da [se família] kumida más, pur isu el ka ten koraji di djobe-s na odju.”

KUZÊ KI PRÓVAS TA MOSTRA? Na mundu interu, kuazi 1 na kada 7 algen ka ten kumida ki ta txiga-s tudu dia. Na alguns país na Áfrika, kel situason li é piór, pamodi 1 na kada 3 algen sta mal nutridu pamodi kuazi es ka ten kumida. Pa ntende kel-li midjór, imajina un família ki ten un pai, un mai i un bebé. Si ten kumida sô pa dôs di es, ken ki ta fika sen kume? Kel pai? Kel mai? Ô kel bebé? Kel-li é un disizon ki txeu família ten ki toma tudu dia.

KUZÊ KI TXEU ALGEN TA FLA? Téra ta da kumida mutu más di ki kel ki tudu algen meste. Sô nu meste uza dretu kes kuza ki ten na Téra.

KUZÊ KI ES TA FLA TA FAZE SENTIDU? É verdadi ki agrikultoris pode poi téra ta da mutu más kumida i es ta konsigi leba-l pa mutu más lugar di ki antis. Nton, govérnus di ómi debe tinha kapasidadi di uza dretu kes kumida ki Téra ta da i rezolve prubléma di fómi. Má mésmu dipôs di txeu anu ta tenta, es ka konsigi faze kel-li.

KUZÊ KI BU TA ATXA? Testu di Marcos 13:8 sta ta kunpri? Sikrê mundu dja avansa txeu na tekinolojia, falta di kumida inda sta ta afeta pesoas na mundu interu?

Txeu bês tremor di téra ku fómi ta traze prublémas ki sta ligadu ku otu kuza ki ta faze párti di sinal di ténpu di fin.

[Lejenda]

“Más di 3 na kada 10 mininu ki ta móre di pineumonia, diareia i otus duénsa pode skapaba si es ka staba mal nutridu.” — ANN M. VENEMAN, KI ÉRA DIRETORA DI FUNDO DA ONU PARA A INFÂNCIA.

[Donu di fotu]

© Paul Lowe/Panos Pictures

Profesia 3. Duénsas

“Gentis ta ben. . . duense rixu.” — LÚKAS 21:11, Bíblia Na Prugrésu Di Traduson Pa Lingua Kabuverdianu, BPK.

● Bonzali, é un ómi ki ta trabadjaba na kuzas ligadu ku saúdi na un país di Áfrika ki sta distruídu pamodi géra. El faze tudu kel ki el pode pa kuida di kes algen ki ta trabadjaba na un mina na se sidadi ki staba ta móre pamodi un fébri ki ta poi algen ta perde sangi ki txoma Marburg.a El pidi ajuda na kes autoridadi di un sidadi más grandi, má es ka da-l respósta. Kuatu mês dipôs kel ajuda txiga, má Bonzali dja moreba. El panha kel vírus di Marburg di kes algen ki ta trabadjaba na mina ki el staba ta tenta salva.

KUZÊ KI PRÓVAS TA MOSTRA? Infesons ki ta afeta respirason sima pineumonia, duénsas ki ta da diareia, SIDA, tuberkulozi i paludismu é kes duénsa ki más ta mata algen na mundu. Na anu 2004, kes duénsa li mata más ô ménus 10,7 milhon di algen. Nton nu pode fla ma duránti un anu, kes duénsa mata más ô ménus un algen na kada três sugundu.

KUZÊ KI TXEU ALGEN TA FLA? Dja ki algen na mundu sta kontinua ta bira más txeu, é klaru ki ta ten más kazus di duénsa. Gósi ten más algen na mundu ki pode panha duénsa.

KUZÊ KI ES TA FLA TA FAZE SENTIDU? Algen na mundu interu sta ta bira más txeu. Má tanbê, ómi midjora se kapasidadi di diskubri, kontrola i trata duénsas. Nton ka ta faze sentidu ma duénsa devia biraba más poku? Má é ka kel-li ki sta ta kontise.

KUZÊ KI BU TA ATXA? Pesoas sta ta sufri di duénsas gravi sima Bíblia dja flaba?

Tremor di téra, fómi i duénsas sta ta kaba ku vida di milhons di algen. Otus milhon sta ta sufri na mô di algen, i txeu di es sta ta sufri na mô di kes ki devia protejeba es. Repara kuzê ki Bíblia ta fla ma ta ben kontiseba.

[Nóta di rodapé]

[Lejenda

“É tristi dimás odja un lion ô kalker otu animal ta kaba ku un algen, má tanbê é tristi dimás odja un vírus ta kaba ku un algen i odja kel kuza ta kontinua ta kontise ku otus algen.” — MICHAEL OSTERHOLM, UN DOTOR KI STUDA DUÉNSAS KI TA SPADJA.

