• Bu pode ser amigu di Jeová
    Vive filís pa tudu ténpu! — Un livru pa studa Bíblia

    • 5. Kuzê ki Jeová ta spéra di se amigus

      Nu ta kustuma spéra alguns kuza di nos amigus.

      • Kal ki é alguns kuza ki bu ta gostaba pa bus amigu faze pa bo?

      Lé 1 João 5:3, i dipôs pâpia sobri kel pergunta li:

      • Kuzê ki Jeová krê pa se amigus faze?

      Pa nu pode obi ku Jeová, talvês nu meste muda nos konportamentu ô nos manera di ser. Lé Isaías 48:17, 18, i dipôs pâpia sobri kel pergunta li:

      • Pamodi ki Jeová ta pidi se amigus pa faze mudansas na vida?

      Un ómi ki sta trabadja na konstruson sta da se koléga un kapaseti di suguransa.

      Un bon amigu ta lenbra-nu di kuzê ki pode djuda-nu i proteje-nu. Jeová ta faze mésmu kuza pa se amigus.

  • Modi ki nu pode mostra ma nu ta ama Jeová?
    Vive filís pa tudu ténpu! — Un livru pa studa Bíblia
    • Lison 34. Un ómi na un sidadi sta ta djobe pa séu.

      LISON 34

      Modi ki nu pode mostra ma nu ta ama Jeová?

      Désdi ki bu kumesa studa Bíblia, bu sta xinti más amigu di Deus? Bu krê kontinua ta bira bu amizadi ku el más fórti? Nton, lenbra ma sima Jeová ta ba ta odja bu amor pa el ta bira más txeu, el ta bira ta ama-u más txeu tanbê i ta kuida di bo. Modi ki bu pode mostra ma bu ta ama-l?

      1. Modi ki nu ta mostra ma nu ta ama Jeová?

      Nu ta mostra ma nu ta ama Jeová óras ki nu ta obi ku el. (Lé 1 João 5:3.) El ka ta obriga ningen pa obi ku el. Má, el ta da kada un di nos oportunidadi pa skodje si nu krê obi ku el ô nau. Pamodi? Pamodi Jeová krê pa nu ‘obi di korason’. (Romanos 6:17) Kel-li krê fla ma el krê pa bu obi ku el ka pamodi bo é obrigadu, má pamodi bu ta ama-l. Kes párti 3 i 4 di kel livru li, fazedu pa djuda-u mostra bu amor pa Jeová óras ki bu ta faze kuzas ki el gosta i ivita kuzas ki el ka gosta.

      2. Pamodi ki pode ser difísil nu mostra nos amor pa Jeová?

      ‘Difikuldadis di algen justu é txeu’. (Salmo 34:19) Nos tudu ta luta ku nos inperfeson. I tanbê alvês nu ten ki lida ku falta di dinheru, injustisa i otus difikuldadi. Óras ki nu ta pasa pa prublémas, pode ka ser fásil faze kel ki Jeová ta pidi-nu. Kel-li ta kontise pamodi pode parse ma é más fásil faze kuzas mariadu. Má óras ki bu ta faze kel ki Jeová ta fla-u, bu ta mostra ma bu ta ama-l más di ki kalker otu kuza. I bu ta prova ma abo é lial pa el. Tanbê, el ta ser lial pa bo. Nunka el ka ta bandona-u. — Lé Salmo 4:3.

      SABE MÁS

      Prende pamodi ki Jeová ta fika kontenti óras ki bu ta obi ku el i kuzê ki pode djuda-u kontinua lial pa el.

      3. Un asuntu ki ten aver ku bo

      Na livru di Jó, nu ta lé ma Satanás akuza Jó i tanbê tudu kes algen ki krê sirbi Jeová. Lé Jó 1:1, 6–2:10, i dipôs pâpia sobri kes pergunta li:

      • Sima Satanás fla, pamodi ki Jó obi ku Jeová? — Odja Jó 1:9-11.

      • Kuzê ki Satanás fla sobri tudu algen, i abo tanbê? — Odja Jó 2:4.

      Lé Jó 27:5b, i dipôs pâpia sobri kel pergunta li:

      • Modi ki Jó prova ma el ta amaba Jeová di korason?

