Modi ki bu pode ben vive na kel mundu novu?

Kes artigu ki pasa, mostra ma ka ta dura, Deus ta ben kaba ku es mundu mau i tudu se prublémas. Nu pode ten sertéza ma kel-li ta ben kontise. Pamodi? Pamodi Bíblia, ki é Palavra di Deus, ta promete:

‘Mundu sta ta pasa.’— 1 JOÃO 2:17.

Nu pode ten sertéza ma algen ta ben skapa, pamodi kel mésmu testu di Bíblia tanbê ta promete:

‘Ken ki ta faze vontadi di Deus ta kontinua pa tudu ténpu.’

Nton, pa nu skapa, nu meste faze vontadi di Deus. Má, pa nu sabe kal ki é vontadi di Deus, nu meste konxe-l primeru.

‘KONXE DEUS’ PA BU PODE SKAPA NA FIN DI MUNDU

Fotus: 1. Un infermera kansadu sta xintadu na txon di ospital. 2. Na se intervalu el sta odja se koléga di trabadju kontenti ta lé un revista. 3. Se koléga sta le-l un testu di Bíblia i sta da-l un karton di kontatu di jw.org.

Jizus fla: ‘Vida pa tudu ténpu é kel-li: pa es konxe-u abo, úniku Deus verdaderu’. (João 17:3) Pa nu skapa na fin di mundu i vive pa tudu ténpu, nu meste ‘konxe Deus’. Kel-li é mutu más di ki sô sabe ma Deus ta izisti ô sabe algun kuza sobri el. Nu meste ser se amigu. I modi ki nu pode faze kel-li? Si nu krê ten un amizadi fórti ku un algen, nu meste pasa ténpu ku el. Tanbê ta kontise mésmu kuza ku nos amizadi ku Deus. Nu meste tra ténpu pa nu bira se amigu. Odja alguns verdadi prinsipal di Bíblia ki ta djuda-nu ten i mante un amizadi fórti ku Deus.

Verdadis ki nu ta prende na Bíblia

Nu prende ma Deus kreba pa nu vive na un Paraízu.

Kantu Deus kria kel primeru ómi ku kel primeru mudjer, Adon ku Eva, el pô-s na un lugar bunitu ki txomaba jardin di Éden. Es éra perfetu i Deus da-s tudu kel ki es mesteba pa es tinha un vida filís. Es tinha xansi di viveba pa tudu ténpu. Si es kontinuaba ta ser amigu di Deus, es ka ta moreba nunka más. Má, es disidi ka obi ku un órdi sinplis ki Deus daba es.

Nu ta prende pamodi ki ten txeu sufrimentu.

Kantu kel primeru ómi, Adon, ka obi ku Deus, el perde xansi di vive pa tudu ténpu. Tanbê tudu kes algen ki ben dipôs di el fika prujudikadu. Bíblia ta fla: ‘Pekadu entra na mundu pamodi un ómi, i mórti entra pamodi pekadu, di es manera mórti spadja pa mundu interu’. (Romanos 5:12) Sima un algen pode nase ku un prubléma di saúdi ki se pai ku se mai ten, kes fidju di Adon nase inperfetu. Pamodi kel-li, nos tudu ta bira bédju i nu ta móre.

Nu ta prende kuzê ki Deus faze pa djuda-nu.

Bíblia ta fla: ‘Deus ama mundu di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida pa tudu ténpu.’ (João 3:16) Deus manda Jizus pa ben Téra pa da se vida pa nos. Ta pensa na kel amor di Deus, un ómi di 86 anu ki ta mora na Índia, ki txoma Prabakar, fla: “Kuzê ki Jeováa faze ta mostra ma el ta ama-m txeu. É kel amor li ki ta da-m speransa di vive pa tudu ténpu.”

Nu ta prende modi ki nu ta mostra ma nu ta da valor pa kuzê ki Deus faze pa nos.

Bíblia ta fla ma nu pode mostra gratidon pa kuzê ki Deus faze pa nos, óras ki nu ta ‘obi ku se mandamentus.’ (1 João 2:3) Pamodi amor, Jeová ta inxina-nu kuzê ki nu debe faze pa nu ten un vida filís gósi. (Isaías 48:17, 18, nóta di rodapé) Deus ka krê pa nu sufri. El promete ma si nu obi ku se orientasons, nu pode ten un vida filís gósi i xansi di vive pa tudu ténpu.

LÉ PALAVRA DI DEUS TUDU DIA

Na rua di ospital, kel mésmu infermera sta ta odja pa séu dipôs di lé Bíblia na óra di almosu. — Si bu faze orason i bu faze vontadi di Deus, bu ta konsigi skapa na fin di kel mundu li.

Pa nu kontinua ta vive, nu meste kume tudu dia. Má Jizus fla: ‘Ómi ka debe vive sô di pon, má di tudu palavra ki ta ben di bóka di Jeová.’ — Mateus 4:4.

Nu ta atxa palavras di Jeová na Bíblia. Óras ki nu ta lé kel livru li, ki é sagradu, nu ta prende kuzê ki Deus dja faze pa nos, kuzê ki el sta ta faze i kuzê ki el ta ben faze na futuru.

PIDI DEUS PA DJUDA-U

Pode ser ki nu krê obi ku Deus, má nu ta atxa difísil di faze kel ki é dretu. Kuzê ki bu pode faze na kel situason li? Si bu konxe Deus, kel-li ta djuda-u txeu.

Odja izénplu di un mudjer ki nu pode txoma di Sakura. El ta lebaba un vida mariadu. Kantu el kumesa ta studa Bíblia, el prende ma Deus ta fla pa nu ‘fuji di konportamentu seksual mariadu’. (1 Coríntios 6:18) Sakura faze orason pa Deus pa el pidi ajuda i el konsigi para di faze kes kuza mariadu. Má simé, inda el tinha ki lutaba kóntra tentason. El fla: “Óras ki N ta ten pensamentus mariadu, N ta abri nha korason lógu na orason, pamodi N sabe ma N ka ta pode vense kel-li mi sô. Puder di orason sta ta pô-m bira más amigu di Jeová.” Sima Sakura, milhons di algen sta ta konxe Deus. El sta ta da-s forsa ki es meste pa es faze mudansas na vida i vive di un manera ki ta agrada-l. — Filipenses 4:13.

Kantu más bu konxe Deus, el ta konxe-u más dretu i bu ta bira se amigu. (Gálatas 4:9; Salmo 25:14) Pamodi kel-li bu ta ben ten xansi di vive na kel mundu novu di Deus. Má, modi ki ta ben ser kel mundu novu? Kel otu artigu ta ben pâpia di kel-li.

a Bíblia ta mostra ma Jeová é nómi di Deus.