Dipôs ki Salumon bira rei di Israel, Jeová pergunta-l: ‘Kuzê ki bu krê pa N da-u?’ Salumon fla: ‘Ami é jóven inda i N ka sabe kuzê ki N ta faze. Favor, da-m sabedoria pa N toma kónta di bu povu.’ Jeová fla-l: ‘Pamodi bu pidi-m sabedoria, N ta faze-u ómi ku más sabedoria na Téra. Tanbê N ta da-u txeu rikéza. I si bu obi ku mi, bu ta ten un vida kunpridu.’

Salumon kumesa ta faze ténplu. El uza midjór oru, prata, madera i pédra. Txeu ómi ku mudjer ki ta trabadjaba dretu faze ténplu. Dipôs di 7 anu, ténplu dja staba prontu pa didika pa Jeová. El tinha un altar, pa fazedu oférta na el. Salumon poi duedju na txon frenti di altar i el ora: ‘Ó Jeová, kel ténplu li é ka grandi i nen bunitu sima bu ta merese. Má favor, seta nos adorason i obi nos orason.’ Kuzê ki Jeová atxa di ténplu i di orason ki Salumon faze? Lógu ki Salumon kaba di faze orason, lumi dixi di Séu i kema ofértas ki staba na altar. Di kel manera li, Jeová mostra ma el fika kontenti ku ténplu. Kantu israelitas odja kel-li es fika rei di kontenti.

Rei Salumon fika konxedu pa se sabedoria na tudu Israel i ti na lugaris más lonji. Pesoas ta baba pa Salumon djuda-s ku ses prubléma. Ti rainha di Sabá bai pa prova Salumon ku perguntas difísil. Kantu el obi se respóstas, el fla: ‘N ka ta kriditaba na kuzê ki pesoas ta flaba mi di bo, má gósi dja N odja ma bo é más sábiu di ki kel ki es fla. Bu Deus, Jeová, abensua-u.’ Povu di Israel tinha vida sábi i es staba kontenti. Má kuzas staba kuazi ta mudaba.

Timenti Salumon ta adoraraba Jeová Israel tinha pas. Má Salumon kaza ku txeu mudjer di otus téra ki ta adoraba imajis. Poku-poku, Salumon muda i el kumesa ta adora imajis tanbê. Jeová fika xatiadu ku el. El fla Salumon: ‘Israel ta ben tradu di bu família i ta divididu na dôs. N ta ben da párti más grandi pa un di bus sérvu i bu família ta ben governa kel párti más pikinoti.’

Jeová mostra klaru kal ki éra se disizon di un otu manera. Un di kes sérvu di Salumon, ki txomaba Jerubuon, staba ta anda na strada kantu el nkontra ku proféta Aijá. Aijá ratxa se ropa na 12 padás i el fla Jerubuon: ‘Jeová ta ben tra reinu di Israel di família di Salumon i el ta ben dividi-l na dôs párti. Toma kes 10 padás li pamodi bu ta ben ser rei di 10 tribu.’ Rei Salumon fika ta sabe di kel-li i el kria mataba Jerubuon! Pur isu Jerubuon fuji pa Ijitu. Algun ténpu dipôs Salumon móre i se fidju Rubuon bira rei. Dipôs Jerubuon xinti ma ka tinha prigu, nton el volta pa Israel.

Ansions di Israel fla Rubuon: ‘Si bu trata povu dretu, es ta ser lial pa bo.’ Má amigus di Rubuon, ki éra jóvens, fla-l: ‘Bu meste ser duru ku povu! Pô-s ta trabadja más duru inda!’ Rubuon obi konsedju di se amigus. El trata povu mariadu i es rabela. Es faze Jerubuon rei di kes 10 tribu ki bira konxedu kómu reinu di Israel. Kes otu dôs tribu fika konxedu kómu reinu di Judá i es kontinua ta ser lial pa Rubuon. Kes 12 tribu di Israel gósi staba divididu.

Jerubuon ka kreba pa povu bai adoraba Jeová na Jiruzalen, ki éra reinu di Rubuon. Bu sabe pamodi? Jerubuon tinha medu pa pesoas afastaba di el i apoiaba Rubuon. Nton el faze dôs bixéru di oru i el fla se povu: ‘Jiruzalen é mutu lonji. Nhos pode adora li.’ Povu kumesa ta adora kes bixéru di oru i más un bês es skese di Jeová.