‘Nhos fika atentu, nhos mante sienti!’

1. Kuzê ki Jizus fla se disiplus sobri fin i ki avizu ki el da-s?

ALGUNS dia antis di Jizus móre, kuatu di se disiplus pergunta-l: “Kal ki ta ben ser sinal di fin di es mundu?” (Mat. 24:3) Talvês kes disiplu staba ta pergunta-l modi ki es ta sabeba na ki ténpu ki Jiruzalen i se ténplu ta sérba distruídu. Jizus fla-s na ki ténpu ki kel-li ta ben kontiseba i tanbê el fla-s sobri “fin di es mundu” ki nu sta ta vive na el gósi. Jizus pâpia di ténpu di fin, kantu ki el fla: “Sobri kel dia ô kel óra ningen ka sabe, nen anjus na séu, nen Fidju, má sô Pai.” Dipôs, Jizus fla tudu se disiplus pa “mante sienti” i “mante kordadu”. — Mar. 13:32-37.

2. Pamodi ki éra inportanti pa kes kriston ki ta viveba na ténpu di apóstlus kontinuaba sienti?

² Kes judeu ki ta sigiba Jizus na ténpu di apóstlus, tinha ki manteba sienti pamodi ses vida ta dipendeba di kel-li. Jizus fla se disiplus ma es tinha ki fikaba atentu pa es pode sabeba na ki ténpu ki Jiruzalen i se ténplu ta sérba distruídu. Jizus fla: ‘Má, óras ki nhos odja Jiruzalen serkadu ku trópas na ses ténda, dja nhos sabe ma se distruison sta kuazi ta txiga.’ Óras ki es odjaba kel-li ta kontise, es debe obiba ku avizu di Jizus i ‘fuji pa montis’. (Luc. 21:20, 21) É sô kes ki prestaba atenson na kel avizu li ki ta salvaba óras ki kes romanu ba distruíba Jiruzalen.

3. Kuzê ki nu ta ben odja na kel studu li?

³ Gósi, nu sta ta vive na ténpu di fin di kel mundu mau. Pur isu, nu debe fika atentu i kontinua sienti. Na kel studu li, nu sta ben odja modi ki nu pode mante ikilibradu óras ki nu ta odja kuzê ki sta ta kontise na mundu, modi ki nu pode toma kuidadu i modi ki nu pode uza kel ténpu ki falta di midjór manera.

KONTINUA IKILIBRADU ÓRAS KI BU TA ODJA KUZAS KI STA KONTISE NA MUNDU

4. Pamodi ki nu debe sta interesadu na odja modi ki kuzas ki sta ta kontise na mundu sta ta kunpri profesias di Bíblia?

⁴ Nu ten bons motivu pa sta interesadu na kuzê ki sta ta kontise na mundu i odja modi ki kel-li sta ta kunpri profesias di Bíblia. Pur izénplu, Jizus pâpia di alguns kuza ki ta ben kontiseba pa djuda-nu sabe ma mundu di Satanás sta kuazi ta distruídu. (Mat. 24:3-14) Apóstlu Pedru insentiva-nu pa nu presta atenson na kes profesia ki sta ta kunpri, asi pa nos fé kontinua fórti. (2 Ped. 1:19-21) Kel últimu livru di Bíblia, ta kumesa ku kes palavra li: ‘Kuzas ki Jizus Kristu revela, ki Deus fla-l, pa el mostra se skravus kes kuza, ki sta kuazi ta ben kontise.’ (Apo. 1:1) Pur isu, nu ten txeu interesi na kes kuza ki sta ta kontise na mundu gósi i nu ta krê sabe modi ki es pode sta ta kunpri profesias di Bíblia. I nu pode fika ku gana di pâpia sobri kes kuza li ku otus algen.

5. Kuzê ki nu debe ivita má kuzê ki nu debe faze? (Odja fotus.)

⁵ Má óras ki nu sta ta pâpia di profesias di Bíblia, nu ka debe tenta dibinha kuzê ki sta ben kontise. Pamodi? Pamodi nu ka krê fla nada ki ta straga nos union na kongregason. Pur izénplu, talvês nu pode obi governantis di mundu ta pâpia sobri modi ki es pode kaba ku un géra i traze pas i suguransa. Envês di nu tenta dibinha si é profesia di 1 Tessalonicenses 5:3 ki sta ta kunpri, nu debe sabe kal ki é últimu informason ki publikadu sobri kel asuntu li. Óras ki nos konbérsu ten bazi na kuzê ki organizason di Jeová ta fla, nu ta djuda kongregason kontinua ‘unidu na mésmu manera di pensa’. — 1 Cor. 1:10; 4:6.

