Runions di kongregason através di vídiu

Txeu govérnu na mundu interu sta ta pidi pa gentis fika lonji di kunpanheru i es proíbi atividadis ki ta ten txeu algen djuntadu. Tistimunhas di Jeová sta disididu na kontinua ta obi ku kes orientason li má omésmu ténpu es sta disididu na kontinua ku ses adorason. Pa es faze kel-li, kongregasons sta ta uza prugramas, sima Zoom, ki ta da pa faze runion através di vídiu.

Grupu Enkaregadu di Óbra da aprovason pa uza kontribuisons di irmons, pa paga un kónta na Zoom, asi pa kongregasons ka fika sen faze ses runion. Kel-li é un bon ajuda pa alguns kongregason ki ka ta pode paga un kónta na Zoom, ki pode bai di uns 1.500 ti 2.000 skudu ô más. Kes kongregason li staba ta uza prugramas di grasa, ki ta dexa poku algen sta ligadu omésmu ténpu i es é ka suguru. Má gósi, tudu kongregason ki sta ta uza kóntas ki organizason kunpra na kel prugrama Zoom, ten más suguransa na ses runion i es ta pode pa más algen sisti ses runion omésmu ténpu. Ti gósi, más di 65 mil kongregason na más di 170 país, sta ta uza kes kónta li.

Kongregason Kairagi, ki ta fika na Manado, Sulawesi di nórti, na Indonézia, para di uza un prugrama di grasa pa faze runions pa vídiu i es kumesa ta uza un kónta di organizason na Zoom. Irmon Hadi Santoso fla: “Ti irmons ki ka sta kustumadu ku aparelhus iletróniku, gósi sta ta konsigi sisti runion. Un motivu é pamodi gósi es ka ten ki fika ta entra un monti bês na kel mésmu runion.”

Irmon Lester Jijón, ki é un ansion na kongregason Guayacanes Oésti, na Ekuador, fla: “Alguns kongregason ka tinha manera di paga un kónta na Zoom, ki ta daba pa kongregason interu sisti runion, pamodi txeu irmon di kes kongregason ten poku dinheru. Gósi, pamodi organizason di Jeová sta ta djuda-nu, nu ten un kónta na Zoom ki ta da pa txeu algen sisti runion. Pur isu, nu ta konsigi konvida otus algen pa sisti runion i nu ka ta fika preokupadu di pasa limiti di algen.”

Irmon Johnson Mwanza, ki é un ansion di kongregason Ngwerere, na Nórti na Lusaka, na Zánbia, skrebe kel-li: “Txeu irmon ku irmans fla txeu bês ma ‘kes runion através di Zoom ta djuda-s xinti más pértu di kunpanheru i tanbê ta djuda-s xinti ma Jeová ta ama-s i el ta kuida di es.’”

Kes kónta na Zoom ta pagadu através di kontribuisons ki éra pa djuda óras ki kontise un dizastri. Es ta tradu di kes kontribuison ki ta fazedu di livri vontadi pa djuda óbra na mundu interu. Txeu di kes kontribuison li ta fazedu através di site donate.jw.org. Obrigadu pa kontribuisons ki nhos ta faze di korason, ki ta uzadu tanbê óras ki parse otus situason ki nos irmons na mundu interu ta meste di ajuda. — 2 Coríntios 8:14.