Dipôs ki Juzué kuida di povu di Jeová pa txeu ténpu, el móre ku 110 anu. Duránti tudu kes ténpu ki el staba bibu, israelitas ta adoraba Jeová. Má dipôs ki Juzué móre es kumesa ta adora imajis, sima gentis di Kanan ta fazeba. Jeová dexa un rei di Kanan maltrata israelitas, pamodi es ka obi ku el. Kel rei txomaba Jabin. Povu di Israel pidi Jeová ajuda. Nton, Jeová da-s un novu líder ki txomaba Baraki. É el ki djuda povu volta pa Jeová.

Débura ki éra profetiza mandadu bai pâpia ku Baraki. Débura leba-l un mensaji di Jeová: ‘Djunta 10 mil ómi i bai nkontra ku trópas di Jabin na riu di Kizon. La bu ta bai ganha géra kóntra Sízera ki é xéfi di trópas di Jabin’. Baraki fla Débura: ‘N ta bai sô si bu bai ku mi’. Débura fla: ‘N ta bai ku bo. Má fika ta sabe ma é ka bo ki ta mata Sízera. Jeová fla ma é un mudjer ki ta mata-l’.

Débura bai ku Baraki djuntu ku se trópas pa Monti Tabor pa bai pripara pa géra. Lógu ki Sízera da kónta, el djunta se trópas ku karus di géra na rubera. Débura fla Baraki: ‘Oji é dia ki Jeová ta da-u vitória’. Nton Baraki ku se 10 mil ómi dixi di monti pa bai nkontra ku trópas di Sízera.

Nton Jeová poi riu Kizon ta fika xeiu di agu. Karus di géra di Sízera ntola na lama. Sízera sai di se karu i el kumesa ta kóre. Baraki ku se trópas kaba ku tudu trópas di Sízera, má Sizera skapa! El fuji i el bai sukundi na ténda di un mudjer ki txomaba Jael. Jael da-l leti pa el bebe i dipôs el kubri-l ku un kubérta. Sízera durmi pamodi el staba kansadu di géra. Dipôs Jael bai kétu i el mete-l un staka di ténda na kabésa. Sízera móre.

Baraki bai djobe Sízera. Jael sai di se ténda i el fla: ‘Entra déntu. N ta mostra-u kel ómi ki bu sta ta djobe’. Kantu Baraki entra el odja Sízera detadu mortu. Baraki ku Débura lova Jeová ku un múzika pamodi el djuda-s ganha géra kóntra ses inimigu. Dipôs israelitas vive na pas pa 40 anu.

Duránti ténpu ki staba fómi na Israel, un israelita ki txomaba Nuemi muda pa téra di Muabi djuntu ku se maridu i ses dôs fidju. Ku ténpu maridu di Nuemi móre. Se fidjus kaza ku mudjeris di Muabi, ki txomaba Ruti ku Orpa. Dipôs di algun ténpu, kontise un kuza tristi. Fidjus di Nuemi móre tanbê.

Kantu Nuemi obi ma fómi na Israel dja pasaba, el rezolve volta pa la. Ruti ku Orpa sai ta bai djuntu ku el, má timenti es staba na kaminhu, Nuemi fla-s: ‘Nhos foi bons mudjer pa nhas fidju i bons nóra pa mi. N krê pa nhos kaza otu bês. Nhos volta pa Muabi’. Tudu dôs fla Nuemi: ‘Nu gosta txeu di bo! Nu ka krê dexa-u’. Nuemi insisti ku es pa es volta, ti ki Orpa volta, má Ruti fika. Nuemi fla Ruti: ‘Orpa dja volta pa se povu i pa se deus. Volta ku el i nhos bai pa kaza di nhos mai.’ Má Ruti fla: ‘N ka ta bai pa N dexa-u. Bu povu ta ser nha povu i bu Deus ta ser nha Deus’. Modi ki bu ta atxa ma Nuemi xinti kantu Ruti fla-l kel-la?

Ruti ku Nuemi txiga Israel na ténpu ki es ta panhaba un kumida ki txoma sevada. Un dia, Ruti bai panha réstu di gran di sevada na txon di un ómi ki txomaba Boás, ki éra fidju di Raabi. Boás obi ma Ruti éra di Muabi i ma el ka larga Nuemi. El fla se trabadjadoris pa dexa kes réstu di gran na txon más txeu pa Ruti pode panha.

Na bóka noti, Nuemi pergunta Ruti: ‘Na txon di kenha ki bu trabadja oji?’ Ruti fla: ‘Na txon di un ómi ki txoma Boás’. Nuemi fla-l: ‘Boás é un di kes família di nha maridu. Kontínua ta trabadja na se txon djuntu ku kes otu mudjer. Ningen ka ta faze-u mal.’

Ruti kontínua ta trabadja na txon di Boás ti ki ténpu di kodjéta pasa. Boás odja ma Ruti éra un bon mudjer i trabadjadera. Na kes ténpu, si un ómi moreba sen ten fidjus, se família podia kazaba ku kel mudjer. Nton Boás kaza ku Ruti. Es ten un fidju ki txomaba Obedi, ki dipôs bira avô di Rei Davidi. Amigas di Nuemi fika uma kontenti. Es fla: ‘Primeru Jeová da-u Ruti ki trata-u dretu i gósi bu tene un nétu. Nu ten ki lova Jeová.’