Na un sidadi ki txomaba Ur, pértu di Babel, pesoas ta adoraba otus deus ki ka éra Jeová. Má tinha un ómi na sidadi di Ur ki ta adoraba sô Jeová. Se nómi éra Abraon.

Jeová fla Abraon: ‘Dexa bu kaza ku bu família i bai pa un lugar ki N ta mostra-u.’ Dipôs Deus promete-l: ‘Bu ta ben bira un nason grandi i pamodi bo N ta ben faze kuzas bon pa txeu algen na mundu interu.’

Abraon ka sabeba pa undi ki Jeová krê mandaba el, má el kúnfia na Jeová. Nton Abraon, ku se mudjer Sara, se pai Téra i se subrinhu Ló ruma ses kuzas i es kumesa ses viaji pa un lugar lonji.

Abraon tinha 75 anu kantu el ku se família txiga na kel lugar ki Jeová krê mostraba el. Kel lugar txomaba Kanan. Dipôs ki es txiga la, Deus pâpia ku Abraon i el faze-l kel promésa li: ‘Tudu kel lugar ki bu sta ta odja li, N ta ben da bus fidju el.’ Má Abraon ku Sara dja staba bédju i es ka tinha ninhun fidju. Nton, modi ki Jeová ta kunpriba kel promésa li?

Abraon ku Sara dja tinha txeu anu kazadu. Es dexaba ses kaza sábi na Ur i es bai mora na ténda. Má Sara ka fika ta kexa, pamodi el sabeba ma faze kel ki Jeová ta fla éra midjór pa es.

Sara tinha txeu vontadi di ten un fidju, pur isu el fla Abraon: ‘Si nha npregada Agar ten un fidju, kel mininu pode ser sima ki é di meu’. Dipôs Agar ten un fidju. El txomaba Ismael.

Txeu anu dipôs, kantu Abraon tinha 99 anu i Sara tinha 89 anu, três algen bai vizita-s. Abraon konvida-s pa es diskansa dibaxu di un pé di arvi i pa es kume. Bu sabe kenha ki éra kes três algen? Es éra anjus! Es fla Abraon: ‘Na anu ki ta ben na kel ténpu li, bo ku bu mudjer nhos ta ben ten un fidju’. Sara staba déntu di ténda ta obi manenti. El ri déntu di el i el pensa: ‘Ami bédja sima N sta li, N ta pode ten un fidju própi?’

Na kel otu anu, Sara ten un fidju, sima anju di Jeová prometeba es. Abraon pô-l nómi di Izaki, ki siginifika “Rizu”.

Kantu Izaki tinha uns sinku anu, Sara odja Ismael ta faze Izaki trósa. El krê protejeba se fidju, pur isu el pidi Abraon pa tra Agar ku Ismael di djuntu ku es. Na komésu, Abraon ka krê fazeba kel-li. Má Jeová tanbê krê protejeba Izaki, pur isu el fla Abraon: ‘Obi kuzê ki Sara sta ta fla-u. Ka bu fadiga, N ta kuida di Ismael. Má é através di Izaki ki N ta ben kunpri nhas promésa ki N faze-u’.