Ló ta viveba djuntu ku se tiu Abraon na téra di Kanan. Má kómu es tinha txeu animal ka tinha lugar pa tudu es. Nton Abraon fla Ló: ‘Ka ta da pa nu kontínua ta vive djuntu na mésmu lugar. Favor, skodje un lugar ki bu krê bai i ami N ta bai pa un otu lugar.’ Abraon ka djobe midjór lugar pa el. Bu ta atxa ma el faze dretu?

Ló odja un párti bunitu di téra pértu di un sidadi ki txomaba Sudoma. Tinha txeu agu ku txeu padja verdi. Nton el skodje kel lugar i el muda pa la, el ku se família.

Gentis di Sudoma i di un sidadi pértu di la ki txomaba Gumora, éra rei di mau. Es éra tantu mau ki Jeová disidi distrui kes dôs sidadi. Má Deus krê salvaba Ló ku se família, pur isu el manda dôs anju pa aviza-s: ‘Nhos faxi! Nhos sai di sidadi! Jeová sta ben distrui kel lugar li.’

Ló ka sai lógu kel óra. El kontínua ta norôstia, ta dura ku sai. Nton anjus pega Ló, se mudjer ku ses dôs fidju-fémia na mô i es leba-s faxi pa fóra di sidadi, i es fla-s: ‘Nhos kóre pa nhos salva nhos vida! Ka nhos djobe pa tras. Si nhos djobe pa tras nhos ta móre!’

Kantu es txiga na un sidadi ki txomaba Zuar, Jeová manda lumi ku inxofri pa Sudoma ku Gumora. Kes dôs sidadi distruídu tudu. Mudjer di Ló, ka obi ku Jeová i el djobe pa tras. Sin ki el vira róstu pa tras el bira un kuluna di sal! Má Ló ku se fidjus-fémia salva pamodi es obi ku Jeová, es ka djobe pa tras. Klaru ki es fika rei di tristi pamodi mudjer di Ló ka obi ku Jeová. Nu ta prende ma é inportanti faze kuzas sima Jeová ta fla-nu.

Abraon inxina se fidju Izaki ama Jeová i kúnfia na tudu Se promésas. Má kantu Izaki tinha uns 25 anu Jeová pidi Abraon un kuza ki ta sérba txeu difísil pa el faze. Kel kuza éra kuzê?

Deus fla Abraon: ‘Favor, panha kel un fidju ki bu ten i leba-l pa un monti na téra di Moriá. Sakrifika-l i faze-l un oférta pa mi.’ Abraon ka sabia pamodi ki Jeová pidi-l pa el faze kel-la. Má simé el obi ku Jeová.

Na kel otu dia, sédu palmanhan, Abraon leba Izaki ku se dôs ajudanti pa monti di Moriá. Três dia dipôs es konsigi odja kel monti di lonji. Abraon fla se ajudantis pa spéra timenti el ku Izaki ta bai oferese un sakrifisiu. Abraon leba faka i el da Izaki lenha pa karega. Izaki pergunta se pai: ‘Undi kel animal ki nu sta bai oferese?’ Abraon responde: ‘Jeová ta ranja, nha fidju.’

Kantu es txiga na kel monti, es faze un altar. Dipôs, Abraon mara Izaki mô ku pé i el pô-l riba di altar.

Kantu Abraon labanta faka, un anju di Jeová txoma-l la di Séu: ‘Abraon! Ka bu da bu fidju pankada! Gósi dja N sabe ma bu ten fé na Deus, pamodi bu ka nega sakrifika bu fidju.’ Dipôs, Abraon odja un karneru ku txifri prézu na un planta. El dismara Izaki faxi i el sakrifika kel karneru na lugar di Izaki.

Désdi kel dia, Jeová bira ta txoma Abraon di se amigu. Bu sabe pamodi? Pamodi Abraon ta fazeba kalker kuza ki Jeová pidiba el pa faze, mésmu óras ki el ka ta ntendeba pamodi ki Jeová sta ta pidiba el kel kuza.

Jeová torna ripiti se promésa pa Abraon: ‘N ta ben abensua-u i N ta ben poi bus fidju ô disendenti ta bira txeu.’ Jeová tanbê promete ma el ta ben abensuaba tudu kes algen mansu através di família di Abraon.