Modi ki aparelhus iletróniku ta afeta bu menti?

Pesoas sta sénpri ta prende kuzas novu, pamodi skóla, trabadju ô pamodi otus motivu. I tekinolojia pode djuda. Nunka ka foi fásil sima gósi atxa txeu informason sen sai di kaza ô di undi ki bu sta xintadu.

Txeu algen ki gosta di uza aparelhus iletróniku dimás, da kónta ma. . .

es ten difikuldadi na konsentra óras ki es sta ta lé.
es ten difikuldadi na konsentra na faze un kuza di kada bês.
es ta fika nfadadu si es pasa txeu ténpu sen faze nada.

KUZÊ KI BU DEBE SABE

Un jóven ta faze más di ki un kuza omésmu ténpu. El sta manda mensájen na telemóvel, ta pâpia ku un amiga na xamada pa vídiu i ta uza un konputador i un livru pa studa.

ÓRAS KI BU TA LÉ

Alguns algen ta pasa sô odju na kel ki es sta ta lé. Es ka ten paxénxa pa lé i ntende un artigu interu.

Lé faxi pa djobe un respósta pode ka ser mariadu. Má óras ki nu meste ntende un asuntu dretu, kel tipu di leitura li pode ka djuda.

PENSA NA KEL-LI: Ti ki pontu bu ta konsigi lé óras ki un testu é grandi? Modi ki kel-li pode midjora bu kapasidadi di prende kuzas novu? — PROVÉRBIOS 18:15.

MANTE KONSENTRADU

Alguns algen ta atxa ma tekinolojia pode djuda-s faze dôs kuza omésmu ténpu. Pur izénplu, manda mensaji pa amigus timenti es sta ta studa. Má óras ki un algen ta faze si, el ka ta konsigi faze dretu nen un kuza nen kel otu, inda más si el meste konsentra na kes dôs trabadju.

Pa mante konsentradu, un algen meste disiplina se kabésa, má kel sforsu bale péna. Un jóven ki txoma Grace fla: “N da kónta ma é midjór konsentra na faze un kuza di kada bês envês di tenta faze txeu kuza omésmu ténpu. Si bu faze si, bu ta fadja más poku i bu ta fika ménus stresadu.”

PENSA NA KEL-LI: Faze más di un kuza omésmu ténpu, ta afeta bu konsentrason i ta pô-u ka lenbra di kuzê ki bu studa? — PROVÉRBIOS 17:24.

FIKA NFADADU

Alguns algen ka ta xinti sábi óras ki es sta es sô na un lugar kalmu, pur isu es ta uza aparelhus iletróniku pa kaba ku kel vaziu ki es sta ta xinti. Un mudjer ki txoma Olivia fla: “N ka ta konsigi fika paradu, nen pa 15 minutu, sen uza nha telemóvel, nha tablet ô odja tilivizon.”

Fika un ténpu bo sô é un bon oportunidadi pa bu midita. Kel-li é inportanti óras ki bu sta prende kuzas novu, ka sô pa jóvens, má tanbê pa kes algen grandi.

PENSA NA KEL-LI: Bu ta tra ténpu pa bu pensa óras ki bu sta bo sô? — 1 TIMÓTEO 4:15.

KUZÊ KI BU DEBE FAZE

DJOBE MODI KI BU STA UZA APARELHUS ILETRÓNIKU

Modi ki bu pode uza aparelhus iletróniku pa bu midjora bu kapasidadi di prende kuzas novu? Modi ki aparelhus iletróniku pode trapadja bu konsentrason i bu kapasidadi di prende?

PRINSÍPIU DI BÍBLIA: ‘Proteje sabedoria i bu kapasidadi di rasusina’. — PROVÉRBIOS 3:21.

PERGUNTA BU KABÉSA. . .

N ten difikuldadi pa N konsentra, óras ki N sta ta lé un testu grandi na un aparelhu iletróniku? Na kel kazu li, kuzê ki ta pô-m ka konsentra?
Kuzê ki N pode faze pa bira kes distrason más poku ô ti kaba ku es?

Sujiston: Kumesa ta lé testus más pikinoti i ba ta omenta poku-poku. Lé ku vós altu i ku kalma pa bu konsentra na kel ki bu sta lé.

Modi ki N pode ranja ténpu pa pensa i midita na kel ki N sta ta lé?

Sujiston: Óras ki bu sta studa, tra 10 minutu pa bu pensa na kel ki bu prende.

Na ki situason N ta tenta faze más di ki un kuza omésmu ténpu?
Kuzê ki N pode faze pa N konsentra na un kuza di kada bês?

Sujiston: Óras ki bu sta ba studa, tra di bu frenti kalker kuza ki pode distrai-u.

PRINSÍPIU DI BÍBLIA: ‘Ganha sabedoria, ganha ntendimentu’. — PROVÉRBIOS 4:5.