Tistimunhas di Jeová muda Bíblia pa fika di akordu ku ses krénsa?
Nau. Na verdadi, óras ki nu da kónta ma nos krénsa ka sta di akordu ku Bíblia nu ta muda nos krénsa.
Txeu ténpu antis di nu kumesa ta faze Traduson di Mundu Novu di Skrituras Sagradu na anu di 1950, dja nu ta studaba Bíblia ku kuidadu. Nu ta uzaba kalker traduson di Bíblia ki staba disponível asi pa nu sabe na kuzê ki nu debe kriditaba. Pur isu, tudu nos krénsa ten bazi na Bíblia. Odja alguns di kes krénsa más antigu di Tistimunhas di Jeová i djobe bo mê si es sta di akordu ku kuzê ki Bíblia ta inxina.
Kuzê ki nu ta kridita na el: Deus é ka un trindadi. Revista Zion’s Watch Tower (Torre de Vigia de Sião) di julhu di 1882, fla: “Nos leitor sabe ma nu ta kridita na Jeová, na Jizus i na se spritu santu. Má nu ka ta kridita na kel ensinu ma es é três Deus na un algen sô, ô sima alguns ta fla, es é un Deus na três algen.”
Kuzê ki Bíblia ta fla: “Jeová, nos Deus, é sô un Jeová.” (Deuteronómiu 6:4) “Pa nos ten sô un Deus, ki é Pai, ki tudu kuza ben di el i nu ta vive pamodi el. I ten sô un Sinhor, ki é Jizus Kristu. Tudu kuza ben através di el i nu ten vida através di el.” (1 Koríntius 8:6) Própi Jizus fla: “Nha Pai é más grandi ki mi.” — Juan 14:28.
Kuzê ki nu ta kridita na el: Ka ta izisti un inférnu di lumi pa tormenta algen pa tudu ténpu. Na revista Zion’s Watch Tower di junhu di 1882 tinha un artigu ku téma: “Pagamentu di pekadu é mórti.” Sobri kel frazi li ki sta na Romanus 6:23, kel artigu ta flaba: “Kes palavra li é klaru i sinplis. É stranhu pamodi txeu algen ki ta fla ma es ta seta ma Bíblia é Palavra di Deus ta kontinua ta fla kuzas ki ka sta di akordu ku kel frazi li. Tanbê, es ta fla ma es ta kridita i ma Bíblia ta inxina ma pagamentu di pekadu é tormentu pa tudu ténpu.”
Kuzê ki Bíblia ta fla: ‘Kel alma ki peka é el ki ta móre.’ (Ezequiel 18:4, 20) Kel kastigu final pa kes algen ki ta fika kóntra Deus é ka tormentu pa tudu ténpu, má é distruison pa tudu ténpu. — 2 Tesalonisensis 1:9.
Kuzê ki nu ta kridita na el: Reinu di Deus é un govérnu rial, é ka un kuza ki sta na nos korason. Revista Zion’s Watch Tower di dizenbru di 1881 fla kel-li sobri Reinu di Deus: “Pa kel reinu li governa el ten ki kaba ku tudu kes reinu di téra.”
Kuzê ki Bíblia ta fla: ‘Na dia di kes rei, Deus di séu ta ben traze un reinu ki ka ta kaba nunka más. I kel reinu li ka ta pasa pa mô di ninhun otu povu. El ta ben disfaze i el ta ben kaba ku tudu kes reinu, i sô el ta ben fika pa tudu ténpu’. — Daniel 2:44.
Krénsas di Tistimunhas di Jeová ten bazi sô na Bíblia Traduson di Mundu Novu?
Nau. Nu ta kontinua ta uza txeu traduson di Bíblia na nos trabadju di pregason. É verdadi ma óras ki nu ta oferese un algen un studu di Bíblia, tanbê nu ta da-l un Bíblia Traduson di Mundu Novu, di grasa. Má si un algen ta prifiri uza otus traduson di Bíblia nu ta fika kontenti di studa ku el tanbê.