      Satanás ta dizâfia Jeová. El sta ta fla ma Jó, ki sta xeiu di frida na korpu, i un irman ki sta ta sirbi Jeová oji, ka ta ser lial pa El.

      Jó prova ma el ta amaba Jeová kantu el mante lial pa el

      Nu ta prova ma nu ta ama Jeová óras ki nu ta mante lial pa el

      4. Poi korason di Jeová kontenti

      Lé Provérbios 27:11, i dipôs pâpia sobri kes pergunta li:

      • Modi ki Jeová ta xinti óras ki bu ta faze kuzas dretu i bu ta obi ku el? Pamodi?

      5. Bu pode ser lial pa Jeová

      Nos amor pa Jeová ta pô-nu pâpia ku otus algen sobri el. Nos lialdadi pa el ta pô-nu faze kel-la mésmu óras ki é ka fásil. Odja VÍDIU, i dipôs pâpia sobri kes pergunta li:

      VÍDIU: Difende bu fé sikrê ku pirsigison (5:09)

      • Bu ta atxa difísil pâpia ku otus sobri Jeová?

      • Na vídiu, kuzê ki djuda Jil vense medu ki el tinha?

      É más fásil obi ku Jeová óras ki nu ta ama kes kuza ki el ta ama i ôdia kes kuza ki el ta ôdia. Lé Salmo 97:10, i dipôs pâpia sobri kes pergunta li:

      • Sima dja bu prende, kal ki é alguns kuza ki Jeová ta ama? Kal ki é alguns kuza ki el ta ôdia?

      • Modi ki bu pode prende ama kes kuza ki é bon i ôdia kes kuza ki é mau?

      6. Obi ku Jeová é bon pa nos

      Obi ku Jeová é sénpri kel midjór kuza ki nu debe faze. Lé Isaías 48:17, 18, i dipôs pâpia sobri kes pergunta li:

      • Bu ta atxa ma nu pode kunfia ma Jeová sénpri sabe kuzê ki é midjór pa nos? Pamodi?

      • Modi ki studa Bíblia i prende sobri Jeová dja djuda-u ti gósi?

      ALGUNS ALGEN TA FLA: “Deus ka ta nporta ku kuzê ki N ta faze.”

      • Ki testu di Bíblia bu pode uza pa mostra ma kes kuza ki nu ta faze pode poi Jeová kontenti ô tristi?

      REZUMU

      Bu pode mostra ma bu ta ama Jeová óras ki bu ta obi ku el i bu ta mante lial pa el sikrê ku prublémas.

      Perguntas di rezumu

      • Kuzê ki bu prende ku izénplu di Jó?

      • Modi ki bu ta prova ma bu ta ama Jeová?

      • Kuzê ki ta djuda-u mante lial pa Jeová?

      Sprimenta faze kel-li

      DJOBE MÁS

      Odja modi ki bu pode ser lial pa Jeová i pa irmons na kongregason.

      ‘Ku kes ki é lial bu ta aji ku lialdadi’ (16:49)

      Prende más sobri kel akuzason ki Satanás faze kóntra nos.

      “Jó mante se lialdadi” (Bíblia — Kal ki é se mensaji? Párti 6)

      Odja modi ki ti mininus pode mostra ses amor pa Jeová.

      Faze kuzas pa Jeová fika kontenti ku bo (8:16)

      Modi ki un jóven pode mante lial pa Jeová sikrê el sta sufri preson di kolégas?

      Mante firmi óras ki kolégas faze-u preson! (3:59)

  • Modi ki nu pode toma bons disizon
    Vive filís pa tudu ténpu! — Un livru pa studa Bíblia
    • Lison 35. Un maridu sta ta piskiza na internet ki karu ki es ta kunpra timenti se mudjer ku ses fidjus sta ta djobe.

      LISON 35

      Modi ki nu pode toma bons disizon

      Nos tudu nu ten ki toma disizons. Txeu di kes disizon pode mexe ku nos i ku nos amizadi ku Jeová. Pur izénplu, talvês nu ten ki disidi na undi nu ta mora, modi ki nu ta sustenta ô si nu ta kaza ô nau. Óras ki nu ta toma bons disizon, nu ta ten un vida filís i nu ta agrada Jeová.

