PERGUNTAS KI JÓVENS TA FAZE
Modi ki N pode prende konsentra?
Pamodi ki N ka ta konsigi konsentra?
“Antis N ta leba txeu livru, má gósi si N odja ma un parágrafu é grandi, N ta prifiri ka le-l.” — Elaine.
“N ta kóre vídiu lógu si N odja ma ka sta interesanti.” — Miranda.
“Sikrê N sta konsentradu na faze algun kuza inportanti, si nha telemóvel faze barudju, N ta fika sô ta pensa: ‘Kenha ki manda-m mensájen?’” — Jane.
Aparelhus iletróniku pode ka dexa-nu konsentra? Alguns algen ta fla ma sin. Un skritor i konsultor fla: “Kantu más nu uza internet, más nu sta trena nos sérbru pa fika distraídu pamodi informason ta entra faxi i nu ta ntende lógu, má sen nu konsentra na el.”a
Odja modi ki tekinolojia pode trapadja bu konsentrason di três manera.
Óras ki bu sta pâpia ku un algen. Un minina ki txoma Maria fla: “Mésmu óras ki pesoas sta ta pâpia ku un algen róstu ku róstu, es ta fika ta manda mensájen, ta djuga ô ta djobe kuzas na redi sosial na ses telemóvel. Nton es ka ta da kes algen ki es sta ta pâpia ku el atenson.”
Óras ki bu sta na aula. Un livru ki ta pâpia di kes prigu di uza internet dimás ta fla: “Kuazi tudu studanti ta rekonhese ma es ta uza aparelhus iletróniku duránti aula pa faze algun kuza ki ka ten nada aver ku skóla, sima manda i resebe mensájen, djobe kuzas na internet i odja vídius ô fotus.”
Óras ki bu sta studa. Chris, ki ten 22 anu, fla: “Pa mi, kuza más difísil é ka djobe pa nha telemóvel tudu bês ki el ta faze algun barudju.” Si bo é alunu, un trabadju di skóla ki bu ta fazeba na un óra pode leba-u uns três óra ô más si bu dexa telemóvel distrai-u.
Konkluzon: É más difísil konsentra si bu dexa tekinolojia distrai-u i kontrola-u.
Un menti ki ka ta pode konsentra é sima un kabalu brabu ki bu ka ta pode kontrola
Modi ki N pode konsentra más txeu?
Óras ki bu ta pâpia ku un algen. Bíblia ta fla: ‘Ka nhos djobe sô nhos própi interesi, má tanbê interesi di otus.’ (Filipenses 2:4) Mostra ma bu ta preokupa ku pesoas óras ki bu ta obi-s ku atenson. Spia-s déntu di odju óras ki bu ta pâpia ku es i ka bu dexa bu telemóvel distrai-u.
“Óras ki bu sta pâpia ku un algen, sforsa pa bu ka fika ta djobe pa bu telemóvel. Mostra ma bu ta ruspeta kel algen óras ki bu ta da-l tudu bu atenson.” — Thomas.
SUJISTON: Óras ki bu sta pâpia ku un algen, poi bu telemóvel na un lugar ki bu ka ta odja. Kes algen ki ta faze piskiza ta fla ma sô sta ku telemóvel pértu bo, pode ka dexa-u mante konsentradu pamodi dja bu sabe ma kalker óra algun kuza pode distrai-u.
Óras ki bu sta na aula. Bíblia ta fla: ‘Presta atenson na manera ki nhos ta obi’. (Lucas 8:18) Ku kel konsedju li na kabésa, si bu skóla ta dexa-u uza internet na sala di aula, ka bu djobe mensájens, djuga ô pâpia ku algen online na óra ki bu debe staba konsentradu na prende.
“Tenta presta más atenson na aula. Tra apontamentu. Si ta da, xinta la frenti na sala di aula, asi pa bu ka distrai.” — Karen.
SUJISTON: Uza papel ku kanéta pa bu tra apontamentu envês di konputador. Piskiza ta mostra ma kel-la ta djuda-u fika ménus distraídu i konsigi lenbra midjór di kes kuza ki bu prende.
Óras ki bu sta studa. Bíblia ta fla: ‘Ganha sabedoria, ganha ntendimentu.’ (Provérbios 4:5) Kel-li krê fla ma bu debe konsentra dretu na kuzê ki bu sta prende, envês di sô lé matéria pa bu pode ten bon nóta na testi.
“Óras ki N sta ta studa, N ta poi nha tablet na modu di avion i N ta konsentra sô na kel kuza ki N sta faze. N ka ta odja avizu di mensájen. I si N meste lenbra di algun kuza, N ta skrebe-l na papel.” — Chris.
SUJISTON: Ten sertéza ma na lugar ki bu sta studa bu ta fika más konsentradu. Mante kel lugar linpu i rumadu.
a Nicholas Carr, na livru A Geração Superficial: O que a Internet Está Fazendo com os Nossos Cérebros.