Muizes vive 40 anu na téra di Midian. El kaza i el ten fidjus. Un dia el staba ta kuida di se ovelhas pértu di Monti Sinai i el odja un kuza stranhu. Un pé di spinhu ta pega lumi, má el ka staba ta kema! Kantu ki Muizes txiga más pértu pa odja kuzê ki sta kontiseba, el obi un vós ta sai di meiu di kel pé di spinhu ta fla: ‘Muizes! Fika undi bu sta, ka bu txiga más pértu. Tra sandália pamodi bu sta ta poi pé na un téra sagradu.’ Éra Jeová ki sta ta papiaba ku el através di un anju.

Muizes fika ku medu, nton el tapa róstu. Kel vós fla-l: ‘N sta ta odja sufrimentu di israelitas. N ta tra-s di Ijitu i N ta leba-s pa un bon téra. É bo ki ta bai tra nha povu di Ijitu.’ Bu ka ta atxa ma Muizes fika spantadu?

Muizes pergunta: ‘Kuzê ki N debe fla óras ki es pergunta-m ken ki manda-m?’ Deus responde-l: ‘Fla-s ma é Jeová, kel Deus di Abraon, Deus di Izaki i Deus di Jakó ki manda-u bai djuda-s.’ Dipôs Muizes fla: ‘I si povu ka obi ku mi?’ Nton, Jeová da Muizes un próva ma El ta djudaba el. El fla Muizes pa bota se pô na txon. Kel pô bira un kóbra! Kantu ki Muizes pega kel kóbra na rabu, el bira pô otu bês. Jeová fla-l: ‘Óras ki bu faze es milagri, ta prova ma é mi ki manda-u’.

Muizes fla: ‘Ami N ka ta pâpia dretu’. Jeová promete-l: ‘N ta fla-u kuzê ki é pa bu fla i N ta manda Aron, bu irmon, pa djuda-u’. Kantu el ntende ma Jeová ta bai djudaba el, el panha se mudjer ku se fidjus i es volta pa Ijitu.

Israelitas podu ta trabadja duru na Ijitu, sima skravus. Jeová manda Muizes ku Aron pa bai leba kel mensaji li pa Faraó ki éra rei di Ijitu: ‘Dexa nha povu bai adora-m na dizértu’. Faraó responde ku tudu bazofaria: ‘N ka krê sabe kuzê ki Jeová fla i N ka sta dexa israelitas bai’. Nton Faraó pô-s ta trabadja inda más txeu. Jeová rezolve da Faraó un lison. Bu sabe modi? El manda 10 praga pa Ijitu. Jeová fla Muizes: ‘Faraó ka sta ta obi ku mi. Manhan di sédu el ta sta na Riu Nilu. Bai la na el i fla-l ma tudu agu di Nilu ta bira sangi pamodi el ka sta dexa nha povu sai.’ Muizes bai na Faraó sima Jeová manda-l. Faraó odja Aron ta da ku pô na Nilu i riu bira sangi. Riu kumesa ta txera fédi, pexis móre i dja ka tinha agu linpu pa bebe na Nilu. Má simé, Faraó ka dexa israelitas bai.

Dipôs ki pasa 7 dia, Jeová manda Muizes otu bês na Faraó, ku kel mensaji li: ‘Si bu ka dexa nha povu bai, Ijitu ta fika xeiu di sapu’. Kantu Faraó ka dexa povu sai otu bês, Aron labanta se pô pa riba i sapus kumesa ta parse na tudu téra di Ijitu. Es ta atxaba sapu na ses kaza, na ses kama i na ses tijéla. Sapu staba na tudu lugar! Faraó pidi Muizes pa fla Jeová pa kaba ku kel praga di sapus i el promete ma el ta dexaba israelitas bai. Nton, Jeová para kel praga i gentis di Ijitu djunta un monti di sapu mortu. Téra kumesa ta txera fédi. Má Faraó, simé ka dexa povu sai.

Dipôs, Jeová fla Muizes: ‘Aron debe da ku se pô na txon i puera ta bira moskitu.’ Kel óra moskitu bira ta parse na tudu lugar. Alguns algen di Ijitu fla Faraó: ‘Kel praga li ben di Deus’. Má simé, Faraó ka dexa israelitas sai.