[Donu di fotu]

© William Daniels/Panos Pictures

Profesia 4. Falta di amor

‘Ómis ka ta tinha amor pa família’. — 2 TIMÓTEO 3:1-3

● Kris é un mudjer ki ta faze párti di un grupu ki ta djuda kes algen ki ta sufri violénsia na família na nórti di País di Gales. Kris fla: “N ta lenbra di un mudjer ki ba djobeba nos. El sotadu txeu dimás ki N ka konsigi konxe-l, nbóra dja N odjaba el antis. Kel-li ta mexe tantu ku otus mudjer ki es ka ta konsigi nen djobe-u na rostu.”

KUZÊ KI PRÓVAS TA MOSTRA? Na un país di Áfrika, más ô ménus 1 na kada 3 mudjer dja sufri abuzu seksual kantu es éra pikinoti. Na kel mésmu país, fazedu un piskiza ki ta mostra ma más di 3 na kada 10 ómi ta atxaba ma éra normal es sota ses mudjer. Má é ka sô mudjer ki ta sufri violénsia na família. Pur izénplu, na Kanadá, kuazi 3 na kada 10 ómi, ses kunpanhera dja sota-s ô dja faze-s otus tipu di abuzu.

KUZÊ KI TXEU ALGEN TA FLA? Violénsia na família sénpri izisti. Kel-li é un asuntu ki sô sta ta dadu más atenson gósi di ki antis.

KUZÊ KI ES TA FLA TA FAZE SENTIDU? É verdadi ki na kes últimu anu, violénsia na família sta ta dadu más atenson. Má kel-li sta ta poi violénsia na família ta bira más poku? Nau, é ka kel-li ki sta ta kontise. Falta di amor sta ta bira un kuza kada bês más normal.

KUZÊ KI BU TA ATXA? Testu di 2 Timóteo 3:1-3 sta ta kunpri? Bu ka ta konkorda ma txeu algen ka sta xinti kel amor ki es devia xintiba na ses família?

Kel kintu profesia ki sta ta kunpri ten aver ku Téra, ki é nos kaza. Odja kuzê ki Bíblia ta fla sobri kel-li.

[Lejenda]

“Violénsia na família é un di kes krimi más normal i ki ménus ta papiadu di el na mundu. Txeu bês un mudjer sô ta ba djobe pulísia dipôs ki se kunpanheru sota-l uns 35 bês.” — UN PÓRTA-VÓS KI TA DJUDA PA TILIFÓNI KES KI TA SUFRI DI ABUZU NA FAMÍLIA DI PAÍS DI GALES.

Profesia 5. Distruison di Téra

‘Deus ta distrui kes ki sta distrui Téra.’ — APOCALIPSE 11:18.

● Sinhor Pirri ta trabadja na tra seiva di palmera pa faze vinhu na Kpor, Nijéria. Se trabadju fika prujudikadu pamodi txeu pitróli baza na riu Níjer. El fla: “Kel-li sta ta mata nos pexi, sta ta straga nos péli i sta ta kontamina nos riu. N ka tene más manera di sustenta.”

KUZÊ KI PRÓVAS TA MOSTRA? Alguns algen ki ta ntende dretu kel asuntu li ta fla ma kada anu ta botadu na mar 6,5 milhon di tonelada di lixu. Más ô ménus metadi di kes lixu é plástiku ki ta fika riba di agu pa monti anu antis di es disfaze. Ómis sta ta polui Téra i tanbê es sta ta kaba faxi ku kuzas ki ten na naturéza. Piskizas ta mostra ma Téra ta meste un anu i sinku mês pa el torna produzi kes kuza ki ómi ta uza duránti un anu. Un jornala di Austrália fla: “Si algen na mundu i kes kuza ki nu ta uza kontinua ta omenta di kel manera li, na anu 2035 nu ta ben meste di dôs Téra.”

KUZÊ KI TXEU ALGEN TA FLA? Ómis é intilijenti i es pode atxa bons soluson pa rezolve kes prubléma i salva Téra.

KUZÊ KI ES TA FLA TA FAZE SENTIDU? Txeu algen i grupus di algen sta ta sforsa pa dexa otus sabe sobri kes prubléma ki sta kontise na naturéza. Má simé, poluison na Téra sta kontinua ta omenta txeu.

KUZÊ KI BU TA ATXA? Deus promete ma el ta ben salva nos planéta pa ka distruídu. Bu ta atxa ma el ta ben kunpri kel promésa li?

Alén di kes sinku profesia ki dja nu pâpia di el, Bíblia tanbê fla ma kuzas dretu ta ben kontiseba na ténpu di fin. Odja un izénplu na kel sestu profesia.

[Lejenda]

“Antis ami éra dónu di un paraízu pikinoti, má gósi ami é dónu di un lugar di bota lixu.” — ERIN TAMBER, KI TA MORA NA KÓSTA DI KEL BAÍA GRANDI DI MÉRKA, TA PÂPIA SOBRI PRUBLÉMAS PAMODI KEL PITRÓLI KI BAZA NA KEL BAÍA GRANDI DI MÉXIKU NA ANU 2010.

