Deus promete ma nos planéta ka ta ser distruídu

É kel-li ki un ekipa di piskizadoris fla sobri nos planéta i sobri mudansas di klima. Si bu ta kridita na un Kriador ki ta inporta ku nos, kel ki piskizadoris fla talvês ta pô-u ta lenbra di kes siklu ki Deus faze ki ta poi téra ta rekupera el sô.

Má simé, ómis dja straga téra di tal manera ki el ka ta pode rekupera el sô. Pamodi ki nu pode kunfia ma Deus ta ben faze algun kuza pa ben rezolve kel situason li?

Odja alguns testu di Bíblia na kuadru ki ta mostra ma téra ka sô ta kontinua ta izisti, má tanbê el ta ben midjora.

• É Deus ki kria nos planéta. ‘Na komésu Deus faze séu ku Téra.’ — Génesis 1:1.

• Téra é di Deus. ‘Téra é di Jeováa, i tanbê tudu kuza ki ten na el’. — Salmo 24:1.

• Deus faze nos planéta pa ka ser distruídu. ‘El poi Téra na ses lisérsi; i nunka más el ka ta tradu di se lugar.’ — Salmo 104:5.

• Deus promete ma sénpri ta ten algen ta mora na téra. ‘Deus verdaderu, Kel ki forma Téra, ki ka kria-l pa nada, má ki faze-l pa moradu na el’. — Isaías 45:18.

• Deus promete ma pesoas ta ben vive na téra pa tudu ténpu. ‘Téra ta ben ser di kes algen justu i es ta ben vive na el pa tudu ténpu.’ — Salmo 37:29.

Deus faze téra di un manera ki pesoas pode vive na el sen straga-l. Bíblia ta fla ma na ténpu sértu Jeová Deus, ta ben kaba ku tudu kes ki sta ta straga téra. — Apokalipse 11:8.

Bíblia ta promete ma dipôs Deus ta ben bira téra na un lugar sábi di vive, un paraízu bunitu, i ma el ‘ta ben abri mô i faze vontadi di tudu kuza bibu.’ — Salmo 145:16.