Un Tistimunha di Jeová sta ta faze un diskursu di funeral

Kuzê ki Tistimunhas di Jeová ta atxa di funeral?

Kuzê ki nu ta atxa di funeral i manera ki nu ta faze-l sta di akordu ku kel ki Bíblia ta inxina, pur izénplu:

É normal fika tristi óras ki un algen ki nu ta ama móre. Pur izénplu, kes disiplu di Jizus txora i es fika tristi kantu algen ki es ta amaba móre. (Juan 11:33-35, 38; Atus 8:2; 9:39) Nton, nu ka ta atxa ma funeral é un momentu pa divirti. (Eclesiastes 3:1, 4; 7:1-4) Envês di kel-li, nu ta atxa ma é un oportunidadi pa mostra amor i konsola otus algen. — Romanus 12:15.
Kes algen ki móre ka sabe di nada. Ka ta inporta kal ki é nos rasa ô kultura, nu ka ta sigi ninhun tradison ki ten bazi na krénsa ma kes algen ki móre ta xinti algun kuza i ma es pode djuda-nu ô prujudika-nu. Nu ka ta faze kel-li pamodi é ka kel-li ki Bíblia ta inxina. (Eclesiastes 9:5, 6, 10) Kel-li ta inklui komemorason pa da ónra pa algen ki móre, faze funeral karu dimás, faze sakrifisiu pa algen mortu, pâpia ku es i faze-s pididu, i partisipa na ritual pa viúva. Nu ka ta partisipa na ninhun di kes tradison li, pamodi nu krê obi ku kuzê ki Bíblia ta fla. El ta fla: “Nhos sipara di es, nhos para di toka na kuzas inpuru”. — 2 Koríntius 6:17.
Ten speransa pa kes algen ki móre. Bíblia ta inxina ma ta ben ten un resureison i ma un dia mórti ta ben dexa di izisti. (Atus 24:15; Apokalipse 21:4) Kel speransa li djuda kes kriston na pasadu, i el pode djuda-nu tanbê ka fika tristi dimás i nen ka sigi kes tradison ki é kóntra kel ki Bíblia ta inxina. — 1 Tesalonisensis 4:13.
Nu ka debe izibi. (Provérbios 11:2) Nu ka ta atxa ma funeral é un oportunidadi di mostra ma nos é inportanti ô ma nu ten txeu dinheru. (1 Juan 2:16) Pur isu, nu ka ta faze funeral karu dimás, ku kaxon i ropa ki ta txoma atenson, pa poi otus algen ta fika dimiradu.
Nu ka ta obriga otus algen pensa sima nos sobri funeral. Na verdadi, nu ta sigi kel konsedju li: “Kada un di nos ta ben presta kónta di nos kabésa pa Deus.” (Romanus 14:12) Má si nu dadu xansi, nu ta tenta splika nos krénsa “ku brandura i ku txeu ruspetu.” — 1 Pedru 3:15.

Modi ki Tistimunhas di Jeová ta faze funeral?

Lugar: Si família disidi faze un serimónia di funeral, es pode faze-l na undi ki es atxa midjór. Pur izénplu, pode ser na Salon di Reinu, na sala di un ajénsia funerária ô di un lugar di krema korpu, na kaza di un algen ô na simitériu.

Serimónia: Ta fazedu un diskursu ki ta splika kuzê ki Bíblia ta fla sobri mórti i speransa di resureison, pa konsola família i amigus. (Juan 11:25; Romanus 5:12; 2 Pedru 3:13) Kel irmon ki sta faze diskursu pode pâpia di alguns kualidadi di kel algen ki móre i talvês mostra kuzê ki nu pode prende ku se izénplu di fé. — 2 Samuel 1:17-27.

Pode kantadu un kántiku ki ten bazi na Bíblia. (Kolosensis 3:16) Dipôs, kel serimónia ta tirmina ku un orason pa konsola kes algen ki sta la. — Filipensis 4:6, 7.

Kobra ô pidi dinheru: Nu ka ta kobra pa faze ninhun serimónia, ki ta inklui serimónia di funeral. Tanbê, na nos runion nu ka ta pidi dinheru. — Mateus 10:8.

Kes algen ki ta sisti: Kes algen ki é ka Tistimunha di Jeová pode sisti un serimónia di funeral na Salon di Reinu, sima es pode sisti kalker otu runion di Tistimunhas di Jeová.

Tistimunhas di Jeová ta sisti funeral ki otus relijion ta faze?

Kada Tistimunha di Jeová ta uza se konsénsia trenadu pa Bíblia pa disidi si el ta sisti ô nau. (1 Timótiu 1:19) Má nu ka ta partisipa na ninhun serimónia ki é kóntra kel ki Bíblia ta inxina. — 2 Koríntius 6:14-17.