KAPÍTLU 37

N debe batiza?

Poi verdaderu ô falsu na kes frazi li:

Kes algen ki krê sirbi Jeová debe batiza.

□ Verdaderu

□ Falsu

Obijetivu prinsipal di batismu é inpidi algen di faze pekadu.

□ Verdaderu

□ Falsu

Batismu ta djuda algen ten salvason.

□ Verdaderu

□ Falsu

Si bo é ka batizadu, bu ka ten kónta pa presta na Deus pa kel ki bu ta faze.

□ Verdaderu

□ Falsu

Si bus amigu sta prontu pa batiza, kel-li krê fla ma abo tanbê bu sta prontu pa faze kel-la.

□ Verdaderu

□ Falsu

SI BU STA ta vive di akordu ku prinsípius di Deus, si bu sta ta sforsa pa ten un bon amizadi ku el i si bu ta pâpia ku otus algen sobri bus krénsa, é normal bu krê batiza. Má modi ki bu pode sabe ma bu sta priparadu pa batiza? Pa djuda-u responde kel pergunta li, nu ben analiza kes frazi ki sta di riba.

● Kes algen ki krê sirbi Jeová debe batiza.

Verdaderu. Jizus fla se disiplus pa es batiza. (Mateus 28:19, 20) Na verdadi, ti Jizus batizadu. Pa bu mostra ma bu ta sigi Jizus, bu meste batiza óras ki bu sta maduru pa toma kel disizon li i óras ki bu krê faze kel-li di korason.

● Obijetivu prinsipal di batismu é inpidi algen di faze pekadu.

Falsu. Batismu é un manera di bu mostra otus algen ma dja bu da bu vida pa Jeová. Kel promésa li, ki bu ta faze pa Deus, é ka sima un kontratu ki ta inpidi-u di faze kuzas ki bu krê. Envês di kel-li, bu ta da bu vida pa Jeová pamodi bu krê vive di akordu ku se leis.

● Batismu ta djuda algen ten salvason.

Verdaderu. Bíblia ta fla ma é inportanti un algen batiza pa el pode ten salvason. (1 Pedro 3:21) Má kel-li ka krê fla ma bu ta salva sô pamodi dja bu batiza. Bu debe batiza pamodi bu ta ama Jeová i bu krê sirbi-l di tudu bu korason i pa tudu ténpu. — Marcos 12:29, 30.

● Si bo é ka batizadu, bu ka ten kónta pa presta na Deus pa kel ki bu ta faze.

Falsu. Tiago 4:17 ta fla: ‘Si algen sabe faze kel ki é dretu i simé el ka ta faze-l, el sta ta peka’ sikrê kel algen sta batizadu ô nau. Pur isu, si bo é maduru pa bu sabe kuzê ki é dretu ô mariadu, i pa bu sabe modi ki bu krê uza bu vida, nton ta sérba bon bu pâpia ku bu mai i ku bu pai ô ku un irmon ô ku un irman ki ten txeu spiriénsa. Asi es pode djuda-u sta prontu pa batiza.

● Si bus amigu sta prontu pa batiza, kel-li krê fla ma abo tanbê bu sta prontu pa faze kel-la.

Falsu. Bu debe disidi batiza di bo pa bo i di korason. (Salmo 110:3) Bu debe batiza sô óras ki bu ten sertéza kuzê ki siginifika ser un Tistimunha di Jeová i óras ki bu sta xinti priparadu pa kel responsabilidadi li. — Eclesiastes 5:4, 5.

Batismu ta muda bu vida

Batismu ta muda bu vida i el ta traze txeu benson. Má tanbê el é un grandi responsabilidadi pamodi bu ten ki vive di akordu ku kel promésa ki bu faze pa Jeová.

Bu sta priparadu pa bu da bu vida pa Jeová? Si respósta é sin, bu ten txeu motivu pa bu sta kontenti. Kel ki sta ta spera-u é kel priviléjiu más grandi ki bu pode ten, ki é sirbi Jeová di tudu bu korason i vive di un manera ki ta mostra ma bo é di sel. — Mateus 22:36, 37.

TESTU DI BÍBLIA

‘Nhos aprizenta nhos korpu sima un sakrifisiu bibu, santu i ki Deus ta seta, ta faze un sirvisu sagradu ku nhos kapasidadi di pensa.’ — Romanos 12:1.

UN IDEIA

Bu mai ku bu pai pode djuda-u atxa un algen na kongregason ki ta djuda-u bira bu amizadi ku Jeová más fórti. — Atos 16:1-3.

BU SABIA MA. . .

Batismu é rei di inportanti pamodi el ta mostra ma bu ten ‘kel sinal’ ki bu meste pa bu salva? — Ezequiel 9:4-6.

FAZE UN PLANU

Pa N sta priparadu pa batismu, N ta gostaba di ntende midjór sobri kes asuntu di Bíblia li: ․․․․․

Kuzê ki N ta gostaba di pergunta nha mai ku nha pai sobri kel asuntu li é ․․․․․

KUZÊ KI BU TA ATXA?