      1. Modi ki bu pode uza Bíblia pa toma bons disizon?

      Antis di toma un disizon, ora pa Jeová ta pidi-l ajuda i djobe na Bíblia pa sabe kuzê ki el ta atxa di kel asuntu. (Lé Provérbios 2:3-6.) Ten alguns situason ki Jeová ta da un órdi klaru. Pur isu, midjór disizon ki bu pode toma é obi ku kel órdi.

      Má i si Bíblia ka ta fla-nu klaru kuzê ki nu debe faze? Jeová ta kontinua ‘ta gia-u na kaminhu ki bu debe anda.’ (Isaías 48:17) Modi ki el ta faze kel-la? Ten prinsípius na Bíblia ki pode gia-u. Prinsípius di Bíblia é kes verdadi prinsipal ki ta djuda-nu ntende kuzê ki Deus ta pensa i kuzê ki el ta xinti sobri un asuntu. Txeu bês nu ta prende kuzê ki Deus ta pensa sobri un asuntu óras ki nu ta lé un stória na Bíblia. Óras ki nu ta ntende modi ki Jeová ta xinti, nu ta pode toma disizons ki ta pô-l kontenti.

      2. Na kuzê ki bu debe pensa antis di toma un disizon?

      Bíblia ta fla: ‘Ken ki é prudenti ta pensa antis di el da kada pasu.’ (Provérbios 14:15) Kel-li krê fla ma antis di nu toma un disizon, nu debe para i pensa dretu na kuzê ki sta nvolvidu. Pur isu, pergunta bu kabésa: ‘Ki prinsípius di Bíblia N pode uza na kel asuntu li? Ki disizon ta pô-m ta xinti pas déntu mi? Modi ki nha disizon ta afeta otus algen? I más inportanti inda, el ta poi Jeová kontenti ku mi?’ — Deuteronómio 32:29.

      Jeová ten direitu di fla-nu kuzê ki é dretu i kuzê ki é mariadu. Sima nu ta ba ta konxe se leis i prinsípius midjór i nu sta disididu na sigi-s, nu ta trena nos konsénsia. Konsénsia é kapasidadi ki nu ten déntu nos ki ta fla-nu kuzê ki é dretu i kuzê ki é mariadu. (Romanos 2:14, 15) Un konsénsia trenadu ta djuda-nu toma bons disizon.

      SABE MÁS

      Prende modi ki prinsípius di Bíblia i nos konsénsia ta djuda-nu toma bons disizon.

      3. Dexa Bíblia gia-u

      Modi ki prinsípius di Bíblia pode gia-nu óras ki nu ta toma disizons? Odja VÍDIU, i dipôs pâpia sobri kes pergunta li:

      VÍDIU: Dexa prinsípius di Bíblia gia bu vida (5:54)

      • Ki prezenti Jeová da-nu?

      • Pamodi ki Jeová da-nu kapasidadi pa nu toma nos própi disizon?

      • Kuzê ki el da-nu pa djuda-nu toma bons disizon?

      Pa bu odja un izénplu di un prinsípiu di Bíblia, lé Efésios 5:15, 16. Dipôs pâpia sobri modi ki bu pode uza bu ‘ténpu di midjór manera’ pa bu. . .

      • lé Bíblia tudu dia.

      • bira un maridu, un mudjer, un pai, un mai ô un fidju midjór.

      • sisti runion na kongregason.

      4. Trena bu konsénsia pa toma bons disizon

      Óras ki nu ta atxa un órdi klaru na Bíblia sobri un asuntu, pode ser más fásil sabe ki disizon nu debe toma. Má i óras ki Bíblia ka ta fla klaru kuzê ki nu debe faze? Odja VÍDIU, i dipôs pâpia sobri kel pergunta li:

      VÍDIU: ‘Mante un bon konsénsia’ (5:13)

      • Na vídiu, kuzê ki kel irman faze pa trena se konsénsia i toma un disizon ki ta poba Jeová kontenti?

