Mostra ma bu ta da vida valor

Ten txeu kuza rei di sábi ki nu pode faze pamodi nu sta bibu. Mésmu óras ki nu sta pasa pa prublémas nu pode ser filís. Modi ki nu pode mostra ma nu ta da vida valor? I kal ki é kel motivu más inportanti pa nu faze kel-la?

1. Pamodi ki nu debe da vida valor?

Nu debe da vida valor pamodi el é un prezenti di nos Pai, Jeová. El é ‘fonti di vida’; el ki faze tudu vida. (Salmo 36:9) ‘É el própi ki ta da tudu algen vida, folgu i tudu kuza.’ (Atos 17:25, 28) Jeová ta da-nu tudu kel ki nu meste pa nu kontinua bibu. Má, el ka ta faze sô kel-la. Tanbê el ta sustenta nos vida di un manera ki ta da-nu alegria. — Lé Atos 14:17.

2. Modi ki nu pode mostra Jeová ma nu ta da vida valor?

Un sérvu di Jeová na pasadu, ki txomaba Davidi, fla: ‘Bus odju odja-m mésmu kantu N kumesa ta forma na bariga di nha mai’. (Salmo 139:16) Kel-li krê fla ma Jeová ta preokupa ku bo désdi ki bu mai fika grávida di bo. Jeová ta da bu vida txeu valor. (Lé Mateus 10:29-31.) El ta fika tristi si un algen tra vida di kel otu algen, i ti se própi vida.a (Êxodo 20:13) Tanbê el ta fika tristi si nu poi nos vida na prigu sen nisisidadi ô si nu ka toma kuidadu pa proteje vida di otus algen. Óras ki nu ta kuida di nos vida i nu ta ruspeta vida di otus algen, nu ta mostra ma nu ta da valor pa es prezenti.

SABE MÁS

3. Kuida di bu saúdi

Dja ki nu da nos vida pa Jeová, nu ta uza-l pa faze se vontadi. É sima si nu da nos korpu sima un sakrifisiu pa Deus. Lé Romanos 12:1, 2, i dipôs pâpia sobri kes pergunta li:

• Kuzê ki debe pô-u ta kuida di bu saúdi?

• Kal ki é alguns manera ki bu pode faze kel-la?

4. Proteje bu vida i vida di otus algen

Bíblia ta insentiva-nu pa nu ivita faze kuzas ki é prigozu. Odja VÍDIU pa bu prende alguns kuza ki bu pode faze pa bu suguransa.

VÍDIU: Kuida di bu suguransa (8:34)

Lé Provérbios 22:3, i dipôs pâpia sobri modi ki bu pode proteje bu vida i di otus algen. . .

• na bu kaza.

• na bu trabadju.

• óras ki bu ta faze disportu.

• óras ki é bo ô otu algen ki sta konduzi.

5. Ruspeta vida di un mininu ki inda ka nase

Davidi splika ma Jeová sta interesadu na tudu kuza ki ta kontise ku un mininu ki inda ka nase. Lé Salmo 139:13-17, i dipôs pâpia sobri kel pergunta li:

• Pa Jeová, vida di un algen ta kumesa óras ki se mai fika grávida ô óras ki el nase?

Leis ki Jeová daba se povu Israel na ténpu antigu, ta protejeba mai i se fidju ki inda ka naseba. Lé Êxodo 21:22, 23, i dipôs pâpia sobri kes pergunta li:

• Kuzê ki Jeová ta atxaba di un algen ki sen krê tra vida di un mininu ki inda ka naseba?

• Kuzê ki el ta atxaba di un algen ki ta fazeba kel-la di propózitu?b

• Kuzê ki bu ta atxa di manera ki Deus ta pensa?

Odja VÍDIU.

VÍDIU: Da vida valor sima Deus ta da (5:00)

Ti un mudjer ki ta da vida valor pode atxa ma faze abortu é se úniku soluson. Lé Isaías 41:10, i dipôs pâpia sobri kes pergunta li:

• Si un mudjer sta ta fazedu preson pa faze abortu, na kenha ki el debe pidi ajuda? Pamodi?

REZUMU

Bíblia ta inxina-nu pa nu ama, ruspeta i proteje vida pamodi el é un prezenti di Jeová. Kel-li ta inklui nos vida i vida di otus algen.

Perguntas di rezumu

• Pamodi ki nos vida ten txeu valor pa Jeová?

• Modi ki Jeová ta xinti óras ki un algen ta tra se vida ô vida di otu algen di propózitu?

• Pamodi ki bu ta da vida valor?

DJOBE MÁS

Modi ki nu pode agradese Jeová pa vida ki el da-nu?

Kántiku 141 — Vida é un milagri (2:41)

Atxa respósta pa kel pergunta li: Deus ta púrdua un mudjer ki faze abortu?

“Kuzê ki Bíblia ta fla sobri abortu?” (Artigu na jw.org)

Sabe kuzê ki Deus ta pensa sobri vida debe djuda-nu skodje kuzê ki nu ta divirti ku el.

“Nu debe faze kes disportu prigozu i kóre risku di vida?” (Nhos korda!, 8 di otubru di 2000)

I si un algen sta ta pensa na mata kabésa? Odja modi ki Bíblia pode djuda.

“N krê móre — Bíblia ta pode djuda-m si N sta pensa na mata kabésa?” (Artigu na jw.org)