Kantu kes spion di Israel txiga na sidadi di Jerikó, es fika na kaza di un mudjer ki txomaba Raabi. Rei di Jerikó da kónta i el manda trópas pa kaza di Raabi. Raabi sukundi kes dôs spion riba di se kaza i el manda kes trópa bai djobe na otu lugar. El fla kes spion: ‘N ta djuda nhos pamodi N sabe ma Jeová sta ku nhos i ma nhos ta ben toma nos téra. Favor, nhos promete-m ma nhos ta salva-m, mi ku nha família’.

Kes spion fla Raabi: ‘Nu ta promete ma nada ka ta kontise ku ningen ki sta déntu di bu kaza’. Tanbê es fla-l: ‘Poi un kórda burmedju na janéla di bu kaza, asi bo ku bu família ta salva’.

Raabi dexa kes spion dixi na un kórda pa janéla. Es bai pa montanha i es fika la três dia sukundidu. Dipôs es volta pa Juzué. Nton israelitas trabesa Riu Jurdon i es pripara pa toma téra ki Jeová promete-s. Jerikó foi primeru sidadi ki es toma. Jeová fla-s pa es da un vólta na sidadi di Jerikó un bês pur dia, duránti 6 dia. Na kel dia ki ta fazeba 7 dia, es da vólta sidadi 7 bês. Nton, saserdótis toka ses tronbéta i trópas israelita grita uma altu, ku tudu ses forsa. Kes paredi di sidadi ronba i baza tudu na txon! Má kaza di Raabi ki ta fikaba riba paredis di sidadi ka ronba. Raabi ku se família salva pamodi el kúnfia na Jeová.

Kes otu nason di Kanan fika ta sabe kuzê ki kontise ku sidadi di Jerikó. Ses rei disidi djunta pa luta kóntra israelitas. Má jibionitas rezolve faze un planu diferenti. Es bisti ropa bédju, es bai na Juzué i es fla-l: ‘Nu ben di un téra lonji. Nu obi ta fladu sobri Jeová i tudu kuza ki el faze pa nhos na Ijitu i na Moabi. Nhos promete ma nhos ka ta ataka-nu i nu ta fika ta trabadja pa nhos.’

Juzué kridita na es i el promete ma el ka ta atakaba es. Dipôs di três dia el diskubri ma es ka binha di un téra lonji. Es éra di téra di Kanan. Juzué pergunta kes jibionita: ‘Pamodi ki nhos konta-nu mintira?’ Es responde-l: ‘Nu tinha medu! Nu sabe ma nhos Deus Jeová sta ta luta pa nhos. Favor ka nhos mata-nu’. Juzué kunpri se promésa i el dexa-s vive, sima dja el prometeba es.

Poku ténpu dipôs, sinku rei di Kanan promete ataka jibionitas. Juzué ku se trópas anda noti interu pa bai salva-s. Na kel otu dia sédu palmanhan, géra kumesa. Trópas di Kanan kumesa ta fuji kada un pa se ladu. Jeová manda granizu ô pédras di jélu pa tudu lugar. Dipôs Juzué pidi Jeová pa poi sól fika paradu. Pamodi ki el pidi Jeová kel-la, si sól nunka ka fikaba paradu antis? Pamodi Juzué ta kunfiaba na Jeová. Sól ka kanba ti ki israelitas distrui tudu kes rei di Kanan i ses trópa.