Perguntas ki leitoris ta faze

Eclesiastes 5:8 sta pâpia sô di govérnus di ómi ô el sta pâpia di Jeová tanbê?

Kel versíklu li ta fla: ‘Si bu odja na bu zóna, un póbri ta abuzadu di el ô violason di justisa i di kel ki é dretu, ka bu fika spantadu. Pamodi kel ki ten autoridadi sta ta odjadu pa otu algen ki é más grandi ki el i ten otus algen ki inda ten más autoridadi ki es.’ — Ecl. 5:8.

Óras ki nu ta lé kel testu li, nu pode atxa ma el sta ta pâpia di kes ómi ki ten autoridadi na govérnu. Má si nu pensa más dretu na kel testu, nu ta odja ma el ten tanbê un verdadi sobri Jeová ki ta konsola-nu i ki ta anima-nu.

Eclesiastes 5:8 sta pâpia di un governanti ki ta maltrata kes algen póbri i ki ka ta trata-s ku justisa. Kel governanti li debe lenbra ma talvês el sta ta odjadu pa un algen ki ten un puzison mutu más grandi ô ki ten más autoridadi na govérnu di ki el. Na verdadi, debe ten otus ki ten puzison inda mutu más grandi. É tristi di odja ma na govérnus di ómi, tudu governantis pode faze korupson i é pesoas ki ta kaba pa sufri pamodi es ka ta governa dretu.

Má, mésmu óras ki ta parse ma un situason ka ten soluson, ten un kuza ki ta konsola-nu. Jeová ta lenbra-nu ma el sta ta ‘odja kes ki ten autoridadi’ na govérnus di ómi. Nu pode pidi Jeová pa djuda-nu i bota nos karga riba di el. (Sal. 55:22; Fil. 4:6, 7) Nu sabe ma ‘odjus di Jeová ta anda pa tudu Téra, pa mostra se forsa pa kes algen ki ten korason konplétu pa el.’ — 2 Cró. 16:9.

Nu pode fla ma Eclesiastes 5:8 ta mostra kuzê ki ta kontise na govérnus di ómi: Sénpri ten un algen ku más autoridadi ki es. Más inportanti inda, kel versíklu li ta lenbra-nu ma Jeová é kel algen ki ten más autoridadi i el é más grandi. Oji el sta ta governa através di se Fidju, Jizus Kristu, ki é Rei di Reinu di Deus. Jeová ki é Tudu-Poderozu sta odja tudu kuza i el é sénpri justu i se Fidju tanbê.