Arkiólogus diskubri próvas ki ta mostra ma Rei Davidi izistiba mê

Di akordu ku Bíblia, Davidi éra un Rei di Israel ki vive na anus 1000 A.J. i se disendentis governa pa txeu ténpu. Má, alguns krítiku ta fla ma Davidi ka izistiba i ma kes stória sobri el inventadu. Davidi izistiba mê?

Na anu di 1993, un arkiólogu, ki txoma Avraham Biran, i se ekipa, diskubri un padás di pédra na Tel Dan, ki ta fika na nórti di Israel, skrebedu ‘Kaza di Davidi’. Kel-li skrebedu na anus 800 A.J. i ku létras antigu di povu semita, ki éra un povu ki ben di fidju di Nué, ki txomaba Sen. Talvês el ta fazeba párti di un státua ki kel povu arameu faze pa es ngaba di ses vitória kóntra kes israelita.

Un artigu, ki publikadu na Bible History Daily, ta fla: “Alguns algen ka fika konvensidu ku kes palavra ‘Kaza di Davidi’. . . Má maioria di studiozus di Bíblia i arkiólogus konkorda lógu ma kel padás di pédra di Tel Dan, foi kel primeru próva ki ta konvense algen ma Rei Davidi izistiba mê. Pamodi kel-li, el é un di kes kuza prinsipal ki dja diskubridu na arkiolojia sobri Bíblia i ki dja publikadu na revista BAR [Biblical Archaeology Review].”