● Pamodi ki batismu é un grandi responsabilidadi?

● Pamodi ki alguns jóven ta batiza sédu dimás?

● Pamodi ki alguns jóven ka ta krê batiza?

[Lejenda]

“Sabe ma N sta batizadu djuda-m toma bons disizon i ka anda na kaminhu mariadu ki pode stragaba nha vida.” — Holly

[Kuadru/​Fotu

Perguntas ki sénpri ta fazedu sobri batismu

Kuzê ki batismu ta reprizenta? Óras ki bu ta murgudjadu na agu i dipôs bu ta labantadu, kel-li krê fla ma bu móre pa kel vida ki bu ta viveba pa bo i bu ta pasa ta vive pa faze vontadi di Jeová.

Kuzê ki siginifika da bu vida pa Jeová? Kel-li krê fla ma bu ta dexa di vive bu vida sima bu krê i ma bu ta promete poi vontadi di Deus pa frenti di tudu kuza. (Mateus 16:24) Antis di bu batiza bu debe faze un orason i fla Jeová ma di la pa dianti bu ta vive sô pa el.

Kuzê ki bu debe faze antis di bu batiza? Bu debe sta ta vive di akordu ku kel ki Palavra di Deus ta fla i ta pâpia ku otus algen sobri kuzê ki bu ta kridita na el. Bu debe sta ta sforsa pa bu bira bu amizadi ku Deus más fórti através di orason, i studu di se Palavra i ta sirbi-l pamodi bu skodje faze kel-li, ka pamodi otus algen sta ta pô-u ta faze kel-li.

Ku ki idadi algen debe batiza? Idadi é ka kel kuza más inportanti. Má simé bu debe ten idadi i ser maduru pa bu ntende kuzê ki siginifika da bu vida pa Jeová.

Má i si bu krê batiza i bu mai ku bu pai fla-u pa bu spéra? Talvês es krê pa bu ganha más spiriénsa ta sirbi Jeová. Nton seta ses konsedju i uza kel ténpu li pa bu bira bu amizadi ku Jeová más fórti. — 1 Samuel 2:26.

[Kuadru]

Tabéla

Bu sta ta pensa na batiza?

Pensa na kes pergunta i na kes frazi ki sta dibaxu pa bu analiza modi ki bu prugrésu sta. Lé kes testu di Bíblia antis di bu skrebe bu respósta.

Di ki manera bu sta ta mostra ma bu ta kunfia na Jeová gósi? — Salmo 71:5. ․․․․․

Modi ki bu sta ta mostra ma bu ta ntende diferénsa entri kel ki é dretu i kel ki é mariadu? — Hebreus 5:14. ․․․․․

Bu ta óra sénpri ô sô di vês en kuandu? ․․․․․

Sobri ki kuzas bu ta ora, i bus orason ta mostra ma bu ta ama Jeová? — Salmo 17:6. ․․․․․

Faze un lista di kuzas ki bu ta gostaba di midjora na bus orason. ․․․․․

Bu ta faze bu studu pesoal sénpri ô sô di vês en kuandu? — Josué 1:8. ․․․․․

Ki asuntus bu ta kustuma analiza na bu studu pesoal? ․․․․․

Faze un lista di kuzas ki bu ta gostaba di midjora na bu studu pesoal. ․․․․․

Bu sta kontenti ku bu trabadju di pregason? (Pur izénplu: Bu ta konsigi splika otus algen kes verdadi prinsipal di Bíblia? Bu ta revizita kes algen ki mostra interesi? Bu sta ta sforsa pa bu ten un studu di Bíblia?)

□ Sin □ Nau

Bu ta sai na pregason sikrê bu mai ku bu pai ka ta pode sai? — Atos 5:42.

□ Sin □ Nau

Faze un lista di kuzas ki bu ta gostaba di midjora na bu trabadju di pregason. — 2 Timóteo 2:15. ․․․․․

Bu ta sisti runion sénpri ô sô di vês en kuandu? — Hebreus 10:25. ․․․․․

Kuzê ki bu sta ta faze pa bu partisipa na runion? ․․․․․

Si bu mai ku bu pai ta dexa-u bai runion, bu ta bai sikrê es ka ta konsigi?

□ Sin □ Nau

Bu ta xinti sábi na faze vontadi di Deus? — Salmo 40:8.

□ Sin □ Nau

Bu ta lenbra di situasons ki bu konsigi vense preson di bus koléga? — Romanos 12:2. ․․․․․

Kuzê ki bu ta ben faze pa bu ka dexa bu amor pa Jeová fria? — Judas 20, 21. ․․․․․

Si bu mai ku bu pai i bus amigu dexa di sirbi Jeová bu ta kontinuaba ta sirbi-l simé? — Mateus 10:36, 37.

□ Sin □ Nau

[Fotu]

Batismu é sima kazamentu, el ta muda vida di algen i el é un grandi responsabilidadi