Israelitas dexa di sirbi Jeová otu bês i es kumesa ta adora kes otu deus ki éra falsu. Kantu gentis di Amon ataka israelitas i luta kóntra es, kes deus falsu ka faze nada pa djuda-s. Israelitas sufri pa txeu ténpu. Ti ki enfin es fla Jeová: ‘Nu peka. Favor salva-nu di nos inimigus.’ Israelitas distrui ses imaji i es kumesa ta adora Jeová otu bês. Jeová ka krê kontinuaba ta odja-s ta sufri.

Un ómi di géra ki txomaba Jefté skodjedu pa orienta povu na géra kóntra amonitas. El fla Jeová: ‘Si bu djuda-m ganha es géra, N ta promete-u ma óras ki N volta pa kaza N ta da-u kel primeru algen ki ben nkontra ku mi.’ Jeová obi orason di Jefté i el djuda-l ganha géra.

Kantu Jefté volta pa kaza, primeru algen ki sai pa bai nkontra ku el foi se fidju-fémia. Éra sô kel un fidju ki el tinha. El bai nkontra ku el ta badja i ta toka tanbor. Kuzê ki Jefté ta fazeba? El lenbra di se promésa i el fla: ‘Ó nha fidju-fémia! Dja bu korta-m korason. N faze Jeová un promésa. Pa N kunpri-l N meste manda-u pa bu bai sirbi na tabernákulu na Silu.’ Má se fidju-fémia fla-l: ‘Papá, si bu faze un promésa pa Jeová bu ten ki kunpri-l. Tudu ki N ta pidi-u é pa bu dexa-m bai pasa dôs mês na monti ku nhas amigas. Dipôs N ta bai pa tabernákulu.’ Fidju-fémia di Jefté sirbi na tabernákulu pa réstu di se vida. Tudu anu, se amigas ta bai vizitaba el na Silu.

Eli, ki éra Saserdóti Prinsipal tinha dôs fidju ki éra saserdóti na tabernákulu. Ses nómi éra Ofni ku Fineias. Es ka ta obiba ku lei di Jeová i es ta trataba povu mariadu. Óras ki israelitas ta lebaba sakrifisiu pa Jeová, Ofni ku Fineias ta panhaba midjór karni pa es. Eli obi kuzê ki se fidjus staba na el má el ka faze nada. I Jeová? Tanbê el ka ta fazeba nada?

Samuel éra mutu más novu ki Ofni ku Fineias, má el ka ta fazeba kes kuza ki el ta odjaba es ta faze. Jeová fika kontenti ku Samuel. Un dia di noti, Samuel staba ta durmi i el obi un vós ta txoma-l. El labanta, el kóre pa Eli i el fla-l: ‘Ale-m li!’ Má Eli fla-l: ‘N ka txoma-u. Bai deta.’ Samuel bai deta otu bês. Dipôs kel vós torna txoma-l. Kantu Samuel obi vós pa tirseru bês, Eli ntende ma éra Jeová ki sta txomaba Samuel. El fla Samuel ma si vós torna txoma-l, pa el fla: ‘Pâpia, Jeová. Bu sérvu sta ta obi-u.’

Samuel torna bai deta. Nton el obi: ‘Samuel! Samuel!’ El responde: ‘Pâpia, bu sérvu sta ta obi.’ Jeová fla-l: ‘Fla Eli ma N sta bai kastiga-l djuntu ku se família. El sabe ma se fidjus sta ta faze kuzas mariadu na tabernákulu, má el ka sta ta faze nada ku es.’ Na kel otu dia di sédu, Samuel abri pórta di tabernákulu sima el ta fazeba tudu dia. El staba ku medu di fla Saserdóti Prinsipal kuzas ki Jeová manda-l fla. Má Eli txoma-l i pergunta-l: ‘Nha fidju, kuzê ki Jeová fla-u? Fla-m tudu kuza ki el fla-u.’ Nton Samuel fla Eli tudu kuza.

Sima Samuel ba ta kria, Jeová kontinua ta ser se amigu. Di un párti di téra ti kel otu párti, tudu israelitas sabia ma Jeová skodje Samuel pa ser proféta i juís.