Jonatan éra fidju más bédju di Rei Saul. El éra un ómi di géra ki tinha txeu koraji. Davidi fla ma Jonatan éra rápidu sima un ágia i fórti sima un lion. Un dia Jonatan odja trópas filisteu na un monti. El fla se ajudanti: ‘Nu ta ataka-s sô si Jeová da-nu un sinal. Si filisteus fla-nu pa nu subi, nton nu ta sabe ma nu debe ataka-s.’ Filisteus grita: ‘Nhos subi pa nu luta!’ Nton, Jonatan ku se ajudanti subi na monti i es mata 20 trópa filisteu.

Pamodi Jonatan éra fidju más bédju di Saul, éra el ki tinha direitu di sérba rei dipôs di se pai. Jonatan sabia ma Jeová skodjeba Davidi pa ser rei di Israel; má simé el ka fika ku raiba. Jonatan ku Davidi bira grandis amigu. Es promete proteje i difende kunpanheru. Jonatan da Davidi se ropa, se spada, se arku i se sintu kómu sinal di ses amizadi.

Kantu Davidi sta ta fujiba di Saul, Jonatan bai atxa-l i el fla-l: ‘Ten forsa ku koraji. Jeová skodje-u pa bu ser rei. Ti nha pai sabe di kel-li.’ Bu ka ta gostaba di ten un amigu sima Jonatan?

Más un bês, Jonatan poi se vida na prigu pa el djuda se amigu. El sabia ma Rei Saul krê mataba Davidi. Nton, el fla se pai: ‘Ta sérba un pekadu si bu mata Davidi; nada el ka faze-u.’ Saul fika uma xatiadu ku Jonatan. Ku ténpu Saul ku Jonatan móre djuntu na géra.

Dipôs ki Jonatan móre, Davidi bai djobe fidju di Jonatan ki txomaba Mefibozéti. Kantu Davidi atxa-l, el fla-l: ‘N ta toma kónta di bo duránti tudu ténpu di nha vida, pamodi bu pai éra nha grandi amigu. Bu ta bai mora na nha palásiu i bu ta kume na nha méza.’ Davidi nunka ka skese di se amigu Jonatan.

Kantu Saul móre, Davidi bira rei. El tinha 30 anu. Dipôs di uns anu ta reina, el faze un kuza gravi. Un dia di noti, na terasu di se palásiu, el odja un mudjer bunita. Davidi diskubri ma se nómi éra Batiseba i ma el éra kazadu ku un trópa ki txomaba Urias. Davidi manda traze Batiseba pa se palásiu. El ten relason seksual ku el i Batiseba fika grávida. Davidi tenta sukundi kuzê ki el faze. El fla xéfi di Urias pa pô-l na frenti di tudu trópas i óras ki géra kumesaba pa es ka protejeba el. Dipôs ki Urias móre na géra, Davidi kaza ku Batiseba.

Má Jeová odja tudu kes kuza mariadu ki kontise. Kuzê ki el ta fazeba? Jeová manda proféta Natan pa bai pâpia ku Davidi. Natan fla-l: ‘Un ómi riku tinha txeu ovelha i un ómi póbri tinha sô un ovelha pikinoti ki el gostaba txeu di el. Kel ómi riku toma kel ovelha pikinoti di kel ómi póbri.’ Davidi fika uma xatiadu i el fla: ‘Kel ómi riku li ka pode fika bibu!’ Nton, Natan fla Davidi: ‘Kel ómi riku é própi bo!’ Davidi fika rei di tristi, el seta se éru i el fla Natan: ‘N peka kóntra Jeová.’ Pekadu di Davidi traze txeu prubléma pa el ku se família. Jeová kastiga Davidi má el dexa-l bibu pamodi el éra sinseru i umildi.

Davidi krê fazeba un ténplu pa Jeová, má Jeová skodje se fidju Salumon pa faze ténplu. Davidi kumesa ta pripara kuzas pa Salumon i el fla: ‘Ténplu di Jeová debe ser grandi i rei di bunitu. Salumon inda sta pikinoti, má N ta djuda-l pripara kuzas.’ Davidi oferese txeu dinheru di sel pa faze trabadju. El atxa algen ki ta trabadjaba dretu. El djunta oru, prata i madera ki ben di Tiru i Sídon. Kantu el staba kuazi ta móre, Davidi da Salumon prujétu pa faze ténplu. El fla: ‘Jeová manda-m skrebe kes kuza li pa bo. Jeová ta djuda-u. Ka bu xinti medu. Ser fórti i kumesa ta trabadja.’