VIVE SIMA UN KRISTON

Novu párti na runion di meiu di simana

Na janeru di 2018, nu ta kumesa ta uza na runion na meiu di simana, kel idison di studu di Tradução do Novo Mundo das Escrituras Sagradas (nwtsty) ki sta na internet, nbóra inda nu ka ten el na kabuverdianu. Nu ta ben uza kes nóta di studu, kes fotu i kes vídiu ki sta na el. Bu pode ten sertéza, ma kes informason li ta ben djuda-u pripara pa runion más midjór. Más inportanti inda, bu ta fika más amigu di Jeová ki é nos Pai ki ta ama-nu txeu!

NÓTAS DI STUDU

Nótas di studu ta ben uza informasons sobri língua, kultura ô lugaris undi kes algen staba, pa djuda-nu ntende midjór txeu testu di Bíblia.

Mateus 12:20

Un pabiu ki inda sta ta bota fumu: Lánpida ki pesoas ta uzaba na kaza na kel ténpu éra un vazu pikinoti di baru. Es ta poba azeti déntu di el i un pabiu fetu di linhu ta txupaba kel azeti pa lumi ka paga. Na língua gregu palavra ‘pabiu ki sta bota fumu’, pode ser un lánpida ki sta kuazi ta paga ô dja paga, má ki inda sta bota fumu pamodi kel pabiu inda sta ta kema. Profesia di Isaías 42:3 flaba ma Jizus ta ben xintiba péna di algen. Nunka el ka ta pagaba kel últimu speransa di un algen umildi i di kes oprimidu.

Mateus 26:13

Verdadi: Na língua gregu verdadi ta fladu amén. I na língua ebraiku kel palavra amén ta skrebedu di mésmu manera ki el ta fladu na gregu. Palavra amén ta siginifika “N sta di akordu”. Jizus txeu bês ta uzaba kel palavra li antis di el flaba un kuza inportanti, un promésa ô un profesia. Kel-li éra un manera pa el mostraba ma kuza ki el staba ta fla éra verdadi i kenha ki sta obiba pode kunfiaba na el. Alguns ta fla ma ka ten ningen ki uza palavra ‘verdadi’ ô amén sima Jizus uza, nen na Bíblia nen na otus livru sagradu. Óras ki ta ripitidu palavra amén dôs bês, sima nu ta atxa na ivanjelhu di João, el ta traduzidu pa otu palavra: ‘ku tudu sertéza’. — Jo 1:51.

VÍDIUS, FOTUS I DIZENHUS

Fotus, dizenhus, vídius sen son i animasons ta djuda-nu odja i ntende txeu di kes kuza ki sta skrebedu na Bíblia.

Betfajé, Monti di Olivera i Jiruzalen

Kel vídiu li ta mostra un strada ki es pode uzaba di ladu lésti pa ba Jiruzalen. Kel strada ki ta parse na vídiu ta kumesa na un zóna ki txoma At-Tur (talvês é undi ta fikaba kel Betfajé, ki Bíblia ta pâpia di el) i el ta bai ti un di kes lugar más altu di Monti di Olivera. Betánia ta fika na ladu lésti di Betfajé, pértu di Monti di Olivera. Kantu Jizus ku se disiplus ta baba Jiruzalen, es tinha ábitu di durmiba na Betánia, undi ki oji ta fika sidadi di el-ʽAzariyeh (Al ʽEizariya). Kel nómi li na língua árabi siginifika “Lugar di Lázaru”. Bíblia ta fla ma Jizus ta fikaba na kaza di un ómi ki txomaba Lázaru, ki ta moraba djuntu ku se irmans, Marta ku Maria. (Mt 21:17; Mr 11:11; Lu 21:37; Jo 11:1) Kantu Jizus sai di kaza di Lázaru ki ta fikaba na Betánia pa el bai Jiruzalen, talvês el ta pasaba na un strada sima kel ki ta parse na vídiu. Na dia 9 di mês di nizan di anu 33, kantu Jizus pasa pa Monti di Olivera i el bai Jiruzalen montadu na un buru pikinoti, di sertéza el sai di Betfajé i el anda na kel strada li, ti txiga Jiruzalen.

Strada ki ta bai di Betánia ti Betfajé
Betfajé
Monti di Olivera
Vali di Sédron
Monti di ténplu

Prégu na un osu di kalkanhada

Kel-li é fotu di un osu di kalkanhada di algen ki pregadu ku un prégu di féru di 11,5 cm. Kel osu orijinal atxadu na 1968, kantu es staba ta koba na nórti di Jiruzalen. Kel osu é désdi ténpu ki Roma staba ta manda. Kuza ki es atxa ta prova ki tipu di prégu es ta uzaba pa prega algen na un staka di madera ti ki móre. Prégus ki kes trópa di Roma uza pa prega Jizus Kristu na staka pode ser sima kel ki sta na fotu. Kel pésa orijinal atxadu na un kaxa di pédra undi ki es ta poba osu di algen ki moreba, dipôs ki korpu dja disfazeba. Kel-li ta mostra ma kes algen ki es mataba na staka, tanbê es ta poba es na sipultura, sima kontise ku Jizus. — Mt 27:35.