Prende más
1. Ken ki é Babilónia Grandi?
Modi ki nu sabe ma ‘Babilónia Grandi’ ta reprizenta tudu kes relijion falsu? (Apocalipse 17:5) Pensa na kes kuza li:
El sta ta influensia mundu interu. Bíblia ta fla ma Babilónia Grandi sta xintadu riba di un ‘monti di algen’ i di ‘nasons’. El ten ‘un reinu ki ta governa kes rei di Téra.’ — Apocalipse 17:15, 18.
El ka ta reprizenta pulítika nen komérsiu. ‘Kes rei di Téra’ i ‘kes algen ki ta faze nogósiu’ ta skapa óras ki el distruídu. — Apocalipse 18:9, 15.
El ta afasta pesoas di Deus. El ta txomadu di prostituta pamodi el ta trabadja djuntu ku govérnus pa el pode ten dinheru i otus kuza. (Apocalipse 17:1, 2) El ta ngana pesoas di tudu nason. I el é kulpadu pa mórti di txeu algen. — Apocalipse 18:23, 24.
2. Ki ténpu ki Misías ta parseba?
Bíblia dja flaba ma Misías ta parseba dipôs di 69 simana. — Lé Daniel 9:25.
Na ki ténpu ki kes 69 simana ta kumesaba? Kes 69 simana ta kumesaba na anu 455 A.J. Na kel ténpu la, governador Neemias txiga na Jiruzalen ‘pa konpo i faze’ sidadi. — Daniel 9:25; Neemias 2:1, 5-8.
Kantu ténpu ki kes 69 simana ta duraba? Na alguns profesia di Bíblia, un dia ta reprizenta un anu. (Números 14:34; Ezequiel 4:6) Nton kada simana ta reprizenta 7 anu. Na kel profesia li, 69 simana ta da 483 anu (69 simana x 7 dia).
Ki ténpu ki kes 69 simana ta findaba? Si nu konta 483 anu désdi anu 455 A.J., nu ta txiga na anu 29.a É na kel anu li ki Jizus batiza i el bira Misías! — Lucas 3:1, 2, 21, 22.
3. Tratamentus di saúdi ki ta uza sangi
Ten alguns tratamentu di saúdi ki ta uza nos própi sangi. Pur izénplu, alguns algen ta da sangi ô es ta guarda ses própi sangi pa uzadu na operason. Nu ka ta seta kes tipu di tratamentu li. — Deuteronómio 15:23.
Má, ten otus tipu di tratamentu ki nu pode seta. Kes-li ta inklui análizi di sangi, hemodiálise, hemodiluição, recuperação intra-operatória de células ô uza un mákina korason-pulmon. Kada un di nos ten ki disidi modi ki nos sangi ta uzadu óras ki nu ta faze un operason, un análizi ô un otu tratamentu. Kada dotor pode ten se manera di faze kes tratamentu li. Pur isu, antis di nu seta faze un operason, un análizi ô un otu tratamentu, nu ten ki sabe dretu kuzê ki kel dotor sta ba faze ku nos sangi. Pensa na kes situason li:
Nu pode ligadu na un mákina pa párti di nos sangi tradu fóra di nos korpu. Dipôs pode fitxadu kel mákina duránti un ténpu, pa kel sangi para di kóre. Na kel situason li, nha konsénsia ta atxa ma kel sangi inda ta faze párti di mi ô ma el debe bazadu ‘na txon’? — Deuteronómio 12:23, 24.
Na un tratamentu, nos sangi pode tradu di nos korpu, fazedu algun kuza na el i dipôs el ta torna podu na nos korpu. Nha konsénsia ta seta kel tipu di tratamentu li?
4. Siparason
Bíblia ta fla ma maridu ku mudjer ka debe sipara, i el ta dexa klaru ma si un algen sipara ninhun di es ka debe kaza otu bês. (1 Coríntios 7:10, 11) Má, ten alguns situason ki un sérvu di Jeová pode pensa na sipara.
Óras ki un maridu ta nega sustenta se família i es ta fika sen kes kuza ki es meste pa es vive. — 1 Timóteo 5:8.
Óras ki un maridu ô mudjer ta sota ô maltrata kel otu di un manera ki se vida ô se saúdi ta fika na prigu. — Gálatas 5:19-21.
Óras ki un maridu ô mudjer ka ta dexa kel otu sirbi Jeová, i el ta poi se amizadi ku Jeová na prigu. — Atos 5:29.
5. Feriadus i féstas
Nu ka ta partisipa na ninhun tipu di feriadu ô fésta ki ka ta agrada Jeová. Má, kada un di nos debe uza nos konsénsia trenadu pa Bíblia pa disidi kuzê ki nu ta faze na alguns situason ki pode kontise. Odja alguns izénplu.
Un algen ta dizeja-u “Filís Natal” ô “Filís anu novu”. Bu pode sô fla: “Obrigadu.” Má si kel algen krê sabe más, bu pode splika-l pamodi ki bu ka ta partisipa na kes fésta la.