      Pamodi ki nu ka debe pidi otus algen pa toma disizons pa nos? Lé Hebreus 5:14, i dipôs pâpia sobri kes pergunta li:

      • Pode parse ma é más fásil pidi otus algen pa toma disizons pa nos. Má kuzê ki kada un di nos debe sabe?

      • Kuzê ki pode djuda-u trena bu konsénsia i toma bons disizon?

      Un algen sta ta konduzi un karu na un strada. Kel GPS ki el tene se frenti ta djuda-l kontinua na kaminhu dretu.

      Sima un mapa ta sirbi pa orienta-nu, nos konsénsia ta djuda-nu orienta nos vida

      5. Ruspeta konsénsia di otus algen

      Anos é ka igual ku kunpanheru, pur isu nu ka ta toma mésmu disizon. Modi ki nu pode mostra ma nu ta ruspeta konsénsia di otus algen? Odja dôs situason:

      Primeru situason: Un irman ki gosta di uza makiaji ta muda pa un kongregason ki txeu irman ta xinti inkomodadu óras ki un algen ta uza makiaji.

      Lé Romanos 15:1 i 1 Coríntios 10:23, 24, i dipôs pâpia sobri kes pergunta li:

      • Ku bazi na kes versíklu li, kuzê ki kel irman pode disidi faze? Kuzê ki bu ta fazeba si bu staba djuntu ku un algen ki se konsénsia ka ta dexa-l faze un kuza ki bu konsénsia ta dexa-u faze?

      Sugundu situason: Un irmon sabe ma Bíblia ka ta fla ma é mariadu bebe bebida alkólika na limiti, má simé el ta disidi ka bebe. El ta konvidadu pa un konvíviu i el ta odja irmons ta bebe.

      Lé Eclesiastes 7:16 i Romanos 14:1, 10, i dipôs pâpia sobri kes pergunta li:

      • Ku bazi na kes versíklu li, kuzê ki kel irmon pode disidi faze? Kuzê ki bu ta fazeba si bu odja un algen ta faze un kuza ki bu konsénsia ka ta dexa-u faze?

      Kuzê ki ta djuda-u toma bons disizon?

      A woman praying.

      1. Pidi Jeová pa djuda-u disidi kuzê ki bu ta faze. — Tiago 1:5.

      Kel mésmu mudjer sta uza Bíblia, publikasons i un konputador pa faze piskiza.

      2. Faze piskiza na Bíblia i na publikasons pa bu atxa prinsípius ki bu pode uza. Tanbê bu pode pâpia ku irmons ki ten más spiriénsa.

      Kel mésmu mudjer sta ta pensa.

      3. Pensa na modi ki bu disizon ta afeta bu konsénsia i konsénsia di otus algen.

      ALGUNS ALGEN TA FLA: “Ka bu liga kuzê ki otus algen ta pensa. Vida é di bo i bu ta faze kuzê ki bu krê.”

      • Pamodi ki nu debe preokupa ku kuzê ki Deus i otus algen ta xinti?

      REZUMU

      Nu ta toma bons disizon óras ki nu ta sabe kuzê ki Jeová ta pensa sobri un asuntu, i modi ki kes kuza ki nu ta faze pode djuda ô prujudika otus algen.

      Perguntas di rezumu

      • Modi ki bu pode toma disizons ki ta poi Jeová kontenti?

      • Modi ki bu pode trena bu konsénsia?

      • Modi ki bu pode mostra ma bu ta ruspeta konsénsia di otus algen?

      Sprimenta faze kel-li

      DJOBE MÁS

      Modi ki bu pode toma disizons ki ta djuda-u bira más amigu di Deus?

      “Toma disizons ki ta onra Deus” (Sentinéla, 15 di abril di 2011)

      Ntende midjór modi ki Jeová ta da-nu konsedju.

      Jeová ta gia se povu (9:50)

      Odja kuzê ki djuda un ómi toma un disizon difísil.

      Jeová ta da-nu tudu kel ki é bon (5:46)

      Prende más sobri modi ki bu pode poi Jeová kontenti óras ki el ka ta da un órdi klaru sobri un asuntu.

      “Nu meste sénpri di un régra di Bíblia?” (Sentinéla, 1 di dizenbru di 2003)