Ku ténpu, Israel dexa di sirbi Jeová otu bês i es kumesa ta adora kes otu deus ki éra falsu. Duránti séti anu, gentis di Midian furta animal di israelitas i es distrui ses plantason. Pa israelitas fuji di midianitas, es sukundi na braku na rótxa i na montanhas. Es pidi pa Jeová salva-s. Nton, Jeová manda un anju pa un ómi ki txomaba Jidion. Anju fla-l: ‘Jeová skodje-u pa bu ser un ómi di géra poderozu.’ Jidion pergunta: ‘Modi ki N ta salva Israel? Ami é ka nada.’

Modi ki Jidion ta sabeba ma Jeová skodje-l? El poi un bokadinhu di lan na txon i el fla Jeová: ‘Di palmanhan, si lan fika modjadu i txon fika séku N ta sabe ma bu krê pa N salva Israel.’ Na kel otu dia sédu, lan staba modjadu i txon staba séku! Má dipôs Jidion pidi Jeová di otu manera: pa na kel otu dia di sédu, pa lan fika séku i pa txon fika modjadu. Kantu kontise sima el pidi, Jidion odja klaru ma Jeová skodje-l. El djunta se trópas pa bai géra kóntra gentis di Midian.

Jeová fla Jidion: ‘N ta poi israelitas ganha géra. Má pamodi bu tene txeu trópa, nhos pode pensa ma é nhos ki konsigi ganha géra. Fla tudu kes algen ki sta ku medu pa bai pa kaza.’ Nton 22 mil trópa bai pa kaza i fika sô 10 mil. Dipôs Jeová fla: ‘Inda bu tene txeu trópa. Manda-s bai bebe agu na riu. Fika sô ku kes ómi ki ba ta djobe inimigu timenti es sta ta bebe agu.’ Sô 300 ómi ki fika ta djobe inimigu timenti es staba ta bebe. Jeová promete ma es ta ganhaba géra kóntra 135 mil trópa di Midian sô ku kes poku ómi ki fikaba.

Duránti kel noti, Jeová fla Jidion: ‘Gósi é ténpu di ataka midianitas!’ Jidion da se trópas buzina i jaru grandi ku pó ku lumi déntu di el. El fla-s: ‘Nhos odja modi ki N ta faze i nhos faze sima mi.’ Jidion toka se buzina, kebra se jaru, el pega se pó ku lumi i el grita: ‘Spada di Jeová i di Jidion!’ Tudu se 300 ómi faze mésmu kuza. Midianitas fika ku txeu medu i es kóre kada un pa se ladu. Na kel konfuzon, es kumesa ta ataka kunpanheru. Más un bês, Jeová djuda israelitas ganha ses inimigu géra.

Un ómi israelita ki txomaba Elkana tinha dôs mudjer. Ses nómi éra Ana ku Pinina. Má Elkana gostaba más di Ana. Tudu óra Pinina ta fazeba Ana trósa, pamodi Ana ka tinha ninhun fidju i Pinina tinha un monti fidju. Tudu anu, Elkana ta lebaba se família pa bai adoraba Jeová na un lugar ki txomaba Silu. Un dia kantu es staba la, Elkana repara ma se mudjer Ana, ki el ta amaba txeu, staba txeu tristi. El fla-l: ‘Ka bu txora Ana. Bu ka ten fidju má bu ten ami. I mi N kre-u txeu!’

Más tardi, Ana bai faze orason el sô. Timenti el ta pidiba Jeová pa djuda-l el staba ta txora. Ana faze un promésa: ‘Jeová, si bu da-m un fidju, N ta da-u el i el ta sirbi-u pa tudu se vida.’

Eli, ki éra Saserdóti Prinsipal, odja Ana ta salusa i el pensa ma Ana bebeba vinhu dimás. Ana fla-l: ‘Nau, N ka bebe nau. N tene un prubléma gravi i N sta pâpia ku Jeová sobri el.’ Eli da kónta ma el pensaba mariadu i el fla-l: ‘Deus ta da-u kel ki bu krê.’ Ana xinti midjór i el bai se kaminhu. Dipôs di un ténpu, Ana ten un fidju i el pô-l nómi di Samuel. Bu ta konsigi imajina modi ki Ana fika uma kontenti?

Ana ka skese di promésa ki el faze Jeová. Sin ki el tra Samuel mama el leba-l pa bai sirbi na tabernákulu. Ana fla Eli: ‘Kel-li é kel rapazinhu ki N pidi Jeová. N ta ntrega-l pa el sirbi Jeová pa tudu se vida.’ Tudu anu Elkana ku Ana ta bai vizitaba Samuel i es ta lebaba el un ropa novu. Jeová da Ana más três fidju matxu ku dôs fidju-fémia.