LISON 56

Djuda kongregason kontinua unidu

Formatu di livru na papel

Óras ki nu ta sta djuntu ku nos irmons, nu ta xinti sima rei Davidi ki fla: ‘Nhos odja! Modi ki é bon i sábi dimás pa irmons vive djuntu i unidu!’ (Salmo 133:1) Nos union ka ta kontise di el pa el. Kada un di nos ten ki djuda pa kongregason kontinua unidu.

1. Kuzê ki é bunitu na povu di Deus?

Si bu sisti runion na un otu país, talvês bu pode ka ntende kel língua, má bu ta xinti ses amor. Pamodi? Pamodi nu ta uza kes mésmu publikason pa studa Bíblia na kalker lugar. Tanbê nu ta sforsa pa nu mostra amor pa kunpanheru. Ka ta nporta na undi nu ta mora, nos tudu nu ta ‘invoka nómi di Jeová, pa nu adora-l unidu’. — Sofonias 3:9.

2. Kuzê ki bu pode faze pa kongregason kontinua unidu?

‘Nhos ama kunpanheru txeu i di korason’. (1 Pedro 1:22) Modi ki bu pode sigi kel konsedju li? Envês di konsentra na fadja di otus, nu debe konsentra na kes bon kualidadi ki es ten. Envês di sta sô djuntu ku kes algen ki gosta di mésmu kuza ki bo, tenta konxe irmons ku irmans ki é diferenti di bo. Tanbê, nu debe sforsa pa rinka di nos korason kalker sentimentu mariadu ki nu pode ten kóntra otus. — Lé 1 Pedro 2:17.a

3. Kuzê ki bu ta faze óras ki bu ten un prubléma ku un irmon?

Anos é unidu, má anos é inperfetu tanbê. Alvês nu ta fika diziludidu ô ti maguadu ku kunpanheru. Pur isu, Palavra di Deus ta fla-nu pa nu ‘kontinua ta púrdua kunpanheru’. Tanbê el ta fla: ‘Sima Jeová púrdua nhos di korason, nhos tanbê nhos faze mésmu kuza.’ (Lé Colossenses 3:13.) Nu ta mágua Jeová un monti bês, má simé el ta purdua-nu. Nton, el ta spéra pa nu púrdua nos irmons. Si bu da kónta ma bu mágua un algen, pâpia ku el i tenta rezolve kel asuntu. — Lé Mateus 5:23, 24.b

SABE MÁS

Pensa na kuzê ki bu pode faze pa djuda kongregason kontinua unidu i na pas.

Dizenhus: Un irmon ta poi pas. 1. Un irmon ta pâpia mariadu ku el. 2. El sta ta pensa sobri kuzê ki kel irmon fla-l. 3. El sta ta pensa na kuzê ki Bíblia ta fla ma nu debe faze óras ki un algen ofende-nu. 4. El sta djuntu ku kel irmon ta bebe kafé i poi pas. — Kuzê ki bu pode faze pa mante pas?

4. Vense diskriminason

Nu krê ama tudu nos irmon. Má alvês, pode ka ser fásil nu faze amizadi ku kes algen ki ta parse ma es é diferenti di nos. Kuzê ki pode djuda-nu? Lé Atos 10:34, 35, i dipôs pâpia sobri kes pergunta li:

Jeová ta seta tudu tipu di algen pa ser se Tistimunha. Modi ki kel-li debe afeta manera ki bu ta trata kes algen ki é diferenti di bo?
Ki tipu di diskriminason bu ta kustuma odja na undi bu ta mora? Pamodi ki bu debe ivita-s?

Lé 2 Coríntios 6:11-13, i dipôs pâpia sobri kel pergunta li:

Kuzê ki bu pode faze pa bu ser más amigu di kes irmon ki é diferenti di bo?

5. Púrdua di korason i poi pas

Jeová sta sénpri prontu pa purdua-nu, nbóra nunka el ka meste pa nu purdua-l. Lé Salmo 86:5, i dipôs pâpia sobri kes pergunta li:

Ti ki pontu Jeová ta purdua-nu?
Pamodi ki bu ta fika kontenti ku se perdon?
Na ki situasons pode ser difísil sta na pas ku otus algen?

Modi ki nu pode imita Jeová i kontinua unidu ku nos irmons? Lé Provérbios 19:11, i dipôs pâpia sobri kel pergunta li:

Óras ki un algen xatia-u ô ofende-u, kuzê ki bu pode faze pa midjora kel situason?

Alvês nu ta ofende otus algen. Óras ki kel-li kontise, kuzê ki nu debe faze? Odja VÍDIU, i dipôs pâpia sobri kel pergunta li:

VÍDIU: Faze pas ta traze-nu txeu benson (6:01)

Na vídiu, kuzê ki kel irman faze pa poi pas?

6. Odja kes bon kualidadi ki bus irmon ten

Sima nu ta ba ta konxe nos irmons más midjór, nu ta pasa ta odja ses bons kualidadi i ses frakézas. Modi ki nu pode konsentra na ses bons kualidadi? Odja VÍDIU, i dipôs pâpia sobri kel pergunta li:

VÍDIU: Bira un algen más bunitu! (5:10)

Kuzê ki pode djuda-u odja kes kualidadi bunitu ki bus irmon ten?

Jeová ta konsentra na kes bon kualidadi ki nu ten. Lé 2 Crónicas 16:9a, i dipôs pâpia sobri kel pergunta li:

Jeová ta konsentra na kes bon kualidadi ki bu ten. Modi ki kel-li ta pô-u ta xinti?

Un anel di diamanti. — Ti un diamanti bunitu ten defetu na el, má simé el ta kontinua ku txeu valor. Di mésmu manera, tudu nos irmons é inperfetu, má es ten txeu valor pa Jeová.

ALGUNS ALGEN TA FLA: “Kel ki el faze-m ka ta da pa púrdua.”

Pamodi ki nu debe sta prontu pa púrdua?

REZUMU

Bu pode djuda kongregason kontinua unidu óras ki bu ta púrdua i bu ta mostra amor pa tudu irmon.

Perguntas di rezumu

Modi ki bu pode vense diskriminason?
Kuzê ki bu ta faze si bu ten un prubléma ku un irmon?
Pamodi ki bu krê imita izénplu di Jeová na púrdua otus?

Dia ki N tirmina kel lison li:

Sprimenta faze kel-li

Si pa bo é difísil da dretu ku un irmon, tenta konxe-l midjór i tenta odja kes bon kualidadi ki el ten.

Sprimenta tanbê:

Otu kuza pa bu sprimenta

DJOBE MÁS

Prende modi ki un di kes ilustrason di Jizus pode djuda-nu ivita julga otus.

Tra kel viga di bu odju (6:56)

Si nu ta atxa ma nu ka faze nada mariadu, nu meste pidi diskulpa simé?

Pidi diskulpa ta djuda txeu na faze pas ku otus algen (Sentinéla, 1 di novenbru di 2002)

Odja modi ki alguns algen prende trata tudu algen igual.

Ka bu julga pa kuzas ki bu ta odja (5:06)

Odja modi ki bu pode rezolve un prubléma ku un algen antis di kel situason tra pas na kongregason.

“Rezolve prublémas ku amor” (Sentinéla, maiu di 2016)

a Na párti PRENDE MÁS n^u 6 odja modi ki amor ta pô-nu ivita pasa otus algen un duénsa ki ta pega.

b Párti PRENDE MÁS n^u 7 ta pâpia sobri modi ki nu pode rezolve asuntus ki ten aver ku nogósiu i leis.