Bu maridu ô bu mudjer, ki é ka Tistimunha di Jeová, ta konvida-u pa nhos ba kume djuntu ku se família na un dia feriadu. Si bu konsénsia ta dexa-u bai, splika bu maridu ô bu mudjer ma si kes kuza ki es sta ba faze sta ligadu ku kustumus falsu, bu ka ta partisipa na es.
Bu patron ta oferese-u más dinheru na ténpu di fésta. Bu debe toma-l? Ta dipende di kuzê ki bu patron ta pensa. El ta atxa ma kel dinheru ta faze párti di kel fésta? Ô sô el krê mostra-u ma el sta kontenti ku bu trabadju?
Un algen ta da-u un prezenti na ténpu di fésta. El ta fla-u: “N sabe ma bu ka ta partisipa na kel fésta li, má N krê da-u kel prezenti li simé.” Talvês kel algen sta sô ta mostra-u se amizadi. Má, i si bu ten algun motivu pa pensa ma kel algen sta ta tenta pô-u na próva ô pô-u ta partisipa na kel fésta? Dipôs di pensa na kel-li, bu debe disidi si bu ta seta kel prezenti ô nau. Na tudu disizons ki nu ta toma, nu krê ten un konsénsia linpu i ser fiel pa Jeová. — Atos 23:1.
6. Duénsas ki ta pega
Nu ta ama pesoas, pur isu nu ta toma txeu kuidadu pa nu ka pasa-s algun duénsa. É kel-li ki nu ta faze si nu sabe ô nu ta diskunfia ma nu ten un duénsa ki ta pega. Nu ta faze si pamodi Bíblia ta fla: ‘Ama bu prósimu sima bu kabésa.’ — Romanos 13:8-10.
Modi ki un algen ki sta ku un duénsa ki ta pega pode mostra amor pa otus? Un algen ki sta ku un duénsa ki ta pega ka debe faze kuzas sima brasa ô da beju. El ka debe xatia si alguns algen ka konvida-l pa ses kaza, pamodi es krê proteje ses família. Antis di el batiza, el debe fla kordenador di grupu di ansions di se duénsa, asi pa es pode ranja manera di proteje kes otu algen ki sta bai batiza tanbê. Antis di kumesa ta namora, un algen ki talvês fika na prigu di panha un duénsa ki ta pega, debe disidi di se livri vontadi faze análizi di sangi. Óras ki bu ta faze si, bu ta mostra ma bu ta preokupa ku otus i ma bu ‘ka ta djobe sô bus interesi, má tanbê interesi di otus’ algen. — Filipenses 2:4.
7. Kuzas ki ten aver ku nogósiu i leis
Óras ki nu ta faze nogósiu ô nu ta lida ku dinheru, nu pode ivita txeu prubléma si nu faze un kontratu i nu skrebe-l na papel. Nu ta faze si, sikrê é ku un irmon na kongregason. (Jeremias 32:9-12) Má simé, pode kontise algun prubléma óras ki irmons ta lida ku dinheru ô otus asuntu. Es debe konsigi rezolve kel prubléma faxi, ku pas i sô entri es.
Má, modi ki nu debe rezolve prublémas, sima óras ki un algen ta suja nómi di kel otu ô ta ngana algen na un nogósiu? (Lé Mateus 18:15-17.) Jizus mostra três kuza ki nu debe faze:
Nu tenta rezolve kel prubléma sô nos ku kel algen. — Odja versíklu 15.
Si nu ka konsigi rezolve, nu debe pidi ajuda di un ô dôs irmon ku más spiriénsa na kongregason. — Odja versíklu 16.
Si ka rezolve simé, nton nu pode pidi ajuda na ansions. — Odja versíklu 17.
Nu ka debe leba nos irmons pa tribunal pamodi pode poi algen ta pensa mal di Jeová i di kongregason. (1 Coríntios 6:1-8) Má, ten alguns situason ki talvês nu meste bai tribunal. Pur izénplu, pa trata di asuntus ki ten aver ku divórsiu, pa disidi ken ki ta fika ku fidjus ô óras ki un algen meste pa kenha ki el staba kazadu ku el da-l dinheru pa el sustenta. Tanbê, óras ki algen meste toma un indeminizason, óras ki un inpréza fali i pa trata di kuzas ki ten aver ku eransa ô testamentu. Si un kriston bai tribunal pa rezolve kes asuntu li ku pas, el ka sta bai kóntra kel ki Bíblia ta fla.
Si fazedu un krimi gravi sima viola un mininu ô un algen grandi, furta txeu dinheru ô un kuza di txeu valor, mata algen, sota ô da algen pankada, i nu fla pulísia ô tribunal kuzê ki kontise, nu ka sta bai kóntra kel ki Bíblia ta fla.
a Di anu 455 A.J. ti anu 1 A.J. ta da 454 anu. Di anu 1 A.J. ti anu 1 D.J. ta da 1 anu (ka ten anu zéru). I di anu 1 D.J. ti anu 29 D.J. ta da 28 anu. Tudu kes anu li djuntadu ta da 483 anu.