Duránti séka, Jeová fla Elias: ‘Bai Sarefá. La un viúva ta da-u kumida.’ Na porton di sidadi, Elias odja un viúva póbri ta panha lenha. El pidi-l un kópu di agu. Kantu el vira pa el bai panha, Elias fla-l tanbê: ‘Traze-m un pon, favor.’ Má viúva fla-l: ‘N ka tene pon pa N da-u. N tene un bokadinhu di farinha ku azeti ki ta da sô pa N faze kumida pa mi ku nha fidju.’ Elias fla-l: ‘Jeová promete ma si bu da-m pon, bu farinha ku azeti ka ta kaba ti ki txuba torna ben.’

Nton, viúva bai pa kaza i el faze pon pa proféta di Jeová. Duránti séka, kumida ka falta pa viúva ku se fidju sima Jeová promete. Se póti di farinha ku azeti kontinua sénpri xeiu.

Sô ki dipôs kontise un kuza gravi. Fidju di viúva duense riju ti ki el móre. El pidi Elias pa djuda-l. Elias toma mininu na se mai i el leba-l pa un kuartu ki ta fikaba na terasu. El pô-l na kama i el ora: ‘Jeová, favor, da es mininu vida otu bês.’ Bu sabe pamodi ki kel-li ta sérba un kuza bon dimás pa Jeová faze? Pamodi sima nu sabe, ningen ka moreba antis pa torna vive i dipôs viúva ku se fidju nen ka éra israelitas.

Dirapenti rapazinhu kumesa ta raspira! Elias fla viúva: ‘Odja! Bu fidju sta bibu.’ Viúva fika uma kontenti ki el fla Elias: ‘Abo é própi ómi di Deus. N sabe kel-la pamodi bu ta pâpia sô kel ki Jeová fla-u pa bu pâpia i sénpri kel ki bu fla ta kontise.’

Di janéla di se palásiu, Rei Akabi ta odjaba plantason di uva di un ómi ki txomaba Nabóti. Akabi krê fikaba ku kel plantason di uva. El tenta kunpra-l, má Nabóti ka bende pamodi éra kóntra lei di Jeová bende se eransa. Má, Akabi ruspeta Nabóti pamodi el staba ta faze kel ki é dretu? Nau. Akabi fika uma xatiadu. El fika tantu xatiadu ki el ka sai di se kuartu i el nega kume.

Mudjer di Akabi ki éra Rainha Jizabel, éra runha. El fla se maridu: ‘Bo é rei di Israel. Bu pode ten tudu kel ki bu krê. N ta da-u txon di Nabóti.’ Rainha Jizabel skrebe kartas pa ansions di sidadi, ta fla-s ma Nabóti pâpia mal di Deus i pa es da-l ku pédra ti ki el móre. Kes ansion faze kel ki Jizabel fla-s pa es faze. Dipôs Jizabel fla Akabi: ‘Nabóti sta mortu. Gósi plantason di uva é di bo.’

É ka sô Nabóti ki Jizabel mata sen faze nada. El mata txeu algen ki ta amaba Jeová. El ta adoraba imajis i el ta fazeba otus kuza mariadu. Jeová odja tudu kuza mariadu ki Jizabel faze. Kuzê ki Jeová ta fazeba ku el?

Dipôs ki Akabi móre, se fidju Jeoron bira rei. Jeová manda un ómi ki txomaba Jeú pa kastiga Jizabel ku se família.

Jeú bai na se karu pa kel sidadi undi Jizabel ta moraba. Jeoron tanbê bai na se karu, el nkontra ku Jeú i el pergunta-l: ‘Bu ben na pas?’ Jeú fla-l: ‘Timenti bu mai Jizabel sta ta faze maldadi ka ta ten pas.’ Jeoron tenta vira karu uma faxi pa el fuji. Má Jeú da-l ku fléxa i el móre.

Dipôs Jeú bai pa palásiu di Jizabel. Kantu Jizabel obi ma Jeú staba ta bai pa la, el pinta, el konpo kabélu i el fika ta spéra-l la di riba na janéla. Kantu Jeú txiga, Jizabel kunprimenta-l mariadu. Jeú grita pa npregadus di Jizabel ki staba sakédu na se ladu: ‘Nhos bota-l pa baxu!’ Es pintxa Jizabel di janéla, el da na txon la dibaxu i el móre.

Dipôs di kel-li, Jeú mata 70 fidju di Akabi i el distrui tudu adorason di Baal. Bu repara ma Jeová ta odja tudu kuza i na ténpu sértu el ta kastiga kes algen ki ta faze kuzas mariadu?