Jeová fla Samuel: ‘Bai kaza di un ómi ki txoma Jesé. Un di se fidjus ta ben ser rei di Israel.’ Nton Samuel bai kaza di Jesé. Kantu el odja fidju más grandi di Jesé el pensa: ‘Debe ser el ki Jeová skodje.’ Má Jeová fla Samuel ma é ka éra el. Jeová torna fla-l: ‘N ta djobe kel ki algen é na korason i nau pa kel ki el ta parse pa fóra.’

Jesé traze más 6 fidju pa Samuel. Má Samuel fla-l: ‘Jeová ka skodje ninhun di es. Bu ka ten otu fidju?’ Jesé fla: ‘N ten más un, el gó é más pikinoti, el txoma Davidi. El sta ta toma kónta di nhas ovelha.’ Kantu Davidi ben, Jeová fla Samuel: ‘É el própi!’ Samuel poi ólhu na kabésa di Davidi pa mostra ma el skodjedu pa ser rei di Israel.

Algun ténpu dipôs, israelitas staba na géra ku filisteus. Filisteus tinha un ómi di géra jiganti ki staba ta luta pa es. El txomaba Gulias. Gulias tudu dia ta fazeba trósa di israelitas. El grita: ‘Nhos manda-m un ómi pa luta ku mi. Si el ganha, nu ta ser nhos skravu. Má si N ganha, nhos ta ser nos skravu.’

Davidi bai pa undi trópas di israelitas staba pa bai leba se irmons kumida. El obi Gulias ta faze trósa i el fla: ‘N ta luta ku el!’ Rei Saul fla-l: ‘Abo é un rapazinhu.’ Davidi responde: ‘Jeová ta djuda-m.’

Saul tenta poi Davidi ta uza se ropa di géra, má Davidi fla: ‘Ku es ropa li N ka ta pode briga.’ Davidi panha se funda i el bai pa riu. El skodje sinku pédra lizu i el pô-s na se bólsa. Dipôs el kóre pa Gulias. Gulias grita: ‘Ben rapazinhu, N ta bira-u kumida pa pasus i pa kes animal brabu.’ Davidi ka xinti medu. Davidi tanbê grita: ‘Bu pode ben ku spada i ku lansa, má ami N sta bai pa bo na nómi di Jeová. Bu ka sta luta kóntra nos, bu sta ta luta kóntra Deus. Tudu algen ta ben odja ma Jeová ten más puder ki un spada ô un lansa. El ta ben ntrega-u na nha mô.’

Davidi poi pédra na se funda i el tora-l ku tudu se forsa. Ku ajuda di Jeová pédra entra Gulias na tésta. Kel jiganti kai na txon mortu. Nton filisteus fuji pa salva ses vida. Bu ta kúnfia na Jeová sima Davidi?

Dipôs ki Davidi mata Gulias, Rei Saul pô-l ta kumánda se trópas. Davidi ganha txeu géra i tudu algen bira ta konxe-l. Sénpri ki Davidi ta baba pa kaza dipôs di géra, mudjeris ta saíba ta badja i ta kanta: ‘Saul mata txeu algen, má Davidi mata mutu más txeu!’ Saul kumesa ta xinti raiba di Davidi i el disidi mata-l.

Davidi ta tokaba múzika ku arpa rei di dretu. Un dia, Davidi staba ta toka arpa pa Saul. El tenta da Davidi ku lansa, má Davidi libra faxi i lansa prega na paredi. Dipôs di kel-li, Saul tenta mata Davidi txeu bês. Pur isu, Davidi fuji i el bai sukundi na dizértu.

Saul leba 3 mil trópa pa bai pega Davidi. Kontise ki el entra na mésmu kavérna ki Davidi ku se ómis staba sukundidu. Ómis di Davidi fla-l kétu: ‘Kel-li é bu xansi di mata Saul.’ Davidi bai ti Saul i el korta un padás di se ropa. Saul ka da kónta. Má Davidi fika ka sábi, el xinti ma el ka mostra ruspetu pa rei ki Deus skodjeba. El ka dexa se ómis ataka Saul. Kantu Saul sai di kavérna, Davidi txoma-l i el fla-l ma el tevi xansi di mata-l. Bu ta atxa ma Saul ta dexaba di pirsigi Davidi?

Nau. Saul kontínua ta pirsigi Davidi. Un dia di noti, Davidi ku se subrinhu ki txomaba Abizai, entra na undi ki Saul ku se trópas staba. Ti Abner, ki éra guarda kósta di Saul staba ta durmi. Abizai fla: ‘Kel-li é nos xansi! Dexa-m mata-l’. Davidi responde: ‘Jeová ta rezolve es asuntu. Dexa-m panha sô se lansa ku se jaru di agu i nu bai’.

Davidi subi na un monti ki ta fikaba pértu di undi ki Saul ku se trópas staba. El grita: ‘Abner, pamodi ki bu ka proteje bu rei? Undi ki sta jaru ku lansa di Saul?’ Saul rekonhise vós di Davidi i el fla: ‘Bu podia mataba mi, má bu ka faze-l. N sabe ma é bo ki ta ben ser rei di Israel dipôs di mi.’ Saul volta pa se palásiu. Má é ka éra tudu algen na família di Saul ki ka gostaba di Davidi.