Faze amizadi ku algen diferenti

Prubléma

Si nu ivita kes algen di grupus ki nu ka gosta, kes ideia mariadu ki nu ten sobri es pode bira más fórti. Si nu ta faze amizadi sô ku algen ki é sima nos, nu pode fika ta atxa ma é sô nos manera di pensa, di xinti i di faze kuzas ki é dretu.

Prinsípiu di Bíblia

‘Nhos abri nhos korason más txeu.’ — 2 CORÍNTIOS 6:13.

Kuzê ki kel-li krê fla? Nos ‘korason’ pode reprizenta kes kuza ki nu ta xinti. Si nu gosta sô di kes algen ki é sima nos, nu sta ta fitxa nos korason. Pa nu ivita kel prubléma li nu debe krê faze amizadi ku kes algen ki é diferenti di nos.

Modi ki faze amizadi ku algen diferenti di nos ta djuda-nu

Óras ki nu konxe otus algen midjór, nu ta ntende pamodi ki es ta faze kuzas di manera diferenti. Sima nos amizadi ku es ta ba ta fika más fórti, nen nu ka ta liga ma es é diferenti di nos. Nu ta bira ta da-s más valor i nu ta poi na ses lugar.

Odja izénplu di Nazaré. Un bês el tinha ideias mariadu sobri imigrantis. El fla kuzê ki djuda-l muda: “N pasa ténpu ku es i N trabadja djuntu ku es. N konxe algen ki éra txeu diferenti di kel ki pesoas ta flaba. Óras ki bu ta faze amizadi ku algen di un kultura diferenti, bu ta prende ma es é ka tudu igual i bu ta bira ta ama-s i ta da kada un di es valor.”

Kuzê ki bu pode faze

Djobe xansi di pâpia ku algen di país, kultura ô língua diferenti di bo. Bu pode

Pidi-s pa es fla-u alguns kuza sobri es.
Konvida-s pa es kume djuntu ku bo.
Obi óras ki es ta konta ses stórias pa bu diskubri kuzê ki é inportanti pa es.

Si bu tenta ntende kuzê ki es pasa pa el, bu ta ntende pamodi ki es é asi. Kel-li pode djuda-u gosta más di es i di otus algen di ses grupu.

**Izénplu ki kontise: Kandasamy i se mudjer Sookammah (Kanadá)**

“Nu kria na Áfrika di Sul duránti kel ténpu ki tinha txeu diskriminason di rasa. Algen di rasa diferenti éra obrigadu bai mora na zónas diferenti di kunpanheru i kel-li poi diskriminason ta bira más txeu. Anos é ka di kor branku i nu ka gostaba di algen di kor branku pamodi alguns di es trata-nu sima si es éra más midjór ki nos. Na kel ténpu, nu ka ta atxaba ma nu ta fazeba diskriminason. Má nu ta atxaba ma éra nos ki staba ta sufri diskriminason.

“Pa muda nos manera di pensa, nu kumesa ta abri nos korason i ta faze amizadi ku algen di kulturas diferenti. Sima nu ba ta kolega ku algen di kor branku nu odja ma nu tinha txeu kuza igual ku es. Nu ta pasa pa kes mésmu situason na vida i nu ten kes mésmu prubléma.

“Ti nu tevi xansi di resebe un kazal di kor branku na nos kaza i es fika ku nos un bon ténpu. Nu bira ta konxe-s dretu. Lógu nu bira amigu di kunpanheru i nu odja ma nos éra igual. Pur isu, nu kumesa ta pensa di manera más dretu sobri algen di kor branku.”