6. Ki lisons nu pode prende na 2 Pedro 3:11-13?

⁶ Lé 2 Pedro 3:11-13. Apóstlu Pedru ta djuda-nu ten un atitudi ikilibradu óras ki nu ta pensa na profesias di Bíblia. El ta fla-nu pa nu fika ‘ku xintidu na prezénsa di dia di Jeová’. Pamodi? É ka pamodi nu krê sabe “kel dia i kel óra” ki Jeová ta ben traze Armajedon. Má é pamodi nu krê uza kel ténpu ki falta di midjór manera pa ‘nu konporta di manera santu i faze kuzas ki ta mostra ma nu ta adora Deus’. (Mat. 24:36; Luc. 12:40) Nu pode fla ma nu krê mante un bon konportamentu i ten sertéza ma sforsu ki nu ta faze pa sirbi Jeová ta mostra ma nu ten txeu amor pa el. Pa nu faze kel-li, nu meste toma kuidadu.

KUZÊ KI TOMA KUIDADU KRÊ FLA?

7. Modi ki nu ta mostra ma nu sta ta toma kuidadu? (Lucas 21:34)

⁷ Jizus fla se disiplus ma es tinha ki prestaba atenson na kuzas ki staba ta kontise na mundu i tanbê pa es tomaba kuidadu. Kel-li fika klaru na kuzê ki sta na Lucas 21:34. (Lé.) Repara kuzê ki Jizus fla: ‘Nhos toma kuidadu’. Un algen ki ta toma kuidadu ta fika atentu na kalker kuza ki pode prujudika se amizadi ku Jeová, i el ta toma medida pa ivita-s. Asi, el ta mante na amor di Deus. — Pro. 22:3; Judas 20, 21.

8. Kuzê ki apóstlu Paulu fla kes kriston?

⁸ Apóstlu Paulu fla kristons pa es mante sienti. Pur izénplu, el fla kes kriston na Éfezu: ‘Nhos mante txeu sienti pa nhos ka anda sima algen tolu, má sima algen ki ten sabedoria’. (Efé. 5:15, 16) Satanás sta sénpri ta tenta kaba ku nos amizadi ku Jeová. Pur isu, Bíblia ta fla-nu pa nu ‘kontinua ta ntende kal ki é vontadi di Jeová.’ Asi, nu ta konsigi proteje nos kabésa di tudu kes armadilha di Satanás. — Efé. 5:17.

9. Modi ki nu ta ntende kal ki é vontadi di Jeová pa nos?

⁹ Bíblia ka ta fla-nu tudu kuza ki pode prujudika nos amizadi ku Jeová. Txeu bês, nu meste toma disizons na asuntus ki Bíblia ka ta pâpia di es klaru. Pa nu toma bons disizon, nu meste ntende ô fika sienti na kal ki é ‘vontadi di Jeová’. Nu ta konsigi faze kel-li, óras ki nu ta studa Palavra di Deus sénpri i nu ta midita na el. Óras ki nu ntende vontadi di Jeová midjór i nu tenta ‘ten menti di Kristu’, nu ten más xansi di anda sima ‘algen ki ten sabedoria,’ sikrê ka ten leis ki ta fla-nu kuzê ki nu debe faze. (1 Cor. 2:14-16) É fásil nu da kónta di alguns prigu, má otus é más difísil.

10. Kal ki é alguns prigu ki nu debe ivita?

¹⁰ Alguns di kes prigu ki nu debe ivita é mostra algun tipu di interesi na un algen ki nu ka debe, bebe dimás, kume dimás, fla kuzas ki ta mágua otus i tanbê odja diverson ki ten violénsia, pornografia i kuzas sima kes-li. (Sal. 101:3) Nos inimigu, ki é Diabu, sta sénpri ta djobe xansi pa prujudika nos amizadi ku Jeová. (1 Ped. 5:8) Si nu ka sta sienti, Satanás pode poi simentis di invéja, dizonestidadi, ganánsia, ódiu, orgulhu i rankor na nos menti i korason. (Gál. 5:19-21) Talvês na komésu kes kuza li pode ka ser mutu fórti. Má si nu ka toma medida faxi, es pode kontinua ta kria sima un planta ki ten venénu i pô-nu na prubléma. — Tia. 1:14, 15.

