I si N faze un kuza ki nha pai ku nha mai fla-m pa N ka faze?

Kuazi tudu família ten régras, sima óra di volta pa kaza, kantu ténpu ki pode gastadu ta uza aparelhus iletróniku i manera di konporta.

I si bu faze un kuza ki bu pai ku bu mai fla-u pa bu ka faze? Bu ka pode muda kuzê ki kontise, má bu pode ivita pa kel situason piora. Kel artigu li ta mostra-u modi ki bu pode faze kel-li.

• Kuzê ki bu ka debe faze

• Kuzê ki é midjór

• Kuzê ki otus jóven ta fla

Kuzê ki bu ka debe faze

• Si bu pai ku bu mai ka sabe ma bu faze un kuza ki es fla-u pa bu ka faze, bu pode xinti tentadu na sukundi kuzê ki kontise.

• Si bu pai ku bu mai sabe ma bu faze un kuza ki es fla-u pa bu ka faze, bu pode xinti tentadu na ranja diskulpa ô na poi kulpa na otu algen.

Má ninhun di kes kuza li é ka bon. Pamodi? Pamodi tenta sukundi kuzê ki kontise ô inventa diskulpa é un atitudi ki é ka di algen maduru. Kel-li sô ta mostra bu pai ku bu mai ma inda bu ten txeu pa prende.

“Konta mintira nunka é ka un bon soluson. Verdadi sénpri ta diskubridu i kastigu ta ser más grandi di ki si bu kontaba verdadi lógu.” — Diana.

Kuzê ki é midjór

• Rekonhese bu éru. Bíblia ta fla: ‘Ken ki ta sukundi se pekadus ka ta ten bons rezultadu’. (Provérbios 28:13) Bu mai ku bu pai sabe ma bu ka ta konsigi ser perfeitu. Má bu ta konsigi ser onéstu?

  “É más fásil bu pai ku bu mai purdua-u si bu konta-s verdadi. Óras ki bo é sinseru, es ta kunfia na bo más txeu.” — Olívia.

• Pidi diskulpa. Bíblia ta fla: “Nhos bisti di umildadi”. (1 Pedru 5:5) Nu meste ser umildi pa nu pidi diskulpa sen fika ta inventa diskulpa.

  “Konsénsia di kes algen ki sta kustumadu na inventa diskulpa ta bira kada bês más duru. Ku ténpu, es ka ta xinti kulpadu nen un bokadinhu pamodi kuza mariadu ki es faze.” — Heather.

• Seta rezultadu di kuzê ki bu faze. Bíblia ta fla: ‘Nhos obi ku disiplina’. (Provérbios 8:33) Ivita rasmunga i seta kastigu ki bu pai ku bu mai da-u.

  “Kantu más bu kexa di kastigu ki bu dadu, más piór bu situason ta fika. Ranja manera di seta kastigu i ka bu konsentra na kuzê ki bu perde.” — Jason.

• Sforsa pa bu torna ganha kunfiansa di bu pai ku bu mai. Bíblia ta fla: “Nhos debe bandona kel manera di ser bédju, ki sta di akordu ku nhos konportamentu ki nhos tinha antis”. (Efézius 4:22) Kumesa ta toma bons disizon, asi pa bu pai ku bu mai kunfia na bo otu bês.

  “Si bu toma bons disizon i bu mostra bu pai ku bu mai ma bu ka krê torna faze kel mésmu éru, ku ténpu es ta pasa ta kunfia na bo otu bês.” — Karen.

KONSEDJU: Pa bu mostra ma bu merese kunfiansa, faze más di ki kel ki bu ta pididu. Pur izénplu, di prósimu bês ki bu bai pa algun lugar, txoma bu pai ku bu mai óras ki bu sta volta pa kaza, pa bu fla-s ma bu sta ta txiga. Faze kel-li sikrê bu ka ta txiga atrazadu. Kel-li ta djuda-s intende ma bu krê pa es kunfia na bo otu bês.