Juzé éra un di kes fidju más pikinoti di Jakó. Se irmons más grandi odja ma ses pai gostaba di Juzé más txeu di ki es. Modi ki bu ta atxa ma es xinti ku kel-la? Es fika ku invéja di Juzé i ku raiba di el. Un dia, Juzé sunha ku uns kuza stranhu i el konta se irmons. Es pensa ma kel sonhu ta siginifikaba ma un dia es ta poba duedju na txon frenti di Juzé. Nton, es fika ku más raiba di el!

Un dia, irmons di Juzé staba ta kuida di ovelhas pértu di sidadi di Sikén. Jakó manda Juzé pa bai djobe modi ki es staba. Di lonji es odja Juzé ta ben i es fla kunpanheru: ‘Odja kel sunhador la ta ben. Nu mata-l!’ Es pega-l i es bota-l déntu di un braku fundu na txon. Má Judá, ki éra un di ses irmon fla: ‘Ka nhos mata-l! Nu bende-l pa el bai fika skravu.’ Nton, es bende-l pa 20 muéda di prata pa bendedoris di téra di Midian, ki staba ta bai pa Ijitu.

Dipôs, irmons di Juzé mete se ropa déntu sangi di bódi, es manda pa ses pai i es fla: ‘Kel-li é ka ropa di bu fidju?’ Nton, Jakó pensa ma un animal runhu dja mataba Juzé. El fika tristi dimás. Ningen ka konsigi konsola-l.

Na Ijitu, Juzé bendedu i el fika skravu di un ómi inportanti ki txomaba Putifar. Má, Jeová staba ta djuda Juzé. Putifar odja ma Juzé éra un bon trabadjador i un algen di kunfiansa. Poku ténpu dipôs, Juzé fika ta toma kónta di tudu kuza ki Putifar tinha.

Mudjer di Putifar odja ma Juzé éra bunitu i fórti. Tudu dia el ta pidiba Juzé pa deta ku el. Kuzê ki Juzé faze? El nega i el fla-l: ‘Nau! Kel-li é ka dretu. Nha xéfi ta kúnfia na mi i bo é se mudjer. Si N deta ku bo N ta peka kóntra Deus!’

Un dia mudjer di Putifar tenta poi Juzé ta deta ku el aforsa. El pega-l na se ropa, má Juzé sai ta kóre. Kantu Putifar ben pa kaza, se mudjer fla-l ma Juzé ataka-l. El staba ta konta mintira. Putifar fika uma xatiadu i el poi Juzé na kadiâ. Má Jeová ka skese di Juzé.

Kantu Juzé staba prézu, Faraó, rei di Ijitu, tevi un sonhu ki ningen ka konsigi splika. Un trabadjador di Faraó fla-l ma Juzé ta konsigi splikaba kuzê ki se sonhu siginifika. Kel óra, Faraó manda traze Juzé.

Faraó pidi-l pa el splika-l se sonhus. Nton Juzé fla Faraó: ‘Duránti 7 anu Ijitu ta ben ten txeu kumida, má dipôs ta ben ten 7 anu di fómi. Djobe un algen spértu pa guarda kumida, asi bu povu ka ta móre di fómi.’ Faraó responde: ‘N ta skodje-u abo! Bu ta ben ser sugundu ómi más inportanti di Ijitu!’ Modi ki Juzé konsigi splika sonhus di Faraó? É Jeová ki djuda-l.

Duránti kes 7 anu di fartura Juzé guarda kumida. Dipôs, ben fómi na tudu téra sima Juzé dja flaba. Algen di tudu lugar bai kunpra kumida na Juzé. Se pai, Jakó, obi ta fladu ma tinha kumida na Ijitu, nton el manda se 10 fidju pa bai kunpra kumida.

Kantu fidjus di Jakó txiga na Juzé, el odja lógu ma es éra se irmons. Má se irmons ka repara ma el éra Juzé. Es poi duedju na txon se dianti, sima Juzé sunhaba kantu el éra jóven. Juzé krê sabeba si se irmons ka staba runhu más. Pur isu el fla-s: ‘Anhos é algen ki ben spreta. Nhos krê sabe kal ki é frakéza di nos país.’ Es fla: ‘Nau! Anos é 12 irmon di Kanan. Un di nos irmon dja móre i kel más pikinoti fika na kaza ku nos pai.’ Nton Juzé fla: ‘N ta kridita na nhos sô si nhos traze nhos irmon más pikinoti’. Nton, es volta pa ses kaza.

Kantu kumida kaba, Jakó torna manda se fidjus pa Ijitu. Di es bês, es leba Benjamin, ses irmon más pikinoti, djuntu ku es. Pa ten sertéza ma se irmons dja mudaba, Juzé sukundi se kópu di prata na bólsa di Benjamin. Dipôs el fla ma se irmons dja furta-l kópu. Kantu ajudantis di Juzé atxa kópu na bólsa di Benjamin, ses irmon fika spantadu. Es pidi pa Juzé kastiga-s na lugar di Benjamin.

Asi, Juzé fika ta sabe ma se irmons dja mudaba. Juzé ka aguenta más i el kumesa ta txora i el fla: ‘Ami é nhos irmon Juzé. Nha pai inda sta bibu?’ Se irmons fika uma spantadu. El fla-s: ‘Ka nhos fika tristi pamodi kuza ki nhos faze-m. Deus ki manda-m pa li pa salva nhos vida. Nhos bai faxi i nhos traze nha pai pa li.’

Es volta pa kaza pa bai konta ses pai kel bon notísia i pa lebaba el pa Ijitu. Dipôs di txeu anu lonji di kunpanheru, Juzé ku se pai fika djuntu otu bês.