11. Kal ki é un prigu ki é difísil nu da kónta ki nu debe ivita i pamodi?

¹¹ Un prigu ki é difísil nu da kónta é maus koléga. Imajina ma bu ta trabadja ku un algen ki ka é Tistimunha di Jeová. Bu krê pa bu koléga di trabadju pensa kuzas dretu sobri Tistimunhas di Jeová. Pur isu, bu ta mostra bondadi i bu ta djuda-l. Di vês en kuandu bu ta kume djuntu ku bu koléga. Lógu dipôs, bu ta kumesa ta faze kel-li sénpri. I di vês en kuandu, bu koléga ta pâpia sobri séksu. Na komésu, bu ta xinti inkomodadu i bu ka ta gosta di kel-li. Má dipôs, bu ta kustuma ku kel konbérsu li i bu ka ta xinti ofendidu más. Nton un dia, bu koléga di trabadju ta konvida-u pa bu ba toma un bebida ku el dipôs di trabadju, i bu ta seta. Ku ténpu, bu ta kumesa ta pensa sima bu koléga. Na poku ténpu, bu ta kumesa ta faze kes mésmu kuza ki bu koléga di trabadju ta faze. É klaru ki nu krê mostra bondadi i ruspetu pa tudu algen. Má nu meste lenbra ma kes algen ki nu ta kolega ku es ta influensia-nu txeu. (1 Cor. 15:33) Si nu toma kuidadu, sima Jizus fla-nu pa nu faze, nu ta ivita amizadi ku kes algen ki ka ta vive di akordu ku leis di Jeová. (2 Cor. 6:15) Nu ta odja prigu i nu ta fika lonji di es.

UZA BU TÉNPU DI MIDJÓR MANERA

12. Kuzê ki disiplus di Jizus meste fazeba antis di fin ben?

¹² Jizus kria pa se disiplus staba okupadu antis di fin ben. Jizus da-s un trabadju pa faze. El fla-s pa es prega notísias sábi na ‘Jiruzalen, na Judea i Samaria interu, i ti na párti más lonji di Téra.’ (Atos 1:6-8) Disiplus di Jizus tinha txeu trabadju pa faze! Timenti es staba npenhadu na faze es trabadju li, es konsigi uza ses ténpu di midjór manera.

13. Pamodi ki nu meste uza nos ténpu di midjór manera? (Colossenses 4:5)

¹³ Lé Colossenses 4:5. Pa nu toma kuidadu, nu meste pensa dretu na modi ki nu ta uza nos ténpu. ‘Ténpu i kuzas ki algen ka sta spéra’ pode kontise ku nos. (Ecl. 9:11) Nu pode móre dirapenti.

14-15. Modi ki nu pode uza nos ténpu di midjór manera? (Hebreus 6:11, 12) (Odja fotu.)

¹⁴ Nu pode uza nos ténpu di midjór manera, óras ki nu ta faze vontadi di Jeová i nu ta bira nos amizadi ku el más fórti. (João 14:21) Nu meste mante firmi, ka muda i ‘ten sénpri txeu pa faze na óbra di Sinhor’. (1 Cor. 15:58) Nton óras ki fin ben, ka ta nporta si é fin di nos vida ô fin di kel mundu mau li, nu ka ta rapende. — Mat. 24:13; Rom. 14:8.

¹⁵ Gósi, Jizus ta kontinua ta orienta se disiplus timenti es ta kontinua ta prega sobri Reinu di Deus na téra interu. El kunpri se promésa. Na nos runion i através di nos publikasons, Jizus ta inxina-nu prega notísias sábi. Tanbê, el ta da-nu tudu kel ki nu meste pa faze kel trabadju li. (Mat. 28:18-20) Nu ta faze kel ki Jizus ta spéra di nos, óras ki nu ta da nos midjór pa prega i inxina otus algen i óras ki nu ta mante sienti, timenti nu ta spéra pa Jeová traze fin di kel mundu li. Óras ki nu ta sigi kel konsedju ki sta na Hebreus 6:11, 12, nu ta pega na nos ‘speransa ti ki fin txiga’. — Lé.

16. Kuzê ki nu debe sta disididu na faze?

¹⁶ Jeová dja disidi kel dia i kel óra ki el ta ben kaba ku es mundu mau di Satanás. Óras ki kel dia txiga, Jeová sen falta ta kunpri tudu ki el fla na se Palavra. Má, alvês nu pode pensa ma fin inda ka sta ben. Má dia di Jeová ‘ka ta atraza!’ (Hab. 2:3) Pur isu, nu sta disididu na fika sienti ta spéra pa Jeová, ‘ta spéra ku paxénxa pa Deus di nos salvason.’ — Miq. 7:7.