Jeová fla Muizes: ‘Subi na monti. N ta ben skrebe nhas lei na tábuas di pédra i N ta da-u’. Muizes subi monti i el fika la 40 dia ku 40 noti. Timenti el staba la, Jeová skrebe kes 10 mandamentu na dôs tábua di pédra i el da Muizes.

Dipôs di algun ténpu, israelitas pensa ma Muizes ka sta voltaba más. Es fla Aron: ‘Nu meste un algen pa toma kónta di nos. Faze-nu un deus!’ Aron fla: ‘Nhos da-m oru’. El desfaze oru i el faze státua di un bixéru. Povu fla: ‘Kel bixéru li é nos deus ki tra-nu di Ijitu!’ Es kumesa ta adora bixéru i es faze un fésta. Es faze dretu? Nau, pamodi es prometeba ma es ta adoraba sô Jeová. Es ka kunpri kel promésa.

Jeová odja kuzê ki staba ta kontise i el fla Muizes: ‘Dixi bu bai djobe povu. Es ka obi ku mi i es sta ta adora un deus falsu.’ Muizes dixi di monti ku kes dôs tábua na mô.

Kantu ki el txiga pértu di kanpamentu, el obi povu ta kanta. Dipôs el odja-s ta badja i ta nbaxa dianti di bixéru. Muizes fika uma xatiadu. El bota kes dôs tábua na txon i es kebra. Kel óra el distrui kel bixéru. Dipôs el pergunta Aron: ‘Pamodi ki bu dexa povu pô-u ta faze un kuza gravi di kel-li?’ Aron fla: ‘Ka bu fika xatiadu ku mi. Bu sabe modi ki povu é. Es kreba un deus, N poi ses oru na lumi i sai un bixéru!’ Aron ka devia fazeba kel-la. Muizes subi monti otu bês pa bai pidi Jeová pa púrdua povu.

Jeová púrdua kes algen ki krê obiba ku el. Bu ntende pamodi ki éra inportanti israelitas obiba ku Muizes?

Kantu Muizes staba na Monti Sinai, Jeová fla-l pa el faze un ténda spesial, ki txomaba tabernákulu. Éra un lugar pa israelitas adoraba Jeová. Es tinha ki staba priparadu pa karega tabernákulu óras ki es ta mudaba di lugar.

Jeová fla Muizes: ‘Fla povu pa da kel ki es pode pa djuda faze tabernákulu’. Israelitas da oru, prata, kóbri, pédras di valor ku jóias. Tanbê, es da lan, linhu, pélis di animal i un monti otus kuza. Es da txeu kuza ti ki Muizes fla-s: ‘Dja txiga! Ka nhos traze más nada’.

Txeu ómi ku mudjer ki ta trabadjaba dretu, djuda faze tabernákulu. Jeová da-s sabedoria pa es trabadja. Alguns ta fazeba linha, panu i ta bordaba. Otus ta trabadjaba na pédras, na oru i na madera.

Povu faze tabernákulu sima Jeová manda-s faze. Es faze un kurtina bunitu ki ta dividiba tabernákulu na dôs párti: Lugar Santu i Lugar Rei di Santu. Na lugar Rei di Santu tinha arka di kontratu, ki fazedu di oru ku madera. Kel madera tradu di un pé di arvi ki txomaba akásia. Na lugar Santu tinha kandelabru di oru pa da lus, un méza i un altar pa kemaba insénsu. Na pátiu tinha un basia di kóbri i un altar grandi. Arka di kontratu ta lenbraba israelitas di promésa ki es faze di obi ku Jeová. Bu sabe kuzê ki é un kontratu ô un pákutu? É un promésa spesial.

Jeová skodje Aron ku se fidjus pa ser saserdótis, pa es trabadja na tabernákulu. Es tinha ki kuidaba di el i fazeba ofértas pa Jeová na el. Sô Aron, ki éra saserdóti prinsipal, ki ta entraba na lugar Rei di Santu. Un bês pa anu el ta entraba la pa faze sakrifisiu pa se pekadus, pa pekadus di se família i di tudu povu di Israel.

Tabernákulu fika prontu un anu dipôs ki israelitas sai di Ijitu. Gósi es tinha un lugar pa adora Jeová.

Jeová mostra ma el fika kontenti ku tabernákulu i el poi un núven ta parse pa riba di el. Timenti núven staba riba di tabernákulu, israelitas ta kontinuaba na kel mésmu lugar. Óras ki núven labantaba, es ta sabeba ma éra óra di mudaba di lugar. Es tinha ki lebaba tabernákulu siparadu di povu i bai tras di kel núven.