Kes rei di 10 tribu di Israel faze txeu kuza mariadu, má Rei Akabi éra di kes piór. El kaza ku un mudjer runha ki ta adoraba Baal. Se nómi éra Jizabel. Akabi ku Jizabel poi ses téra fika xeiu di adorason di Baal i es mata profétas di Jeová. Kuzê ki Jeová faze? El manda proféta Elias pa leba Akabi un avizu.

Elias fla Rei Akabi ma pamodi se maldadi, ka ta ben txobeba na Israel. Pa más di três anu, ninhun kumida ka da i povu sta ta pasaba fómi. Jeová manda Elias otu bês pa Akabi. Rei fla-l: ‘É bo ki sta faze tudu kel disgrasa li! Bo ki é kulpadu.’ Elias responde: ‘É ka mi ki poi txuba ka ta ben. Nhos ki sta ta adora Baal. Nu ben faze un kuza pa nu odja ken ki é Deus verdaderu. Djunta povu i profétas di Baal riba Monti Karmelu.’

Povu djunta na monti. Elias fla: ‘Nhos presta atenson. Si Jeová é Deus verdaderu, nhos sigi-l. Má si é Baal nhos sigi-l. N ten un dizafiu pa nhos. Kes 450 proféta di Baal debe pripara un oférta i txoma ses deus. Ami tanbê N ta pripara un oférta i N ta txoma Jeová. Kenha ki responde ku lumi é Deus verdaderu.’ Povu konkorda.

Profétas di Baal pripara un oférta. Es pasa dia interu ta txoma ses deus: ‘Ó Baal, responde-nu!’ Kantu Baal ka responde, Elias faze-s trósa. El fla: ‘Nhos txoma más riju ki nhos pode. El debe sta ta durmi i el meste algen pa korda-l.’ Inda ti bóka noti, profétas di Baal staba ta txoma. Má ningen ka responde-s.

Elias poi se oférta na altar i el baza agu riba di el. Dipôs el ora: ‘Ó Jeová, favor dexa povu sabe ma bo é Deus verdaderu.’ Kel óra, Jeová manda lumi di Séu i kema kel oférta. Povu grita riju: ‘Jeová é Deus verdaderu!’ Elias fla: ‘Ka nhos dexa profétas di Baal skapa!’ Na kel dia, 450 proféta di Baal matadu.

Kantu un núven pikinoti parse pa riba mar, Elias fla Akabi: ‘Sta pa ben un tenporal. Pripara bu karu di géra i bai pa kaza.’ Séu fika sukuru, faze béntu i txuba kumesa ta kai. Ti ki enfin txuba ben. Akabi konduzi se karu más faxi ki el pode. Ku ajuda di Jeová, Elias konsigi kóre ti pasa karu di Akabi! Má tudu prubléma di Elias kaba? Nu ben odja.

Jizabel obi kuzê ki kontise ku profétas di Baal i el fika rei di xatiadu. El manda Elias un mensaji: ‘Manhan, bu ta móre sima kes proféta di Baal.’ Elias fika ku txeu medu i el fuji pa dizértu. El ora: ‘Jeová, N ka ta aguenta más. Dexa-m móre’. Elias staba uma kansadu ki el durmi baxu di un pé di arvi.

Un anju bai na el i korda-l ku kuidadu. Kel anju fla-l: ‘Labanta bu kume’. Nton, Elias odja un pon rodóndu riba di uns pédra kenti ku un jaru di agu. El kume, el bebe i el torna durmi. Anju torna korda-l i fla-l: ‘Kume. Bu meste forsa pa viaji.’ Elias torna kume. Dipôs el bai. El viaja pa 40 dia ku 40 noti, ti ki el txiga na Monti Orebi. La Elias entra na un kavérna pa el durmi. Má Jeová pâpia ku el. El fla-l: ‘Kuzê ki bu sta faze li, Elias?’ Elias responde: ‘Israelitas ka kunpri promésa ki es faze-u. Es distrui bus altar i es mata bus proféta. Gósi é mi ki es krê mata.’

Jeová fla-l: ‘Bai i bu fika sakédu na monti.’ Primeru, faze un béntu fórti na kavérna. Sugundu, téra treme i parse lumi. Dipôs di tudu kel-li, Elias obi un vós kalmu i baxu. El kubri róstu ku se ropa i el fika frenti di kavérna. Nton Jeová pergunta-l pamodi ki el staba ta fuji. Elias fla-l: ‘É sô mi ki fika.’ Má Jeová fla-l: ‘Bu ka sta bo sô. Sta 7 mil algen na Israel ki inda ta adora-m. Bai i skodje Elizeu pa ser proféta na bu lugar.’ Kel óra, Elias bai faze kel ki Jeová manda-l. Bu ta atxa ma Jeová tanbê ta djuda-u óras ki bu faze kel ki el krê? Sin, el ta djuda-u. Nu ben odja un kuza ki kontise duránti kel ténpu di séka.