Ser onéstu na tudu kuza

Tudu algen krê ten amigus ki é onéstu. Jeová ta spéra ma se amigus ta ser onéstu tanbê. Má é ka fásil ser onéstu na es mundu ki txeu algen é dizonéstu. Pamodi ki é bon ser onéstu na tudu kuza?

1. Kal ki é motivu más inportanti pa nu ser onéstu?

Óras ki anos é onéstu ku otus, nu ta mostra Jeová ma nu ta ama-l i ruspeta-l. Pensa na kel-li: Jeová sabe tudu kuza ki nu ta pensa i nu ta faze. (Hebreus 4:13) El ta odja óras ki nu ta disidi ser onéstu, i kel-la ta pô-l kontenti. Se Palavra ta fla: ‘Jeová ta ôdia algen falsu, má el ten amizadi fórti ku kes algen ki é lial pa el.’ — Provérbios 3:32.

2. Modi ki nu pode ser onéstu na nos dia-dia?

Jeová krê pa nu ‘fla kunpanheru verdadi’. (Zacarias 8:16, 17) Kuzê ki kel-li krê fla? Kel-li krê fla ma óras ki nu ta pâpia ku nos família, kolégas di trabadju, nos irmons ku irmans na kongregason ô ku kes ki ten autoridadi, nu ka ta konta mintira i nen nu ka ta da informasons falsu. Kes algen onéstu ka ta furta i nen ka ta ngana algen. (Lé Provérbios 24:28 i Efésios 4:28.) Tanbê es ta paga tudu ses inpostu. (Romanos 13:5-7) Di kes manera li, nu ta ‘konporta ku onestidadi na tudu kuza.’ — Hebreus 13:18.

3. Pamodi ki é bon ser onéstu?

Óras ki otus algen odja ma nos é onéstu, es ta kunfia na nos. Kel-li ta djuda pa tudu algen na kongregason xinti suguru sima un família. Nu ta ten un konsénsia trankilu. Tanbê, óras ki nos é onéstu nu pode ‘djuda pa ensinu di nos Salvador, Deus, bira bunitu’, i poi otus algen ta krê prende sobri Jeová. — Tito 2:10.

SABE MÁS

4. Onestidadi ta poi Jeová kontenti

Lé Salmo 44:21 i Malaquias 3:16, i dipôs pâpia sobri kes pergunta li:

• Pamodi ki bu ta atxa ma nu ka ta konsigi sukundi verdadi di Jeová?

• Modi ki bu ta atxa ma Jeová ta xinti óras ki nu disidi konta verdadi sikrê é difísil?

5. Ser onéstu na tudu kuza

VÍDIU: Kuzê ki ta pô-nu fika kontenti? — Un konsénsia linpu (2:32)

Lé Hebreus 13:18, i dipôs pâpia sobri modi ki nu pode ser onéstu. . .

• ku nos família.

• na trabadju ô na skóla.

• na otus situason.

6. Ser onéstu é bon pa nos

Na komésu pode parse ma ser onéstu ta traze sô prubléma. Má dipôs nu pode odja ma ser onéstu é midjór kuza ki nu pode faze. Lé Salmo 34:12-16, i dipôs pâpia sobri kel pergunta li:

• Pamodi ki ser onéstu ta midjora bu vida?

1. Un maridu ku un mudjer onéstu ta ten un kazamentu más fórti

2. Un trabadjador onéstu ta ganha kunfiansa di se patron

3. Un algen onéstu ta ganha ruspetu di autoridadis

REZUMU

Jeová krê pa se amigus ser onéstu na tudu kuza ki es ta fla i ki es ta faze.

Perguntas di rezumu

• Modi ki nu pode ser onéstu?

• Pamodi ki nu ka debe atxa ma nu ta konsigi sukundi verdadi di Jeová?

• Pamodi ki bu krê ser onéstu na tudu kuza?

DJOBE MÁS

Modi ki pai ku mai pode inxina ses fidju ser onéstu?

Konta verdadi (1:44)

Pamodi ki é bon kunpri kel ki nu promete?

Kunpri bus promésa i bu ta resebe bensons (9:09)

Odja pamodi ki nu debe paga inpostu sikrê el ka ta uzadu dretu.

“Bu meste paga inpostu?” (Sentinéla, 1 di setenbru di 2011)

Kuzê ki poi un ómi ki éra dizonéstu muda se vida i bira un algen onéstu?

“N prende ma Jeová ten mizerikórdia i el ta púrdua” (Sentinéla, 1 di maiu di 2015)