[Donu di fotu]

Fotu di U.S. Coast Guard

[Nóta di rodapé]

Profesia 6. Pregason na mundu interu

‘Kes notísia sábi di Reinu ta ben ser pregadu na mundu interu’. — MATEUS 24:14.

● Un mudjer ki txoma Vaiatea ta mora na un ilha lonji na Arkipélagu di Tuamotu, ki ta fika na Pasífiku. Nbóra Tuamotu é formadu pa uns 80 ilha spadjadu na un ária di más di 800 mil kilómetru kuadradu, é sô uns 16 mil algen ki ta mora la. Má simé Tistimunhas di Jeová ta vizita Vaiatea i se vizinhus. Pamodi? Pamodi es krê pâpia di notísias sábi di Reinu di Deus pa tudu algen, ka ta nporta na undi ki es ta mora.

KUZÊ KI PRÓVAS TA MOSTRA? Mensaji di Reinu sta ta txiga na tudu kantu di Téra. Sô na 2010, Tistimunhas di Jeová gasta más di 1,6 bilhon di óra ta pâpia sobri notísias sábi na 236 país. Kel-li krê fla ma kada un di es gasta más ô ménus 30 minutu tudu dia na trabadju di pregason. Na kes últimu 10 anu, es faze i es distribui más di 20 bilhon di publikason pa inxina algen sobri Bíblia.

KUZÊ KI TXEU ALGEN TA FLA? Sénpri pregadu mensaji di Bíblia.

KUZÊ KI ES TA FLA TA FAZE SENTIDU? É verdadi ki txeu algen dja prega algun kuza sobri Bíblia. Má maioria di es faze kel-li sô pa poku ténpu i na poku lugar. Má, Tistimunhas di Jeová sta ta faze un kanpanha organizadu di pregason na mundu interu, ki ta alkansa senténas di milhon di algen. Dja es aguenta firmi na ses trabadju di pregason, sikrê ku txeu opozison di alguns di kes organizason más poderozu i runhu di stória di mundu.a (Marcos 13:13 ) Tanbê, Tistimunhas di Jeová ka ta pagadu pa es prega. Es ta uza ses ténpu di livru vontadi i es ta distribui publikasons sen kobra nada. Ses trabadju é sustentadu sô ku kontribuisons.

KUZÊ KI BU TA ATXA? Kes ‘notísia sábi di Reinu’ sta ta pregadu na mundu interu? Manera ki kel profesia li sta ta kunpri, krê fla ma ka ta dura kuzas ta ben midjora?

[Nóta di rodapé]

[Lejenda]

“Timenti Jeová sta ta dexa, nu ta kontinua ta prega kes notísia sábi di Reinu ku zelu i ta faze tudu kel ki nu pode pa pâpia ku pesoas.” — ANUÁRIO DAS TESTEMUNHAS DE JEOVÁ DE 2010.

Dias más sábi sta kuazi ta txiga!

‘I ka ta dura kes algen mau ta ben dexa di izisti. Má, kes algen mansu ta ben toma kónta di Téra i es ta ben ten txeu alegria ku txeu pas.’ — SALMO 37:10, 11.

BU TA gostaba di odja kel profesia li ta kunpri? É klaru ki sin. Bu ten txeu motivu pa kridita ma ka ta dura kel-li ta ben kontise.

Kes otu artigu ki nu pâpia di el mostra sô alguns di kes profesia di Bíblia ki ta dexa klaru ma nu sta vive ‘na ténpu di fin’. (2 Timóteo 3:1-5 ) Deus uza kes skritor di Bíblia pa pâpia di kes kuza li pa da-nu speransa. (Romanos 15:4 ) Óras ki nu ta odja kes profesia li ta kunpri, kel-li krê fla ma ka ta dura kes prubléma ki nu sta pasa pa el ta ben kaba.

Kuzê ki ta ben kontise dipôs di ténpu di fin? Reinu di Deus ta ben governa Téra interu. (Mateus 6:9 ) Odja kuzê ki Bíblia ta fla ma ta ben kontise na Téra:

● Ka ta ben ten más fómi. ‘Ta ben ten kumida avontádi na Téra, i riba monti ta ben ten un monti kumida.’ — Salmo 72:16.

● Duénsa ta ben kaba. ‘Ningen ki ta mora la ka ta fla: “N sta duenti.”’ — Isaías 33:24.

● Téra ta ben konpodu. ‘Dizértu i téra séku ta ben fika kontenti, lugar planu di dizértu ta ben grita ku txeu alegria i el ta ben da flor sima asafron.’ — Isaías 35:1.

Kes-li é sô alguns di kes profesia di Bíblia ki ta anima algen i ki ka ta dura ta ben kunpri. Kuzê ki bu ta atxa di pidi Tistimunhas di Jeová pa mostra-u pamodi ki es ten txeu sertéza ma dias más sábi sta kuazi ta txiga?